ငါး/ပုစွန် မွေးမြူရေးအစာတောင့်များ ထုတ်လုပ်ရာ၌ ပြည်တွင်းထွက်ကုန်ကြမ်းများ ပိုမိုအသုံးပြုနိုင်ရေးကြိုးပမ်း

ငါး/ပုစွန် မွေးမြူရေးအစာတောင့်များ ထုတ်လုပ်ရာ၌ ပြည်တွင်းထွက်ကုန်ကြမ်းများ ပိုမိုအသုံးပြုနိုင်ရေးကြိုးပမ်း

နေပြည်တော် ဇွန် ၁၅

စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီးသည် ယမန်နေ့က ရန်ကုန်တိုင်းဒေသကြီး လှိုင်သာယာမြို့နယ် ရွှေလင်ပန်းစက်မှုဇုန်ရှိ ထူးသစ်ရေချိုငါး/ပုစွန် အစာတောင့်စက်ရုံသို့ သွားရောက်ကြည့်ရှုစစ်ဆေးသည်။

ဦးစွာ ဒုတိယဝန်ကြီးသည် ပြည်တွင်းမှထွက်ရှိသည့် ဆန်စပါးဘေးထွက်နှင့် ဆီထွက်သီးနှံ ဘေးထွက်ပစ္စည်း ၇၀ ရာခိုင်နှုန်း အသုံးပြုထုတ်လုပ်သည့် ၁ ဒသမ ၄ မီလီနှင့် ၁ ဒသမ ၆ မီလီအရွယ် ပုစွန်အစာတောင့်များ၊ ၂ မီလီ၊ ၄ မီလီ၊ ၂ ဒသမ ၅ မီလီ ငါးလေး/ ငါးကြီး ရေပေါ်အစာတောင့်များနှင့် ၆ မီလီငါးတန်ရေပေါ် ငါးအစာတောင့်များ ထုတ်လုပ်ဖြန့်ဖြူးနေမှုများကို ကြည့်ရှုစစ်ဆေးပြီး မွေးမြူရေးတိရစ္ဆာန်များ ကျန်းမာသန်စွမ်းရေး၊ ရောဂါဒဏ်ခံနိုင်ရည်ရှိရေး၊ အရည်အသွေး ကောင်းမွန်စွာ ထုတ်လုပ်နိုင်ရေးအတွက် အခြေခံကျသည့် အာဟာရပြည့်ဝသည့် မွေးမြူရေးအစာ ကျွေးမွေးမှုဆောင်ရွက်နိုင်ကြစေရန် ပြည်တွင်းထွက်ကုန်ကြမ်းများကို အဓိကထား အသုံးပြုထုတ်လုပ်ရေး၊ တိရစ္ဆာန်အစာနှင့် သက်ဆိုင်သော သုတေသနများဆောင်ရွက်ရန် လိုအပ်ချက်များကို ဆွေးနွေးမှာကြားသည်။

အလားတူ ဒုတိယဝန်ကြီးသည် ရွှေပြည်သာမြို့နယ်ရှိ မွေးမြူရေးနှင့်ကုသရေးဦးစီးဌာနပိုင် လှော်ကား အစာစပ်စက်ရုံကို လောရယ်ရီကုမ္ပဏီက ငှားရမ်းလုပ်ကိုင်ရန် ဆောင်ရွက်နေမှုနှင့် အဆောက်အအုံများ၊ အစာတောင့်စက်ရုံများကို လိုက်လံကြည့်ရှုစစ်ဆေးပြီး တာဝန်ရှိသူများအား လုပ်ငန်းဆိုင်ရာ လိုအပ်ချက်များ ဆွေးနွေးမှာကြားခဲ့ကြောင်း သိရသည်။

သတင်းစဉ်