တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး ခွန်သန့်ဇော်ထူး တိုင်းဒေသကြီး/ ပြည်နယ်များတွင် ဆောင်ရွက်လျက်ရှိသည့် တိုင်းရင်းသား စာပေသင်ကြားရေးအထောက်အကူပြုနှင့် တိုင်းရင်းသား စာပေသင်ကြားရေးကိစ္စရပ်များနှင့် စပ်လျဉ်းသည့် လုပ်ငန်းညှိနှိုင်းအစည်းအဝေး တက်ရောက် နေပြည်တော်မေ ၁၂

တိုင်းရင်းသားလူမျိုးများရေးရာဝန်ကြီးဌာန၊ ပြည်ထောင်စုဝန်ကြီး ခွန်သန့်ဇော်ထူး တိုင်းဒေသကြီး/ ပြည်နယ်များတွင် ဆောင်ရွက်လျက်ရှိသည့် တိုင်းရင်းသား စာပေသင်ကြားရေးအထောက်အကူပြုနှင့် တိုင်းရင်းသား စာပေသင်ကြားရေးကိစ္စရပ်များနှင့် စပ်လျဉ်းသည့် လုပ်ငန်းညှိနှိုင်းအစည်းအဝေး တက်ရောက် နေပြည်တော်မေ ၁၂

တိုင်းရင်းသားလူမျိုးများရေးရာဝန်ကြီးဌာန၊ တိုင်းဒေသကြီး/ ပြည်နယ်များတွင် ဆောင်ရွက် လျက်ရှိသည့် တိုင်းရင်းသား စာပေသင်ကြားရေးနှင့် စာပေသင်ကြားရေး အထောက်အကူပြု ဝန်ထမ်းများခန့်ထားရေးကိစ္စရပ်များနှင့် စပ်လျဉ်းသည့် လုပ်ငန်းညှိနှိုင်း အစည်းအဝေးကို ယနေ့မွန်းလွဲပိုင်းတွင် တိုင်းရင်းသားလူမျိုးများရေးရာဝန်ကြီးဌာန၊ အစည်းအဝေးခန်းမ၌ ကျင်းပ ပြုလုပ်ရာ ပြည်ထောင်စုဝန်ကြီး ခွန်သန့်ဇော်ထူး၊ ပညာရေးဝန်ကြီးဌာန၊ ဒုတိယဝန်ကြီး ဦးနေမျိုးလှိုင်၊  တိုင်းရင်းသား လူမျိုးများရေးရာဝန်ကြီးဌာန၊ ဒုတိယဝန်ကြီး ဦးဇော်အေးမောင်၊ အမြဲတမ်းအတွင်းဝန်၊  ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးချုပ်နှင့်တာဝန်ရှိသူများ တက်ရောက်ကြပါသည်။

ဦးစွာ ပြည်ထောင်စုဝန်ကြီးက အဖွင့်အမှာစကားပြောကြားရာတွင် တိုင်းရင်းသားလူမျိုး များရေးရာဝန်ကြီးဌာနနှင့် ပညာရေးဝန်ကြီးဌာနတို့၏ ပူးပေါင်းဆောင်ရွက်မှုများဖြင့် တိုင်းရင်းသား များ၏ စာပေသင်ကြားရေးကိစ္စရပ်များအား ပိုမိုအားကောင်းလာစေရန် ရည်ရွယ်၍ ယခု အစည်းအဝေးကို ကျင်းပရခြင်းဖြစ်ပါကြောင်း၊ တိုင်းရင်းသားလူမျိုးများရေးရာဝန်ကြီးဌာနသည် တိုင်းရင်းသားစာပေ သင်ကြားသည့် Teaching Assistant-TA ၊ Language Teacher-LT ဆရာ/ မများ ခန့်ထားနိုင်ရေးကိစ္စနှင့်ပတ်သက်၍ ၂၀၁၇-၂၀၁၈ ပညာသင်နှစ်မှ စတင်ကာ ပညာရေး ဝန်ကြီးဌာနနှင့် စံပြုအချက်များပြုစု၍ စနစ်တကျ ပူးပေါင်းဆောင်ရွက်ခဲ့ကြပါကြောင်း၊ (၂၇-၉-၂၀၂၂)  ရက်နေ့တွင် ကျင်းပခဲ့သော နိုင်ငံတော်စီမံအုပ်ချုပ်ရေး ကောင်စီအစည်းအဝေးတွင် နိုင်ငံတော်စီမံအုပ်ချုပ်ရေးကောင်စီဥက္ကဋ္ဌက “တိုင်းဒေသကြီးနှင့် ပြည်နယ်အလိုက် သင်ကြားရေး အထောက်အကူပြုနှင့် ဘာသာစကားသင် ဆရာ၊ ဆရာမများ ခန့်အပ်တာဝန်ပေးခြင်းမှာ တိုင်းရင်းသားစာပေ၊ ယဉ်ကျေးမှုနှင့် ဘာသာကို ထိန်းသိမ်းဆောင်ရွက်ကြရန်ဖြစ်ကြောင်း” ပြောကြားခဲ့သဖြင့် နိုင်ငံတော်အစိုးရအနေဖြင့် တိုင်းရင်းသားစာပေ သင်ကြားရေးနှင့်  ပတ်သက်၍  အထူးအလေးထားသည်ကို  တွေ့မြင်နိုင်မည်ဖြစ်ပါကြောင်း၊ ဝန်ကြီးဌာနများသည် မိမိတို့၏လုပ်ငန်း၊ ကဏ္ဍအလိုက် တိုင်းရင်းသား ပြည်သူများအတွက် ဆောင်ရွက်ကြရသည်ဖြစ်ရာ တိုင်းရင်းသားများအတွက် အထူးဆောင်ရွက်ပေးသည့် ပညာရေး ဝန်ကြီးဌာနအား ကျေးဇူးတင်ရှိပါကြောင်း၊ တက်ရောက်လာကြသူများအားလုံးအနေဖြင့်လည်း တိုင်းရင်းသားစာပေသင်ကြားရေးကိစ္စရပ်များနှင့်ပတ်သက်၍ လက်ရှိကြုံတွေ့နေရသည့် အခြေအနေများကို ပိုမိုကောင်းမွန်လာစေရန် ရှေးရှုပြီး ဝိုင်းဝန်းအကြံပြုဆွေးနွေးပေးကြ စေလိုပါကြောင်း ပြောကြားပါသည်။ 

ယင်းနောက် ပညာရေးဝန်ကြီးဌာန၊ ဒုတိယဝန်ကြီး ဦးနေမျိုးလှိုင်က ပြောကြားရာတွင် မိမိတို့ပညာရေးဝန်ကြီးဌာနသည် တိုင်းရင်းသားဘာသာစကား၊ စာပေ သင်ကြားသင်ယူမှုနှင့် ပတ်သက်၍ ပူးပေါင်းဆောင်ရွက်ရန် အသင့်ရှိပါကြောင်း၊ တိုင်းရင်းသား စာပေသင်ကြားသည့် Teaching Assistant-TA ၊ Language Teacher-LT ဆရာ/ မများ ခန့်ထားရေးကိစ္စများနှင့် ပတ်သက်၍ နိုင်ငံတော်မှ သတ်မှတ်ပြဋ္ဌာန်းထားသည့် မူဘောင်များ ရှိပြီး အခက်အခဲများကို အတူတကွ ပြန်လည်ညှိနှိုင်း ဖြေရှင်းဆောင်ရွက်သွားကြရမည်ဖြစ်ပါကြောင်း ပြောကြားပါသည်။

ထို့နောက် တိုင်းရင်းသားလူမျိုးများရေးရာဝန်ကြီးဌာန၊ ဒုတိယဝန်ကြီး ဦးဇော်အေးမောင်က ဆွေးနွေးရာတွင် (၂၀၀၈) မြန်မာနိုင်ငံဖွဲ့စည်းပုံအခြေခံဥပဒေ၊ အခန်း(၁)  နိုင်ငံတော်၏ အခြေခံမူများ  ပုဒ်မ(၂၂)နှင့် အမျိုးသားပညာရေးဥပဒေပုဒ်မ (၄၄) တို့တွင် တိုင်းရင်းသားများ၏ စာပေနှင့် ဘာသာစကား သင်ကြားသင်ယူမှုနှင့် စပ်လျဉ်း၍ ပြဋ္ဌာန်းထားပါကြောင်း၊ ပညာရေးဝန်ကြီးဌာန အနေဖြင့်  TA ၊ LT ဆရာ/မ လျှောက်လွှာများခေါ်ယူရေးကိစ္စ၊  တိုင်းရင်းသား စာပေသင်ရိုး ညွှန်းတမ်းစာအုပ်များ ပိုမိုပုံနှိပ်ထုတ်ဝေနိုင်ရေးကိစ္စ၊ နိုင်ငံတော်အကြီးအကဲ၏ လမ်းညွှန်ချက်နှင့် အညီ အရည်အသွေးမြှင့် အထောက်အကူပြု သင်တန်းများအား သက်ဆိုင်ရာ တိုင်းဒေသကြီးနှင့် ပြည်နယ်အလိုက် နီးစပ်ရာ ဒေသများတွင် ဖွင့်လှစ်ပေးနိုင်ရေးကိစ္စရပ်များအား ဆောင်ရွက် ပေးစေလိုပါကြောင်း ပြောကြားပါသည်။ 

၎င်းနောက် ပညာရေးဝန်ကြီးဌာန၊ အခြေခံပညာဦးစီးဌာန၊ ညွှန်ကြားရေးမှူးချုပ် ဦးကျော်စွာသွင်က တိုင်းဒေသကြီး/ ပြည်နယ်များတွင် ဆောင်ရွက်လျက်ရှိသည့် တိုင်းရင်းသား စာပေ သင်ကြားရေးကိစ္စရပ်များနှင့် စပ်လျဉ်း၍  ဆွေးနွေးတင်ပြပါသည်။

ယင်းနောက် ပြည်ထောင်စုဝန်ကြီး၊ ဒုတိယဝန်ကြီးများနှင့် ညွှန်ကြားရေးမှူးချုပ်များက တိုင်းဒေသကြီး/ ပြည်နယ်များတွင် ဆောင်ရွက်လျက်ရှိသည့် တိုင်းရင်းသား စာပေသင်ကြားရေး ကိစ္စရပ်များနှင့်စပ်လျဉ်း၍ အထွေထွေ ဆွေးနွေးကြပြီး ပြည်ထောင်စုဝန်ကြီးက နိဂုံးချုပ်စကား ပြောကြားကာ အခမ်းအနားကို ရုပ်သိမ်းခဲ့ကြောင်းသိရှိရပါသည်။