ပဲခူးတိုင်းဒေသကြီး၊ ပဲခူးမြို့နယ်နှင့် စစ်ကိုင်းတိုင်းဒေသကြီး၊ စစ်ကိုင်းမြို့နယ်တို့၌ လိုင်စင်မဲ့ မော်တော်ယာဉ် နှစ်စီး ဖမ်းဆီးအရေးယူ

ပဲခူးတိုင်းဒေသကြီး၊ ပဲခူးမြို့နယ်နှင့် စစ်ကိုင်းတိုင်းဒေသကြီး၊ စစ်ကိုင်းမြို့နယ်တို့၌ လိုင်စင်မဲ့ မော်တော်ယာဉ် နှစ်စီး ဖမ်းဆီးအရေးယူ

     ၂၀၂၆ ခုနှစ်၊ ဇန်နဝါရီ ၁၉ ရက်နှင့် ၂၀ ရက်က ပဲခူးတိုင်းဒေသကြီး၊ ပဲခူးမြို့နယ်နှင့် စစ်ကိုင်းတိုင်းဒေသကြီး၊ စစ်ကိုင်းမြို့နယ်တို့၌ လိုင်စင်မဲ့ မော်တော်ယာဉ် နှစ်စီး ဖမ်းဆီးအရေးယူ ထားကြောင်း သိရသည်။

     ဖြစ်စဉ်မှာ ဇန်နဝါရီ ၁၉ ရက် ည ၉ နာရီ ၃၀ မိနစ်တွင် ပဲခူးတိုင်းဒေသကြီး၊ ပဲခူးမြို့နယ်၊ ပုဏ္ဏားစုရပ်ကွက်ရှိ မြို့ထောင့်ဘုန်းကြီးကျောင်းတွင် လိုင်စင်မဲ့ မော်တော်ယာဉ်များ လာရောက် သိမ်းဆည်းထားရှိကြောင်း သတင်းအရ ပဲခူးမြို့မရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ “ဓမ္မသဟာယကျောင်းတိုက်” စာတန်းပါ ယာဉ်အမှတ် KYN/RLG-XXXX NISSAN X-TRAIL မော်တော် ယာဉ်အား ပဲခူးမြို့နယ်၊ ဇိုင်းတောင်ရပ်ကွက်နေ မျိုးမင်းအောင်(ခ)တင်ကူ(၃၀)နှစ်နှင့်အတူ တွေ့ရှိရပြီး အဆိုပါမော်တော်ယာဉ်နှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ မော်တော်ယာဉ်ဖြစ်ကြောင်း စစ်ဆေးတွေ့ရှိရသဖြင့် မျိုးမင်းအောင်(ခ)တင်ကူ အား ပဲခူးမြို့မရဲစခန်း (ပ)၂၆/၂၀၂၆၊ ပို့ကုန်သွင်းကုန်ဥပဒေပုဒ်မ ၈ ဖြင့် လည်းကောင်း။

     အလားတူ ဇန်နဝါရီ ၂၀ ရက် မွန်းလွဲ ၂ နာရီ ၃၀ မိနစ်တွင် စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ပန်းဘဲတန်းရပ်ကွက်၊ ကျော်ထက်ကွေ့မီးပွိုင့်၌ အမှတ်(၁၀၆)ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များက ယာဉ်စစ်ဆေးခြင်းများ ဆောင်ရွက်နေစဉ် ရွှေဘို-မန္တလေးကားလမ်းအတိုင်း ကချင်ပြည်နယ်၊ မိုးကောင်းမြို့နယ်၊ ကျွန်းတောရပ်ကွက်နေ မွေဖုလမြန်(၃၂)နှစ် မောင်းနှင်လာသည့် MDY-15/9C-XXXX PAJERO မော်တော်ယာဉ်အား ရပ်တန့်စစ်ဆေးခဲ့ရာ အဆိုပါမော်တော်ယာဉ်နှင့် ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ မော်တော်ယာဉ် ဖြစ်ကြောင်း စစ်ဆေးတွေ့ရှိရသဖြင့် မွေဖုလမြန် အား စစ်ကိုင်းမြို့မရဲစခန်း (ပ)၃၂/၂၀၂၆၊ ပို့ကုန်သွင်းကုန်ဥပဒေပုဒ်မ ၈ ဖြင့် လည်းကောင်း အသီးသီးအမှုဖွင့်အရေးယူထားကြောင်း သတင်း ရရှိပါသည်။