ပြည်ထောင်စုဝန်ကြီး ဦးမျိုးသန့် ရန်ကုန်နှင့် ဒလမြို့တို့ကို ဆက်သွယ်ထားသည့် မြန်မာ-ကိုရီးယား နှစ်နိုင်ငံချစ်ကြည်ရေး (ဒလ)တံတားတည်ဆောက်ရေးလုပ်ငန်းများ ကြည့်ရှုစစ်ဆေး

ပြည်ထောင်စုဝန်ကြီး ဦးမျိုးသန့် ရန်ကုန်နှင့် ဒလမြို့တို့ကို ဆက်သွယ်ထားသည့် မြန်မာ-ကိုရီးယား နှစ်နိုင်ငံချစ်ကြည်ရေး (ဒလ)တံတားတည်ဆောက်ရေးလုပ်ငန်းများ ကြည့်ရှုစစ်ဆေး

နေပြည်တော် နိုဝင်ဘာ ၂၉

ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးမျိုးသန့်သည် အမြဲတမ်းအတွင်းဝန်နှင့် ဦးစီးဌာနများမှ ညွှန်ကြားရေးမှူးချုပ်များနှင့်အတူ ယနေ့တွင် ရန်ကုန်မြို့နှင့် ဒလမြို့တို့ကို ဆက်သွယ်တည်ဆောက်နေသော မြန်မာ-ကိုရီးယား နှစ်နိုင်ငံချစ်ကြည်ရေး(ဒလ)တံတားတည်ဆောက်ရေးလုပ်ငန်းများကို သွားရောက်ကြည့်ရှုစစ်ဆေးသည်။

ဦးစွာ ပြည်ထောင်စုဝန်ကြီးနှင့်အဖွဲ့သည် တံတားတည်ဆောက်ရေးလုပ်ငန်းခွင်ရှင်းလင်းဆောင်သို့ရောက်ရှိရာ တံတားတည်ဆောက်ရေးလုပ်ငန်းများ ဆောင်ရွက်နေသော စီမံကိန်းတာဝန်ခံက စီမံကိန်းလုပ်ငန်းများနှင့်စပ်လျဉ်း၍ ရန်ကုန်ဘက်ကမ်း ချဉ်းကပ်တံတားဆောင်ရွက်ပြီးစီးမှုအခြေအနေ၊ ပင်မတံတား၌ Cable ကြိုးတွင် ကြိုးထိန်းဒဏ်ခံကိရိယာများ တပ်ဆင်ဆောင်ရွက်ပြီးစီးမှုအခြေအနေ၊ ဒလဘက်ကမ်းချဉ်းကပ်တံတား ဆောင်ရွက်ပြီးစီးမှုအခြေအနေ၊ ရန်ကုန်ဘက်ကမ်းရှိ Ramp B နှင့် Ramp A တို့ဆောင်ရွက်ပြီးစီးမှုအခြေအနေ၊ တံတားလက်ရန်းများ ဆောင်ရွက်နေသည့်အခြေအနေများ၊ တံတားအောက်ရှိ လမ်းနှင့်ရေမြောင်းလုပ်ငန်းများ ဆောင်ရွက်နေသည့်အခြေအနေများကို ရှင်းလင်းတင်ပြပြီး တံတားဦးစီးဌာန ညွှန်ကြားရေးမှူးချုပ်က တံတားစီမံကိန်းဆိုင်ရာအချက်အလက်များ၊ တည်ဆောက်ရေးလုပ်ငန်းများ ဆောင်ရွက်ပြီးစီးမှု၊ အချောသပ်လုပ်ငန်းများ ဆောင်ရွက်နေမှုနှင့် ဆက်လက်ဆောင်ရွက်မည့်လုပ်ငန်းအစီအစဉ်များ၊ ရန်ကုန်မြို့တော်စည်ပင်သာယာရေးအဖွဲ့နှင့် ပေါင်းစပ်ဆောင်ရွက်ရမည့်အခြေအနေတို့ကို ဖြည့်စွက်ရှင်းလင်းတင်ပြသည်။

ယင်းနောက် လမ်းဦးစီးဌာနမှ ညွှန်ကြားရေးမှူးချုပ်က ချဉ်းကပ်တံတားများနှင့် ပင်မတံတားပေါ်တွင် ကတ္တရာကွန်ကရစ်(AC)ခင်းခြင်းလုပ်ငန်းများ ဆောင်ရွက်နေသည့်အခြေအနေ၊ လမ်းညွှန်အမှတ်အသားများ ဆောင်ရွက်မည့်အခြေအနေ၊ အဆောက်အဦဦးစီးဌာနမှ အင်ဂျင်နီယာချုပ်က ဒလဘက်ခြမ်းတွင် Toll Plaza နှင့် Administrative Office တည်ဆောက်နေမှုအခြေအနေ၊ ယာဉ်များ အဆင်ပြေစွာသွားလာနိုင်ရေးနှင့် ငွေကောက်ခံမှုစနစ်ဆောင်ရွက်မည့် အစီအစဉ်တို့ကို ရှင်းလင်းတင်ပြသည်။

တင်ပြချက်များနှင့်စပ်လျဉ်း၍ ပြည်ထောင်စုဝန်ကြီးက တံတားအတက်/အဆင်းနှင့် တံတားပေါ်တွင် ယာဉ်အန္တရာယ်ကင်းရှင်းစေရေးအတွက် ယာဉ်လမ်းကြောင်းပြ လမ်းညွှန်အမှတ်အသားများ၊ Road Sign များ တပ်ဆင်ခြင်းနှင့် ဆေးလိုင်းများရေးဆွဲရာတွင် ပို့ဆောင်ရေးနှင့်ဆက်သွယ်ရေးဝန်ကြီးဌာနက နောက်ဆုံးထုတ်ပြန်ထားသော သတ်မှတ်ချက်များနှင့်အညီ ဆောင်ရွက်ရန်၊ ယာဉ်ကြောပေါင်းဆက်ရာတွင် ယာဉ်အန္တရာယ်ကင်းရှင်းစေရေးအတွက် ရန်ကုန်မြို့တော်စည်ပင်သာယာရေးကော်မတီနှင့် ညှိနှိုင်းပေါင်းစပ်ဆောင်ရွက်ရန်၊ တည်ဆောက်ရေးလုပ်ငန်းများကို လုပ်ငန်းစဉ်များအလိုက် လျာထားသတ်မှတ်ချိန်ထက် ဆောလျင်စွာပြီးစီးရေး အလေးထားဆောင်ရွက်ရန် ၊ သံမဏိကြိုးထိန်းတိုင် (Pylon)များတွင် လေကြောင်းအချက်ပြမီးများနှင့် မိုးကြိုးလွှဲများတပ်ဆင်ရန်၊ ညအချိန်သင်္ဘောများ အန္တရာယ် ကင်းရှင်းအောင်သွားလာနိုင်ရန်အတွက် ရေကြောင်းလမ်းပြမီးများကို သတ်မှတ်ချက်အတိုင်း တပ်ဆင်ဆောင်ရွက်ရန်၊ ဒလမြို့ ရေချိုရရှိစေရေးအတွက် တံတား၏တစ်ဖက်တစ်ချက်တွင် ထည့်သွင်းဆောင်ရွက်နေသော အချင်း ၀ ဒသမ ၅ မီတာရှိသော ရေပိုက်နှစ်လုံးသွယ်တန်းပေးခြင်းအား စနစ်တကျဆောင်ရွက်ပေးရန်၊ တံတား၏ အချောသပ်လုပ်ငန်းများ ဆောင်ရွက်ရာတွင် စံချိန်စံနှုန်းအတိုင်း ကိုက်ညီအောင်ကြပ်မတ်ဆောင်ရွက်ရန်နှင့် တံတားတိုင်(Pier)များ ရေယာဉ်များကြောင့် ထိခိုက်ပျက်စီးမှုမှ ကြိုတင်ကာကွယ်ရန်၊ ပင်လယ်ကူးသင်္ဘောကြီးများ ဖြတ်သန်းခုတ်မောင်းနိုင်သော တံတားအမြင့်များသည် နိုင်ငံတကာတွင် အများအပြားအသုံးပြုလျက်ရှိသော်လည်း မြန်မာ-ကိုရီးယား နှစ်နိုင်ငံ ချစ်ကြည်ရေး(ဒလ)တံတားသည် ပင်လယ်ကူးသင်္ဘောများဖြတ်ကူးသည့် မြန်မာနိုင်ငံ၏ ပထမဆုံးတံတားအမြင့်ဖြစ်ပြီး တံတားအချို့နေရာများတွင် လမ်းအနိမ့်အမြင့် Gradient မတ်စောက်သောကြောင့် ယာဉ်အန္တရာယ်ကင်းရှင်းစေရေးအတွက် ခွင့်ပြုမည့်ယာဉ်အမျိုးအစား ကန့်သတ်ခြင်း၊ မောင်းနှင်ခွင့်ပြုသည့် အရှိန်နှုန်းအားကန့်သတ်ခြင်းနှင့် အရှိန်ထိန်းစနစ် speed Bump များ ထည့်သွင်းဆောင်ရွက်ခြင်းတို့ကို ရန်ကုန်မြို့တော် စည်ပင်သာယာရေးကော်မတီဖြင့် ဆွေးနွေးဆောင်ရွက်ရန်လိုအပ်ကြောင်း၊ ယာဉ်နှင့်ယာဉ်မောင်းသူတို့၏ အားနည်းချက်ကြောင့် အန္တရာယ်မဖြစ်ပေါ်စေရေး ကြိုတင်ကာကွယ်သည့်အနေဖြင့် လိုအပ်သော စည်းမျဉ်းသတ်မှတ်ချက်များ ချမှတ်ဆောင်ရွက်ရန် လိုအပ်ကြောင်းတို့ကို မှာကြားသည်။

ထို့နောက် ပြည်ထောင်စုဝန်ကြီးနှင့်အဖွဲ့သည် တံတားတည်ဆောက်ရေး စီမံကိန်းလုပ်ငန်းခွင်၏ ရန်ကုန်ဘက်ခြမ်းရှိ ဘုန်းကြီးလမ်းတစ်လျှောက် ချဉ်းကပ်တံတားတစ်ဖက်တစ်ချက်တွင် ပတ်ဝန်းကျင် လူနေအိမ်ရာများအတွက် မော်တော်ယာဉ်သွားလာမှုကြောင့် ဆူညံသံများ အနှောင့်အယှက်မဖြစ်စေရေး အသံထိန်းနံရံများ (Noise Barrier) တပ်ဆင်ပြီးစီးမှုအခြေအနေ၊ ချဉ်းကပ်တံတားများပေါ်တွင် ကတ္တရာကွန်ကရစ်(AC) ခင်းပြီးမှုအခြေအနေ၊ ပင်မတံတားပေါ်တွင် Barrier များတည်ဆောက်နေမှု၊ ရေလုံဆေးလုပ်ငန်းများဆောင်ရွက်နေမှု၊ လက်ရန်းများတပ်ဆင်နေမှုနှင့် အချောသပ်လုပ်ငန်းများ ဆောင်ရွက်နေမှုအခြေအနေတို့ကို လုပ်ငန်းခွင်အတွင်း လိုက်လံကြည့်ရှုစစ်ဆေးပြီး လုပ်ငန်းလိုအပ်ချက်များမှာကြားသည်။

ဆက်လက်၍ ဒလဘက်ကမ်းတွင် ဆောင်ရွက်နေသော တံတားအသုံးပြုခကောက်ခံရေးစခန်း Toll Plaza နှင့် Administrative Office တည်ဆောက်နေမှုအခြေအနေနှင့် တံတားကြီးရေရှည်တည်တံ့ခိုင်မြဲရေးအတွက် ထိန်းသိမ်းရေးအဆောက်အအုံတည်ဆောက်နေမှု အခြေအနေတို့ကို ကြည့်ရှုစစ်ဆေးပြီး လုပ်ငန်းလိုအပ်ချက်များ မှာကြားသည်။

မြန်မာ - ကိုရီးယား ချစ်ကြည်ရေး (ဒလ)တံတားကြီးသည် မကြာမီပြီးစီးတော့မည်ဖြစ်၍ ပြည်သူများ သွားလာရေးလွယ်ကူအဆင်ပြေစေရန်နှင့် ယာဉ်အန္တရာယ်ကင်းရှင်းစေရေးအတွက် သက်ဆိုင်ရာ အဖွဲ့အစည်းများနှင့် ပူးပေါင်းဆောင်ရွက်လျက်ရှိပြီး တံတားတည်ဆောက်ရေးလုပ်ငန်းများနှင့် အချောသပ်လုပ်ငန်းများကို ဆောက်လုပ်ရေးဝန်ကြီးဌာနမှ အင်ဂျင်နီယာများ၊ တံတားတည်ဆောက်ရေးလုပ်ငန်းများ ဆောင်ရွက်နေသော Consultant အဖွဲ့မှ အင်ဂျင်နီယာပညာရှင်များဖြင့် လုပ်ငန်းများ စံချိန်စံညွှန်းနှင့်အညီ အရည်အသွေးပြည့်မီစွာဖြင့် သတ်မှတ်ချိန်အတွင်းပြီးစီးရေး အရှိန်အဟုန်ဖြင့် ဆောင်ရွက်လျက်ရှိကြောင်း သိရသည်။

သတင်းစဉ်