ပြည်ထောင်စုဝန်ကြီး ဦးခင်မောင်ရီ စစ်ကိုင်းတိုင်းဒေသကြီး ဟုမ္မလင်းမြို့ရှိ ဝန်ထမ်းများနှင့် တွေ့ဆုံ

ပြည်ထောင်စုဝန်ကြီး ဦးခင်မောင်ရီ စစ်ကိုင်းတိုင်းဒေသကြီး ဟုမ္မလင်းမြို့ရှိ ဝန်ထမ်းများနှင့် တွေ့ဆုံ

နေပြည်တော် ဖေဖော်ဝါရီ ၁၆

သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးခင်မောင်ရီသည် ယမန်နေ့မွန်းလွဲပိုင်းတွင် စစ်ကိုင်းတိုင်းဒေသကြီး ဟုမ္မလင်းမြို့ မြို့နယ် သစ်တောဦးစီးဌာနရုံး၌ ဝန်ကြီးဌာနအောက်ရှိ ဌာနများမှ ဝန်ထမ်းများနှင့် တွေ့ဆုံသည်။

တွေ့ဆုံစဉ် ပြည်ထောင်စုဝန်ကြီးက ဝန်ကြီးဌာနအနေဖြင့် သစ်တောဖုံးလွှမ်းမှု ပြန်လည်ကောင်းမွန်လာစေပြီး သစ်တောဖုံးလွှမ်းမှု ၅၀ ရာခိုင်နှုန်းဖြစ်လာစေရန် ရည်မှန်းချက်ထား ဆောင်ရွက်လျက်ရှိကြောင်း၊ ကြိုးဝိုင်း၊ ကြိုးပြင်တောများနှင့် သဘာဝထိန်းသိမ်းရေးနယ်မြေများ တိုးချဲ့ဖွဲ့စည်းခြင်း၊ သစ်တောစိုက်ခင်းများ တည်ထောင်ခြင်း၊ လမ်းဘေးဝဲ/ယာ စိမ်းလန်းစိုပြည်ရေး၊ အပူပိုင်းဒေသ ၁၃ ခရိုင် စိမ်းလန်းစိုပြည်ရေးလုပ်ငန်းများကို အမျိုးသားရေးတာဝန်တစ်ရပ်အနေဖြင့် ဆောင်ရွက်လျက်ရှိကြောင်း၊ ဟုမ္မလင်းခရိုင်အတွင်း သစ်တောဖုံးလွှမ်းမှုမှာ ၂၀၂၀ ပြည့်နှစ်တွင် ၃၁ ဒသမ ၇၅ ရာခိုင်းနှုန်းရှိပြီး ၂၀၂၅ ခုနှစ်တွင် ၃၃ ဒသမ ၈၅ ရာခိုင်နှုန်းရှိသည့်အတွက် ၂ ဒသမ ၁၀ ရာခိုင်နှုန်း တိုးတက်လာသည်ကို တွေ့ရှိရကြောင်း။

ထမံသီတောရိုင်း တိရစ္ဆာန်ဘေးမဲ့တောအတွင်းရှိ ကျားနှင့် အခြားရှားပါးတိရစ္ဆာန်မျိုးစိတ်များကို ထိန်းသိမ်းကာကွယ်သွားရန် လိုအပ်ကြောင်း၊ နိုင်ငံအဆင့် ကျားထိန်းသိမ်းရေးလုပ်ငန်းစီမံချက်များ ရေးဆွဲ၍ ကျားထိန်းသိမ်းရေးလုပ်ငန်းများကို ဆောင်ရွက်လျက်ရှိကြောင်း၊ ဟုမ္မလင်းခရိုင်အတွင်း ဝါးနှင့် ကြိမ်အချောထည်ထုတ်လုပ်မှုလုပ်ငန်းများ ပိုမိုတိုးတက်လာပြီး MSME လုပ်ငန်းများ ဖွံ့ဖြိုးလာစေရေးအတွက် ပုဂ္ဂလိကနှင့် ဌာနပေါင်းစပ်ဆောင်ရွက်သွားရန်လိုအပ်ကြောင်း၊ သစ်တောနယ်မြေအတွင်း တရားမဝင်သစ်နှင့် သတ္တုများ ထုတ်ယူသယ်ဆောင်မှု မရှိစေရေးအတွက်လည်း သက်ဆိုင်ရာဌာနများက ကြပ်မတ်စစ်ဆေး ဆောင်ရွက်သွားရမည်ဖြစ်ကြောင်း၊ ဝန်ထမ်းများအနေဖြင့်လည်း ဝန်ထမ်းကျင့်ဝတ်နှင့်အညီ နေထိုင်၍ ပြည်သူက အားကိုးထိုက်သော ဝန်ထမ်းကောင်းများဖြစ်အောင် ကြိုးပမ်းသွားကြရန် တိုက်တွန်းပါကြောင်း မှာကြားပြီး ဝန်ထမ်းများ၏ တင်ပြမှုများအပေါ် လိုအပ်သည်များ ပေါင်းစပ်ဆောင်ရွက်ပေးခဲ့ကြောင်း သိရသည်။

သတင်းစဉ်