ရှမ်းပြည်နယ်၊ ကလောမြို့နယ်၌ မော်တော်ယာဉ်မှ အရှိန်မထိန်းနိုင်ဘဲ ဝင်ရောက်တိုက်မိခဲ့မှုကြောင့် လမ်းဖြတ်ကူးသူ အမျိုးသား တစ်ဦး သေဆုံး

ရှမ်းပြည်နယ်၊ ကလောမြို့နယ်၌ မော်တော်ယာဉ်မှ အရှိန်မထိန်းနိုင်ဘဲ ဝင်ရောက်တိုက်မိခဲ့မှုကြောင့် လမ်းဖြတ်ကူးသူ အမျိုးသား တစ်ဦး သေဆုံး

     ၂၀၂၅ ခုနှစ်၊ အောက်တိုဘာ ၁၁ ရက်က ရှမ်းပြည်နယ်၊ ကလောမြို့နယ်၌ မော်တော်ယာဉ်မှ အရှိန်မထိန်းနိုင်ဘဲ ဝင်ရောက်တိုက်မိခဲ့မှုကြောင့် လမ်းဖြတ်ကူးသူ အမျိုး သား တစ်ဦး သေဆုံးခဲ့ကြောင်း သိရသည်။

     ဖြစ်စဉ်မှာ အောက်တိုဘာ ၁၁ ရက် ည ၇ နာရီတွင် ရှမ်းပြည်နယ်၊ ကလောမြို့နယ်၊ ဟဲဟိုးမြို့၊ အမှတ်(၃)ရပ်ကွက်၊ ဟဲဟိုး-တောင်ကြီးကားလမ်းပေါ်၌ ယာဉ်တိုက်မှုဖြစ်ပွားကြောင်း သတင်းအရ ဟဲဟိုးနယ်မြေရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ ဟဲဟိုးမြို့၊ အမှတ်(၃)ရပ်ကွက်နေ အောင်ကိုဝင်း(ခ)ဇာနည်(၃၅)နှစ် မောင်းနှင်လာသည့် YGN-31/7K-XXXX NISSAN NOTE မော်တော်ယာဉ်သည် ဟဲဟိုးမှ တောင်ကြီးဘက်သို့ အခင်းဖြစ်နေရာအရောက်၌ အရှိန်မထိန်းနိုင်ဘဲ လမ်းဖြတ်ကူးသည့် တစ်ရပ်ကွက်တည်းနေ ဦးမောင်ရွှေ(၅၈)နှစ်အား ဝင်ရောက်တိုက်မိခဲ့သဖြင့် ဦးမောင်ရွှေတွင် ထိခိုက်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့သောကြောင့် အောင်ကိုဝင်း(ခ)ဇာနည် အား ဟဲဟိုးနယ်မြေရဲစခန်း ယာဉ်(ပ)၂၀/၂၀၂၅၊ ရာဇသတ်ကြီး ပုဒ်မ ၃၀၄-က ဖြင့် အမှုဖွင့်အရေးယူထားကြောင်း သတင်းရရှိပါ သည်။