လူတိုင်းသက်ရှည်ကျန်းမာဖို့ မနက်စောစောလမ်းလျှောက်စို့

လူတိုင်းသက်ရှည်ကျန်းမာဖို့ မနက်စောစောလမ်းလျှောက်စို့

နှစ်စဉ် ဒီဇင်ဘာလကို လူထုအားကစားလအဖြစ်သတ်မှတ်၍ အများပြည်သူစုပေါင်းလမ်းလျှောက်ပွဲများ၊ စုပေါင်းကိုယ်လက် ကြံ့ခိုင်ရေးလှုပ်ရှားမှုများ၊ အားကစားပြိုင်ပွဲများ ကျင်းပခဲ့သည်မှာ နှစ်ပေါင်း ၆၀ ကျော်မျှကြာမြင့်ခဲ့ပြီဖြစ်သည်။ ဒီဇင်ဘာလအတွင်း အပတ်စဉ် စနေနေ့တိုင်း နံနက်စောစော၊ ‌ဆောင်းနှင်းဝေဝေ၊ အေးချမ်းလှသည့် အခါသမယတွင် စုပေါင်းလမ်းလျှောက်ခြင်း၊ စုပေါင်းကိုယ်လက်ကြံ့ခိုင်ရေး လှုပ်ရှားမှုများပြုလုပ်ခြင်းတို့က လူတိုင်းကြံ့ခိုင်ကျန်းမာရေးကို အလေးဂရုပြုဆောင်ရွက်လာကြစေရန် အစပျိုးပေးခြင်းဖြစ်သည်။

ဤတွင် လူထုအားကစားဆိုသည်မှာ အပျော်တမ်း/ဆုကြေးစား အားကစားသမားစစ်စစ်များကဲ့သို့ လေ့ကျင့်ယှဉ်ပြိုင်ကြခြင်းမျိုး မဟုတ်ဘဲ ကြီး၊ ငယ်၊ ကျား၊ မ မရွေးလူတိုင်း အလွယ်တကူ ပါဝင်လှုပ်ရှားနိုင်ကြပြီး ကျန်းမာရေးနှင့် ကိုယ်လက်ကြံ့ခိုင်ရေးတို့အတွက်လည်း အမှန်တကယ်အကျိုးသက်ရောက်သည့် အားကစားလှုပ်ရှားမှုကို တပျော်တပါးစုပေါင်းဆောင်ရွက်ကြခြင်းဖြစ်သည်။ သို့ဖြစ်ရာ အားကစားအထောက်အကူပစ္စည်းလည်းမလို၊ ခက်ခက်ခဲခဲ လေ့ကျင့်ရန်လည်းမလို၍ ငွေကုန်ကြေးကျသက်သာပြီး လူစုလူဝေးဖြင့် စုပေါင်းလှုပ်ရှားနိုင်သည့် လူထုစုပေါင်းလမ်းလျှောက် ပွဲများ၊ စုပေါင်းကိုယ်လက်ကြံ့ခိုင်ရေး လှုပ်ရှားမှုများကို ပြုလုပ်နေ ကြခြင်းဖြစ်သည်။

လမ်းလျှောက်ခြင်းသည် အရိုးရှင်းဆုံးနှင့် ကျန်းမာရေးအတွက် အကျိုးကျေးဇူးများစွာကို ရရှိစေနိုင်သော အထိရောက်ဆုံး လေ့ကျင့် ခန်းတစ်မျိုးဖြစ်သည်ဟု ကျန်းမာရေးပညာရှင်များက ဆိုထားသည်။ လမ်းလျှောက်ချိန်တွင် ခန္ဓာကိုယ်လှုပ်ရှားမှုနှင့်အတူ စိတ်အာရုံစုစည်းမှုလည်းဖြစ်ပေါ်လျက်ရှိရာ ရုပ်ပိုင်းဆိုင်ရာကိုသာမက စိတ်ပိုင်းဆိုင်ရာကိုလည်း ကောင်းစွာအကျိုးပြုသည်ဟုဆိုသည်။ လမ်းလျှောက်ခြင်းသည် ကယ်လိုရီကို လောင်ကျွမ်းစေခြင်းကြောင့် ကိုယ်အလေးချိန်ထိန်းသိမ်းနိုင်ပြီး အဝလွန်ခြင်းကို ကာကွယ်နိုင်သည်။ ကျန်းမာသည့်ခန္ဓာကိုယ်အလေးချိန်ကို ထိန်းသိမ်းထားနိုင်ရန် ပုံမှန်လမ်းလျှောက်ပေးရန်လိုသည်။

လမ်းလျှောက်ခြင်းအားဖြင့် ခန္ဓာကိုယ်သွေးလည်ပတ်မှု ကောင်းမွန်စေပြီး နှလုံးကြွက်သားများကိုလည်း အားကောင်းစေသည်။ သွေးဖိအားကို လျော့ကျစေခြင်း၊ သွေးတွင်းရှိ မကောင်းသည့် ကိုလက်စထရောများကို ကျဆင်းစေနိုင်ခြင်းစသည်တို့ကြောင့် နှလုံးရောဂါနှင့် လေဖြတ်နိုင်သည့် အလားအလာတို့ကိုလည်း လျှော့ချပေးသည်။ ကြွက်သားနှင့်အရိုးများကို သန်မာစေပြီး အဆစ်အမျက်များကိုလည်း ကောင်းမွန်စေသည်။ အစာအိမ်နှင့် အူလမ်းကြောင်းကို နှိုးဆွပေးပြီး အစာချေစနစ်ကိုကောင်းမွန်စေရန် အထောက်အကူပြုသည်။ လမ်းလျှောက်သောအခါ Endorphins ခေါ် ဟော်မုန်းကို ပိုမိုထွက်လာစေပြီး Cortisol ခေါ် ဟော်မုန်းထွက်ရှိမှုကို လျှော့ချပေးခြင်းကြောင့် စိတ်ကျန်းမာပျော်ရွှင်မှုကို မြှင့်တင်ပေးနိုင်ပြီး စိတ်ဖိစီးမှုကို လျှော့ချပေးနိုင်သည်ဟု ကျန်းမာရေးပညာရှင်များက အသိပေးထားပြီး ပုံမှန်လမ်းလျှောက်ကြရန်လည်း တိုက်တွန်းထားသည်။

ကျန်းမာရေးအကျိုးပြု ပုံမှန်လမ်းလျှောက်မှုပြုကြရာတွင် တစ်ရက်လျှင် နာရီဝက်၊ တစ်ပတ်လျှင် ငါးရက်လမ်းလျှောက်ကြဖို့လိုသည်။ ပေါ့ပါး၍ လမ်းလျှောက်ကောင်းသော အဝတ်အစား၊ ဖိနပ်တို့ကို ရွေးချယ်ဝတ်ဆင်၍ နံနက်စောစော လမ်းလျှောက်ကြခြင်းက အသင့်လျော်ဆုံးသော အနေအထားပင်ဖြစ်သည်။ လမ်းလျှောက် သူ၏ကိုယ်နေဟန်ထားမှာ ဦးခေါင်းနှင့်ခါးကို တည့်မတ်စွာထား၍ တံတောင်ဆစ်နှစ်ခုကို ၉၀ ဒီဂရီထားကာ ခြေလှမ်းမှန်မှန်၊ ဟန်ချက်ညီညီ မနှေးမမြန် လျှောက်ကြရမည်ဖြစ်သည်။

ငွေကုန်ကြေးကျနည်းသလောက် လွယ်ကူစွာလှုပ်ရှားနိုင်သည့် ပုံမှန်လမ်းလျှောက်ခြင်းမှရရှိနိုင်သည့် အကျိုးကျေးဇူးများမှာ မယုံနိုင်လောက်အောင်ပင် များပြားလှသည်။ တစ်ရက်လျှင် နာရီဝက်၊ တစ်ပတ်လျှင် ငါးရက်လမ်းလျှောက်ခြင်းက နှလုံးရောဂါဖြစ်နိုင်ခြေ ကို ၁၉ ရာခိုင်နှုန်း လျော့ကျစေပြီး သက်လတ်ပိုင်းအမျိုးသမီးများ တင်ပါးဆုံရိုးကျိုးခြင်းကို ၄၀ ရာခိုင်နှုန်း လျော့နည်းစေသည်။ အသက် ၅၀ နှင့် ၆၀ ကြား ပုံမှန်လမ်းလျှောက်သူများသည် ရှစ်နှစ်အတွင်း လမ်းလျှောက်ခြင်း၊ လေ့ကျင့်ခန်းပြုလုပ်ခြင်း မရှိသူများထက် သေဆုံးနိုင်ခြေ ၃၅ ရာခိုင်နှုန်း လျော့နည်းသည်။ အသက် ၇၁-၉၃ နှစ်အရွယ်အမျိုးသားများ အယ်ဇိုင်းမား ဖြစ်ပွားမှုနှင့် စိတ်ဖောက်ပြန်မှုတို့ ထက်ဝက်လျော့ကျစေသည်ဟုဆိုသည်။

သို့ဖြစ်ရာ လူကြီး၊ လူငယ်၊ ကျား၊ မမရွေး ကိုယ်ရော စိတ်ပါ ကျန်းမာကြံ့ခိုင်ရေးနှင့် အသက်ရှည်ရာ အနာမဲ့ရေးအတွက် အကျိုးကြီးမားသည့် လမ်းလျှောက်ခြင်း အားကစားကို လူတိုင်းကိုယ်စီ မပျက်မကွက် ဆောင်ရွက်ကြရေး အကျိုးမျှော်၍ နှိုးဆော်တိုက်တွန်း အပ်ပါကြောင်း။ ။