အခြေခံပညာမူလတန်းနှင့် အခြေခံပညာအလယ်တန်းပြီးမြောက်ခြင်း စာမေးပွဲဆိုင်ရာ အလုပ်ရုံဆွေးနွေးပွဲနှင့် အမျိုးသားပညာရည်စစ်ဆေးအကဲဖြတ်ခြင်း ဆောင်ရွက်

အခြေခံပညာမူလတန်းနှင့် အခြေခံပညာအလယ်တန်းပြီးမြောက်ခြင်း စာမေးပွဲဆိုင်ရာ အလုပ်ရုံဆွေးနွေးပွဲနှင့် အမျိုးသားပညာရည်စစ်ဆေးအကဲဖြတ်ခြင်း ဆောင်ရွက်

ရန်ကုန် ၂၀၂၅ နိုဝင်ဘာ ၁၅

မြန်မာနိုင်ငံစာစစ်ဦးစီးဌာနက ဦးစီးကျင်းပပြုလုပ်သည့် အခြေခံပညာမူလတန်းနှင့် အခြေခံပညာအလယ်တန်း ပြီးမြောက်ခြင်း စာမေးပွဲဆိုင်ရာ အလုပ်ရုံဆွေးနွေးပွဲနှင့် အမျိုးသား ပညာရည်စစ်ဆေးအကဲဖြတ်ခြင်း၊ လမ်းညွှန်ချက်များ ရှင်းလင်းဆွေးနွေးပွဲကို ယမန်နေ့ နံနက်ပိုင်းက ရန်ကုန်ပညာရေးတက္ကသိုလ် Learning Hub ၌ ကျင်းပသည်။

အဆိုပါ အလုပ်ရုံဆွေးနွေးပွဲသို့ ပညာရေးဝန်ကြီးဌာန ဒုတိယဝန်ကြီး ဦးနေမျိုးလှိုင်၊ ညွှန်ကြားရေးမှူးချုပ်များ၊ ပါမောက္ခချုပ်များ၊ ပညာရေးမှူးများ၊ ဆရာ ဆရာမများနှင့် တာဝန်ရှိသူများ တက်ရောက်ကြသည်။

ဦးစွာ ဒုတိယဝန်ကြီးက အလုပ်ရုံဆွေးနွေးပွဲသည် ယမန်နှစ်က လုပ်ငန်းများ၏ အားသာချက် အားနည်းချက်များကို လွတ်လပ်ပွင့်လင်းစွာ ဆွေးနွေးကြရန်ဖြစ်ပါကြောင်း၊ ထို့ပြင် ပညာရေးဝန်ကြီး ဌာနက ချမှတ်အကောင်အထည်ဖော်နေသည့် အမျိုးသားပညာရေးမဟာဗျူဟာအစီအစဉ် (NESP ၂၀၂၁-၂၀၃၀) ထဲမှ အဓိကကဏ္ဍတစ်ခုဖြစ်သည့် စစ်ဆေးအကဲဖြတ်ခြင်းကို တိုးတက်ကောင်းမွန် စေရေး ဆောင်ရွက်ရာတွင် ယခုကျင်းပပြုလုပ်သည့် အလုပ်ရုံဆွေးနွေးပွဲသည် အလွန်အရေးကြီး ပါကြောင်း။

စစ်ဆေး အကဲဖြတ်ခြင်း၊ စာမေးပွဲကျင်းပခြင်းသည် ကျောင်းသား ကျောင်းသူများ၏ လေ့လာ သင်ယူမှုကို ပိတ်ပင်တားဆီးခြင်းမျိုးမဟုတ်ဘဲ သင်ယူတတ်မြောက်မှုကို အားပေးပြီး ပညာရေးခရီး မှာ ရှေ့ဆက်ရန် အထောက်အကူပြုသည့် လုပ်ငန်းစဉ်ဖြစ်ရမည်ဖြစ်ပါကြောင်း။

အလယ်တန်းအဆင့် Grade-9 ပြီးမြောက်ခဲ့ပါက ပုံမှန်အခြေခံပညာရေးတွင် ဆက်လက် ပညာသင်ကြားနိုင်သလို မိမိဝါသနာပါရာ စက်မှု၊ စိုက်ပျိုး၊ မွေးမြူရေး အထက်တန်း ကျောင်းများတွင် တက်ရောက်ပြီး အသက်မွေးဝမ်းကျောင်းပညာရပ်များကို သင်ယူဆည်းပူးနိုင်သည့် အခွင့်အလမ်း လည်း ရှိနေပြီဖြစ်ပါကြောင်း၊ ကျောင်းသား ကျောင်းသူများအတွက် စူးစမ်းလိုစိတ်ကို လှုံ့ဆော်နိုင် သည့်၊ ကြိုးစားအားထုတ်မှုကို အသိအမှတ်ပြုနိုင်သည့်၊ သင်ယူမှု၏ နောက်တစ်ဆင့်ကို တံခါးဖွင့်ပေး နိုင်သည့် မေးခွန်းများ ပြုစုပေးကြရန် လိုအပ်ပါကြောင်း ပြောကြားသည်။

ဆက်လက်၍ မြန်မာနိုင်ငံစာစစ်ဦးစီးဌာန ညွှန်ကြားရေးမှူးချုပ် ဒေါက်တာသက်လွင်က သင်တန်းဖွင့်လှစ်ရခြင်း၏ ရည်ရွယ်ချက်နှင့် အကျိုးကျေးဇူးများနှင့်ပတ်သက်၍ ရှင်းလင်းပြောကြား သည်။