ဥပဒေဘောင်အတွင်းနေထိုင်ခြင်း ဘေးကင်းရန်ကွာစိတ်ချမ်းသာ

ဥပဒေဘောင်အတွင်းနေထိုင်ခြင်း ဘေးကင်းရန်ကွာစိတ်ချမ်းသာ

နိုင်ငံတော်အစိုးရသည် PDF အမည်ခံအဖွဲ့အပါအဝင် အဖွဲ့အစည်းအမျိုးမျိုးအမည်ဖြင့် လက်နက်ကိုင်ဆန့်ကျင်လျက်ရှိသည့် အဖွဲ့အစည်းများအတွင်း ရောက်ရှိနေသူများအား ဥပဒေဘောင်အတွင်း ပြန်လည်ဝင်ရောက်ရန် ဖိတ်ခေါ်လျက်ရှိသည်။ ဥပဒေဘောင်အတွင်းသို့ ပြန်လည်ဝင်ရောက်လာကြသူများကိုလည်း လိုအပ်သည့် ကူညီပံ့ပိုးမှုများ ဆောင်ရွက်ပေးလျက်ရှိသည်။ နိုဝင်ဘာလ ၂၈ ရက်နေ့က နိုင်ငံတော်နှင့် တပ်မတော်၏ ငြိမ်းချမ်းရေးလုပ်ငန်းစဉ်များကို နားလည်သဘောပေါက်လာသည့် PDF အမည်ခံအဖွဲ့ဝင် အမျိုးသား ၆၇ ဦးနှင့် အမျိုးသမီး ၁၆ ဦး စုစုပေါင်း ၈၃ ဦး တို့သည် လက်နက်ခဲယမ်းများနှင့်အတူ ဥပဒေဘောင်အတွင်း ဝင်ရောက်လာကြသည်ကို ဝမ်းမြောက်ဖွယ်တွေ့မြင်ရသည်။

PDF အမည်ခံအဖွဲ့ဝင်များသည် ၂၀၂၁ ခုနှစ် ဖေဖော်ဝါရီလနောက်ပိုင်းတွင် မြန်မာ့နိုင်ငံရေး အပြောင်းအလဲဖြစ်စဉ်၌ အကြောင်းအမျိုးမျိုးဖြင့် လက်နက်ကိုင်အကြမ်းဖက်လမ်းစဉ်တွင် ပါဝင်ခဲ့ကြသည်။ PDF အမည်ခံအဖွဲ့ဝင်အများစုသည် မိသားစုဝင်ဆွေမျိုးအားအကျပ်ကိုင်၍ အတင်းအဓမ္မ လူသစ်စုဆောင်းခံရခြင်း၊ အကြမ်းဖက်အဖွဲ့များ၏ အကျိုးစီးပွားအတွက် အပြစ်မဲ့ပြည်သူများနှင့် နိုင်ငံ့ဝန်ထမ်းများအား ခြိမ်းခြောက်ခြင်း၊ ဖမ်းဆီးခြင်း၊ သတ်ဖြတ်ခြင်း၊ ဓားပြတိုက်ခြင်း၊ ဆက်ကြေးကောက်ခြင်း၊ သယံဇာတများကိုခိုးထုတ်ခြင်း၊ စစ်ရေးပစ်မှတ်မဟုတ်သည့် အခြေခံအဆောက်အအုံများ၊ လမ်းတံတားများကို မိုင်းထောင်ဖောက်ခွဲဖျက်ဆီးခြင်းစသည့် အကြမ်းဖက်လုပ်ရပ်များကို တစိုက်မတ်မတ်လုပ်ကိုင်လာကြသည်။

အဆိုပါလုပ်ရပ်များသည် တိုင်းပြည်နှင့်လူမျိုးကို ဖျက်ဆီးသောလုပ်ရပ်များဖြစ်၍ အကြမ်းဖက်လုပ်ရပ်များကို လက်မခံနိုင်တော့ခြင်း၊ ၎င်းအဖွဲ့များအတွင်း၌ပင် အထက်၊ အောက်အဆင့်အတန်းခွဲခြား၍ အချင်းချင်းဗိုလ်ကျနှိပ်စက်ခြင်း၊ အဓမ္မကျူးလွန်ခြင်း၊ အနေအစားဆင်းရဲ၍ ပင်ပန်းကြီးစွာနေထိုင်ရခြင်းနှင့် တပ်မတော်၏ ထိုးစစ်ကို ခုခံနိုင်စွမ်းမရှိတော့ခြင်း စသည်တို့ကြောင့် စိတ်ဓာတ်ကျဆင်းလာခြင်းတို့အပြင် နိုင်ငံတော်နှင့်တပ်မတော်၏ ငြိမ်းချမ်းရေးလုပ်ငန်းစဉ်များကို နားလည်သဘောပေါက်လာကြသည်။ သို့ဖြစ်၍ ဥပဒေဘောင်အတွင်း ငြိမ်းချမ်းစွာနေထိုင်ပြီး ၎င်းတို့ကြောင့် နစ်နာဆုံးရှုံးမှုများဖြစ်ပေါ်ခဲ့ရသည့် နိုင်ငံတော်နှင့် ပြည်သူလူထုအတွက် ပြန်လည်အကျိုးပြုလိုခြင်းတို့ကြောင့် လက်နက်ကိုင်လမ်းစဉ်ကို စွန့်လွှတ်၍ ဥပဒေဘောင်အတွင်း ပြန်လည်ဝင်ရောက်လာကြခြင်းဖြစ်ကြောင်း သိရသည်။

ဥပဒေဘောင်အတွင်း ပြန်လည်ဝင်ရောက်လာကြသူများသည် ၎င်းတို့နှင့်အတူ မောင်းပြန်ရိုင်ဖယ် ၁၀ လက်၊ ပစ္စတိုတစ်လက်၊ လက်ပစ်ဗုံးနှင့်လက်လုပ်မိုင်း ခြောက်လုံး၊ ကျည်အိမ် ၁၈ ခု၊ ကျည် ၇၅၉ တောင့်တို့ကို သက်ဆိုင်ရာသို့ လွှဲပြောင်းပေးအပ်ရာ တိုင်းဒေသကြီးဝန်ကြီးချုပ်၊ တိုင်းမှူးနှင့်တာဝန်ရှိသူများက မောင်းပြန်ရိုင်ဖယ်တစ်လက်အတွက် ဆုကြေးငွေကျပ် သိန်း ၅၀ နှုန်း၊ ပစ္စတိုသေနတ်တစ်လက်အတွက် ဆုကြေးငွေကျပ် သိန်း ၂၀၊ လက်လုပ်သေနတ်တစ်လက်အတွက် ဆုကြေးငွေကျပ် ငါးသိန်း၊ လက်ပစ်ဗုံးနှင့် လက်လုပ်မိုင်းတစ်လုံးစီအတွက် ဆုကြေးငွေကျပ်သုံးသိန်းနှင့် အလင်းဝင်လာသူတစ်ဦးလျှင် ငွေကျပ် ၅၀၀၀၀ နှုန်းဖြင့် ၈၃ ဦးအတွက် ဆုကြေးငွေကျပ် ၄၁၅၀၀၀၀ ထောက်ပံ့ပေးအပ်ကာ ခံဝန်ကတိလက်မှတ်ထိုးပြီး မိဘအုပ်ထိန်းသူများထံ လွှဲအပ်ပေးခဲ့သည်။

နိုင်ငံတော်က PDF အမည်ခံလူငယ်များအား ကြိုဆိုလက်ခံထောက်ပံ့ကူညီပေးမှုများနှင့်အတူ ယခုအခါ မိဘအရိပ်အောက်တွင် အေးချမ်းစွာနေထိုင်ကြရပြီဖြစ်ရာ ထိုကဲ့သို့ပင် ဥပဒေဘောင်အတွင်းသို့ ပြန်လည်ဝင်ရောက်ရန်ဆန္ဒရှိသူ PDF အမည်ခံများစွာ ကျန်ရှိသေးသည်ဟု သိရသည်။ PDF အမည်ခံအဖွဲ့ဝင်အများစုသည် မူလကအေးချမ်းစွာနေထိုင်ခဲ့ကြသော ကျေးလက်ဒေသများမှ ဒေသခံလူငယ်လူရွယ်လေးများဖြစ်ကြသည်။ ၂၀၂၀ ပြည့်နှစ် ပတ်ဝန်းကျင်တွင် ကျေးလက်ဒေသအများစုအတွင်း နိုင်ငံရေးပယောဂများ လွှမ်းမိုးခြင်းခံရပြီး ၂၀၂၁ ခုနှစ်တွင် တပ်မတော်က နိုင်ငံတော်၏တာဝန်ကိုရယူသည့်အခါ အတွေးအခေါ်အယူအဆ အသိအမြင်မှားများဖြင့် နိုင်ငံတော်ကိုဆန့်ကျင်ပြီး လက်နက်စွဲကိုင်အကြမ်းဖက်တိုက်ခိုက်မှုများ ပြုလုပ်ခဲ့ကြသည်။ ယခုအခါ အစိုးရနှင့်တပ်မတော်၏ ဆောင်ရွက်ချက်များနှင့် ၎င်းတို့၏ မှားယွင်းမှုများကို သိမြင်နားလည်လာကြသဖြင့် ဥပဒေဘောင်အတွင်းသို့ တဖွဲဖွဲ ပြန်လည်ဝင်ရောက်လာကြပြီဖြစ်သည်။

သို့ဖြစ်ရာ ဥပဒေဘောင်အတွင်းသို့ ပြန်လည်ဝင်ရောက်လိုသူများအနေဖြင့် နီးစပ်ရာ ခရိုင်၊ မြို့နယ်အုပ်ချုပ်ရေးအဖွဲ့များ၊ တပ်စခန်းများနှင့် ရဲစခန်းများသို့ အမြန်ဆက်သွယ်သတင်းပေးပို့လာပါက ကြိုဆိုလက်ခံကာ လိုအပ်သည့်ကူညီထောက်ပံ့မှုများ ပေးအပ်သွားမည်ဖြစ်ပြီး ပါရှိလာသည့် လက်နက်ခဲယမ်းများအတွက်လည်း ဆုကြေးငွေများရရှိမည်ဖြစ်ရာ လက်နက်ကိုင်လမ်းစဉ်၏ ဆိုးကျိုးများနှင့် အမှားများကိုသိမြင်ပြီး ဥပဒေဘောင်အတွင်းနေထိုင်ခြင်းဖြင့် ဘေးကင်းရန်ကွာ စိတ်ချမ်းသာမည်ဖြစ်ပါကြောင်း။ ။