ဧရာဝတီတိုင်းဒေသကြီး ကန်ကြီးထောင့်မူလတန်းကြိုကျောင်းဖွင့်ပွဲကျင်းပ ပုသိမ်ကလေးပြုစုရေးဌာန၊ အိမ်တွင်းမှုသက်မွေးလုပ်ငန်းပညာသင်ကျောင်းများ ကြည့်ရှုစစ်ဆေး

ဧရာဝတီတိုင်းဒေသကြီး ကန်ကြီးထောင့်မူလတန်းကြိုကျောင်းဖွင့်ပွဲကျင်းပ ပုသိမ်ကလေးပြုစုရေးဌာန၊ အိမ်တွင်းမှုသက်မွေးလုပ်ငန်းပညာသင်ကျောင်းများ ကြည့်ရှုစစ်ဆေး

ပုသိမ် နိုဝင်ဘာ ၂၉

ဧရာဝတီတိုင်းဒေသကြီး ကန်ကြီးထောင့်မြို့နယ် ကန်ကြီးထောင့် မူလတန်းကြိုကျောင်းဖွင့်ပွဲကို ယနေ့နံနက်ပိုင်းက အဆိုပါကျောင်းနေရာ၌ ကျင်းပသည်။

ဖွင့်ပွဲသို့ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ စိုးဝင်း၊ ဧရာဝတီတိုင်းဒေသကြီးဝန်ကြီးချုပ် ဦးတင်မောင်ဝင်းနှင့် တာဝန်ရှိသူများ တက်ရောက်ပြီး ကျောင်းဆောင်သစ်ကို ဖဲကြိုးဖြတ်၍ ဖွင့်လှစ်ပေးကာ ကျောင်းဆိုင်းဘုတ်အား စက်ခလုတ်နှိပ်ဖွင့်လှစ်သည်။

ယင်းနောက် အခမ်းအနား၌ ကပြဖျော်ဖြေပေးခဲ့သော အကအဖွဲ့များအား ဂုဏ်ပြုဆုငွေပေးအပ်ပြီး ကမ္ပည်းမော်ကွန်းအား အမွှေးနံ့သာဖြင့် ပက်ဖျန်းကြသည်။ ထို့နောက် မူလတန်းကြိုကျောင်း ကျောင်းဆောင်သစ်ကို လှည့်လည်ကြည့်ရှုပြီး မူကြိုကလေးငယ်များနှင့် ရင်းရင်းနှီးနှီးတွေ့ဆုံကာ မုန့်နှင့်အရုပ်များ ပေးအပ်သည်။

ကျောင်းဆောင်သစ် ဖွင့်ပွဲဒုတိယပိုင်းအစီအစဉ်ကို ဆက်လက်ကျင်းပရာ ပြည်ထောင်စုဝန်ကြီးက ကန်ကြီးထောင့်မူလတန်းကြိုကျောင်းအား လူမှုဝန်ထမ်းဦးစီးဌာန၏ ငွေလုံးငွေရင်း အသုံးစရိတ် ငွေကျပ်သန်း ၃၆၀ ဒသမ ၈၃၀ ဖြင့် RC သုံးထပ်အဆောက်အအုံကို ဆောက်လုပ်ပေးခဲ့ပါကြောင်း၊ ကန်ကြီးထောင့် မူလတန်းကြိုကျောင်းကို ဆောက်လုပ်ဖွင့်လှစ်ပေးခြင်းဖြင့် အသက်(၃)နှစ်မှ (၅)နှစ် မူလတန်းကြိုအရွယ် ကလေးသူငယ်များ၏ ဘက်စုံဖွံ့ဖြိုးတိုးတက်မှုကို အထောက်အကူဖြစ်စေမည်ဖြစ်ပါကြောင်း၊ မူလတန်းကြိုအရွယ်တွင် ကာယဖွံ့ဖြိုးမှု၊ ဉာဏဖွံ့ဖြိုးမှု၊ စာရိတ္တဖွံ့ဖြိုးမှု၊ လူမှုဆက်ဆံရေးဆိုင်ရာ ဖွံ့ဖြိုးမှု၊ စိတ်ပိုင်းဆိုင်ရာဖွံ့ဖြိုးမှု၊ အာဟာရဖွံ့ဖြိုးမှုနှင့် ကျန်းမာရေးအလေ့အကျင့်ကောင်းများရရှိစေရေး ဆောင်ရွက်ပေးရန်လိုအပ်ပါကြောင်း ပြောကြားသည်။

ထို့နောက် တိုင်းဒေသကြီး ဝန်ကြီးချုပ်က အမှာစကားပြောကြားပြီး မူလတန်းကြို ကျောင်းမြေနေရာကို လှူဒါန်းသော အလှူရှင် ပါရမီရိပ်သာကျောင်းတိုက် ဒါယကာ၊ ဒါယိကာမများနှင့် ပါရမီဘက်စုံထောက်ကူအဖွဲ့ကို ဂုဏ်ပြုမှတ်တမ်းလွှာပေးအပ်၍ ကျောင်းဆောင်သစ်နှင့် ပတ်သက်သော စာရွက်စာတမ်းများအား တိုင်းဒေသကြီး လူမှုဝန်ထမ်းရုံးသို့ လွှဲပြောင်းပေးအပ်သည်။ ကန်ကြီးထောင့် မူလတန်းကြိုကျောင်း၌ ကလေးငယ် ၇၅ ဦးကို မူကြိုပညာရေး သင်ကြားပေးလျက်ရှိသည်။

မွန်းလွဲပိုင်းတွင် ပြည်ထောင်စုဝန်ကြီး၊ တိုင်းဒေသကြီး လူမှုရေးရာဝန်ကြီးနှင့် တာဝန်ရှိသူများနှင့်အတူ ပုသိမ်ကလေးပြုစုရေးဌာနသို့ သွားရောက်ကာ ကလေးငယ်များနှင့် ရင်းရင်းနှီးနှီးတွေ့ဆုံပြီး အရုပ်နှင့်မုန့်များပေးအပ်၍ ကလေးပြုစုရေးဌာနကို လှည့်လည်ကြည့်ရှုစစ်ဆေးကာ လိုအပ်ချက်များ ဖြည့်ဆည်းပေးသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ပုသိမ်အိမ်တွင်းမှု သက်မွေးလုပ်ငန်းပညာသင်ကျောင်းသို့ သွားရောက်ပြီး အမျိုးသမီးများ စွမ်းဆောင်ရည်မြှင့်တင်ရေး ရပ်ရွာအခြေပြု မုန့်လုပ်နည်းသင်တန်းတွင် တက်ရောက်နေသော သင်တန်းသူများကို မုန့်လုပ်နည်းသင်ခန်းစာ ပို့ချနေမှု၊ မိန်းမဝတ် (စင်တီမီတာ) သင်တန်း၊ မိန်းမဝတ် (လက်မ)သင်တန်းတို့တွင် သင်ကြားနေမှုများကို ကြည့်ရှုပြီး သင်တန်းသူများအား ရင်းရင်းနှီးနှီးနှုတ်ဆက်၍ အားပေးစကားပြောကြားခဲ့ကြောင်း သိရသည်။

သတင်းစဉ်