Myanmar Football Academies Tournament 2025-2026 ပြိုင်ပွဲတွင် ပထမဆုနှင့် အသန့်ရှင်းဆုံးအသင်းဆုရရှိခဲ့သည့် တပ်မတော်ဘောလုံးအကယ်ဒမီအသင်းအား ဂုဏ်ပြုချီးမြှင့်ခြင်းအခမ်းအနား ကျင်းပ

Myanmar Football Academies Tournament 2025-2026 ပြိုင်ပွဲတွင် ပထမဆုနှင့် အသန့်ရှင်းဆုံးအသင်းဆုရရှိခဲ့သည့် တပ်မတော်ဘောလုံးအကယ်ဒမီအသင်းအား ဂုဏ်ပြုချီးမြှင့်ခြင်းအခမ်းအနား ကျင်းပ

နေပြည်တော် ဇန်နဝါရီ ၂၂

Myanmar Football Academies Tournament 2025-2026 ပြိုင်ပွဲတွင် ပထမဆုနှင့် အသန့်ရှင်းဆုံးအသင်းဆု (Fair Play Award) ရရှိခဲ့သည့် တပ်မတော်ဘောလုံးအကယ်ဒမီ အသင်းအား ဂုဏ်ပြုချီးမြှင့်ခြင်းအခမ်းအနားကို ယနေ့မွန်းလွဲပိုင်းတွင် နေပြည်တော်၊ ဇေယျာသီရိဘောလုံးအားကစားကွင်း၌ ကျင်းပရာ တပ်မတော်အားကစားနှင့်ကာယပညာအုပ်ချုပ်ရေးကော်မတီဥက္ကဋ္ဌ စစ်ရေးချုပ် ဒုတိယဗိုလ်ချုပ်ကြီး ဇော်ဟိန်း၊ တပ်မတော်ဘောလုံးကော်မတီဥက္ကဋ္ဌ ဗိုလ်ချုပ် ရဲထွဋ်၊ ကာကွယ်ရေးဦးစီးချုပ်ရုံး (ကြည်း) မှ တပ်မတော် အရာရှိကြီးများ၊ တပ်မတော်ဘောလုံးအကယ်ဒမီအုပ်ချုပ်ရေးမှူး၊ Myanmar Football Academies Tournament 2025-2026 ပြိုင်ပွဲတွင် ပထမဆုနှင့် အသန့်ရှင်းဆုံးအသင်းဆု (Fair Play Award )ရရှိခဲ့သည့် တပ်မတော်ဘောလုံးအကယ်ဒမီအသင်းမှ နည်းပြအဖွဲ့ဝင်များ၊ အားကစားသမားများနှင့် တာဝန်ရှိသူများ တက်ရောက်ကြသည်။

ဦးစွာ တပ်မတော်အားကစားနှင့်ကာယပညာအုပ်ချုပ်ရေးကော်မတီဥက္ကဋ္ဌ စစ်ရေးချုပ် ဒုတိယဗိုလ်ချုပ်ကြီး ဇော်ဟိန်းက အဖွင့်အမှာစကားပြောကြားပြီး ဂုဏ်ပြုချီးမြှင့်ငွေကျပ် (၁၀) သိန်းပေးအပ်ရာ တပ်မတော်ဘောလုံးအကယ်ဒမီအုပ်ချုပ်ရေးမှူးနှင့် အသင်းခေါင်းဆောင်တို့က လက်ခံရယူကြသည်။

ထို့နောက် တပ်မတော်ဘောလုံးအကယ်ဒမီအုပ်ချုပ်ရေးမှူး ဗိုလ်မှူးခင်မောင်စိုးက တပ်မတော်ဘောလုံးကော်မတီဥက္ကဋ္ဌ ဗိုလ်ချုပ် ရဲထွဋ်ထံ ချန်ပီယံဆုဖလားအား အပ်နှင်းသည်။

ယင်းနောက် တပ်မတော်ဘောလုံးအကယ်ဒမီအသင်းနည်းပြချုပ် ဦးညီညီလတ်က ကျေးဇူးတင်စကားပြောကြားကာ အခမ်းအနားကို ရုပ်သိမ်းလိုက်သည်။

မြန်မာဘောလုံးအကယ်ဒမီများပြိုင်ပွဲကို ၂၀၂၆ ခုနှစ်၊ ဇန်နဝါရီလ ၃ ရက်နေ့မှ ၁၁ ရက် နေ့အထိ ရန်ကုန်မြို့၌ ပြိုင်ပွဲဝင်အသင်း (၈) သင်းဖြင့် ပါဝင်ယှဉ်ပြိုင်ခဲ့ကြပြီး ဗိုလ်လုပွဲကို ဇန်နဝါရီလ ၁၁ ရက်နေ့တွင် ယှဉ်ပြိုင်ကစားခဲ့ရာ တပ်မတော်ဘောလုံးအကယ်ဒမီအသင်းက မြန်မာဘောလုံးအကယ်ဒမီ (မန္တလေး) အသင်းကို ၃ ဂိုး ၁ ဂိုးဖြင့် အနိုင်ရဗိုလ်စွဲခဲ့ကြောင်း သတင်းရရှိသည်။