၂၀၁၉-၂၀၂၀ ပညာသင်နှစ် အခြေခံပညာမူလတန်းနှင့် အလယ်တန်းဆင့် အင်္ဂလိပ်စာနှင့်သ င်္ချာစွမ်းရည် ပြိုင်ပွဲ(ဗဟိုအဆင့်)ဆုချီးမြှင့်ပွဲအခမ်းအနားကျင်းပ

၂၀၁၉-၂၀၂၀ ပညာသင်နှစ် အခြေခံပညာမူလတန်းနှင့် အလယ်တန်းဆင့် အင်္ဂလိပ်စာနှင့်သ င်္ချာစွမ်းရည် ပြိုင်ပွဲ(ဗဟိုအဆင့်)ဆုချီးမြှင့်ပွဲအခမ်းအနားကျင်းပ

နေပြည်တော် ဒီဇင်ဘာ ၂၉

ပညာရေးဝန်ကြီးဌာန အခြေခံပညာဦးစီးဌာန ၂၀၁၉-၂၀၂၀ ပညာသင်နှစ် အခြေခံပညာမူလတန်းနှင့် အလယ်တန်းဆင့် အင်္ဂလိပ်စာနှင့် သင်္ချာစွမ်းရည်ပြိုင်ပွဲ(ဗဟိုအဆင့်) ဆုချီးမြှင့် ပွဲ အခမ်းအနားကို ယနေ့ မွန်းလွဲ ၁ နာရီခွဲတွင် နေပြည်တော်၊ အမှတ် (၆) အခြေခံပညာ အထက်တန်းကျောင်း သီရိမင်္ဂလာခန်းမ၌ ကျင်းပသည်။

ရှေးဦးစွာ ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာ မျိုးသိမ်းကြီးက ပညာရေးဝန်ကြီးဌာနအနေဖြင့် ထူးချွန်သည့်ကျောင်းသား၊ ကျောင်းသူများ၊ လူရည်ချွန်များ ပေါ်ထွက်လာစေရန် ဘက်ပေါင်းစုံ မှ ကြိုးပမ်းဆောင်ရွက်လျက်ရှိပါကြောင်း၊ သင်ရိုးညွှန်းတမ်းအသစ်၏ အင်္ဂလိပ်စာဘာသာရပ်များတွင် အရေး အဖတ်အပြော စွမ်းရည်များတိုးတက်လာစေရန် သင်ခန်းစာများနှင့် သင်ကြားနည်းများကို ပြုပြင် ပြောင်းလဲ ထားပြီး သင်္ချာဘာသာရပ်တွင်လည်း စဉ်းစားတွေးခေါ်သော ဉာဏ်၊ ဆက်စပ်တွေးခေါ်သော ဉာဏ်ရည်များ ဖွံ့ဖြိုးတိုးတက်စေသည့် သင်ခန်းစာများနှင့် သင်ကြား နည်းများကို ပြုပြင်ပြောင်းလဲထားပါ ကြောင်း၊ ကျောင်း သားလူငယ်များ အတွက် လိုအပ်သောအရည် အသွေးများအနက် အင်္ဂလိပ်စာနှင့် သင်္ချာ စွမ်းရည် မြင့်မားရေးသည် အရေးကြီးသော ကဏ္ဍတစ်ရပ်ဖြစ်ပါကြောင်း။

ကျောင်းသား လူငယ်များအား နိုင်ငံတကာသုံး ဘာသာစကားဖြစ် သည့် အင်္ဂလိပ်စာ အရေး၊ အဖတ် အပြော စွမ်းရည် တိုးတက် လာစေရေး နှင့် စဉ်းစားတွေးခေါ် ဉာဏ်ရင့်သန်ပြီး သင်္ချာဆိုင်ရာ ဉာဏ်ရည်တိုးတက် စေရေး အတွက် အင်္ဂလိပ်စာစွမ်းရည် ပြိုင်ပွဲနှင့် သင်္ချာစွမ်းရည်ပြိုင်ပွဲကျင်းပ ပေးရခြင်းဖြစ်ပါကြောင်း၊ ယနေ့(၂၁)ရာစု ပညာရေးခေတ်တွင် သိပ္ပံနှင့် နည်းပညာများ ဖွံ့ဖြိုးတိုးတက်လာသည်နှင့်အမျှ တိုးတက် ပြောင်းလဲလာသည့် သတင်းအချက်အလက်များကို အပြည့်အဝရယူလေ့လာနိုင်ရေးအတွက် နိုင်ငံတကာသုံးဘာသာ စကားဖြစ်သည့် အင်္ဂလိပ်စာစွမ်းရည်မြင့်မားနေရန် လိုအပ်သလို သင်္ချာ စွမ်းရည်မြင့်မား ရန်လည်း လိုပါကြောင်း၊ သို့မှသာ နေ့စဉ်နှင့်အမျှ တိုးတက်ပြောင်းလဲနေသည့် သိပ္ပံနှင့် နည်းပညာများနှင့် အဆင့်မြင့် ပညာရပ်များကို ဆက်လက် စူးစမ်းဖော် ထုတ်နိုင်မည်ဖြစ်ပြီး နိုင်ငံတော်၏ လူမှုစီးပွားရေး အဆင့်အတန်းကို မြှင့်တင်နိုင်ရေး တစ်ထောင့်တစ်နေရာက ကူညီပေးနိုင်မည် ဖြစ်ပါကြောင်း၊ ထို့ကြောင့် အခြေခံပညာကျောင်းသား၊ ကျောင်းသူများကို မူလတန်းအဆင့်နှင့် အလယ်တန်းအဆင့်က စပြီး အင်္ဂလိပ်စာ၊ သင်္ချာဘာသာ ရပ်စွမ်းရည်များ ထက်မြက်မြင့်မားရေးရည်ရွယ် ကာ Grade - 5 မှ Grade - 9 အထိ အင်္ဂလိပ်စာ၊ သင်္ချာစွမ်းရည်ပြိုင်ပွဲများကို ယခုကဲ့သို့ နှစ်စဉ်ကျင်းပပြုလုပ်ပေးနေခြင်း ဖြစ်ပါကြောင်း၊ ဆရာ၊ ဆရာမများအနေဖြင့်လည်း အင်္ဂလိပ်စာ၊ သင်္ချာဘာသာရပ်စွမ်းရည်မြင့်အောင် အလေးထားလေ့ကျင့် သင်ကြားပေးနိုင်မှသာ ကျောင်းသား၊ ကျောင်းသူများ အခြေခံကောင်းရရှိပြီး အထက်တန်းအဆင့်နှင့် အဆင့်မြင့် ပညာရပ်များကို လွယ်ကူစွာ ဆက်လက်လေ့လာ သင်ယူနိုင်ကြ မည်ဖြစ်ပါကြောင်း။

ပြိုင်ပွဲတွင် အင်္ဂလိပ်စာနှင့် သင်္ချာ မေးခွန်းများ အကဲဖြတ်စစ်ဆေးခြင်း ကို ပညာရေးဝန်ကြီးဌာန အဆင့်မြင့် ပညာဦးစီးဌာနက တာဝန်ယူ ဆောင်ရွက်၍ ကျောင်းသား ကျောင်း သူများ၏စွမ်းရည်ကို ပိုမိုတိုးတက်စေ ရန်အတွက် အင်္ဂလိပ်စာပြိုင်ပွဲ ခေါင်းစဉ်များကို ကြိုတင်မပေးဘဲ Theme များကိုပေးထားခြင်း ဖြစ်ပါ ကြောင်း၊ ကျောင်းသား ကျောင်းသူများ အင်္ဂလိပ်စာစွမ်းရည် မြင့်မားရေး အတွက် ဆရာ ဆရာမများ၏ စွမ်းရည် ကိုလည်း မြှင့်တင်ရမည်ဖြစ်ပါ ကြောင်း၊ ဆရာ ဆရာမများအနေဖြင့် ကျောင်းသား ကျောင်းသူများ၏ သင်ယူ တတ်မြောက်မှု အရည်အသွေး မြင့်မားရေးအတွက် သင်ယူမှုဝန်းကျင် ကောင်းဖြစ်အောင် ကြိုးပမ်းဆောင် ရွက်ပေးကြစေလိုပါကြောင်း၊ စဉ်းစား တွေးခေါ်မှုကို အားပေးသောသင်ကြား၊ သင်ယူမှုဝန်းကျင်ကောင်းကို ဖန်တီး ပေးစေလိုပါကြောင်း၊ ပညာရေးဝန်ကြီး ဌာနအနေဖြင့် ဘက်စုံ၊ ထောင့်စုံ တိုးတက်ရေး ဆောင်ရွက် လျက်ရှိရာ ထိရောက်သောသင်ကြား၊ သင်ယူမှု ဖြစ်ထွန်းနိုင်ရေးအတွက် ဆရာ ဆရာမများအနေဖြင့် မိမိ သင်ပြရသည့် ဘာသာရပ်အလိုက် ကြိုးစားသင်ပြကြပြီး ကျောင်းသား ကျောင်းသူ များကလည်း စိတ်ဓာတ်ကောင်းမွန်သော၊ စည်းကမ်းလိုက်နာသော နိုင်ငံ့သားကောင်းများဖြစ်အောင် ကြိုးစားကြရန် တိုက်တွန်းပါကြောင်း စသည် ဖြင့် အဖွင့်အမှာစကား ပြောကြားသည်။

ထို့နောက် ပြိုင်ပွဲဝင်ကျောင်းသား ကျောင်းသူများ ဖြေဆိုမှုနှင့် ပတ်သက်၍ အခြေခံပညာမူလတန်းနှင့် အလယ်တန်း အင်္ဂလိပ်စာစွမ်းရည်ပြိုင်ပွဲ စာစစ်မှူးချုပ်၊ အဆင့်မြင့်ပညာဦးစီးဌာန ဒုတိယညွှန်ကြားရေး မှူးချုပ် ဒေါက်တာ မေစန်းရီနှင့် သင်္ချာစွမ်းရည် ပြိုင်ပွဲစာစစ်မှူးချုပ် ရန်ကုန်တက္ကသိုလ် သင်္ချာပါမောက္ခ ဒေါက်တာ ချိုဝင်းတို့က ရှင်းလင်းတင်ပြသည်။

ယင်းနောက် အင်္ဂလိပ်စာစွမ်းရည် ပြိုင်ပွဲတွင် ပထမဆုချီးမြှင့်ခံရသည့် ကျောင်းသား ကျောင်းသူများက စွမ်းရည်ကို တင်ပြသည်။

ဆက်လက်၍ ပြည်ထောင်စုဝန်ကြီး၊ ဒုတိယဝန်ကြီးနှင့် သက်ဆိုင်ရာတာဝန်ရှိသူများက အင်္ဂလိပ်စာ၊ သင်္ချာစွမ်းရည်ပြိုင်ပွဲတွင် သက်ဆိုင်ရာ အဆင့်အလိုက် ဆုရရှိသည့် ကျောင်းသား ကျောင်းသူများအား ဆုချီးမြှင့် သည်။

ထို့နောက် အခြေခံပညာဦးစီးဌာန ညွှန်ကြားရေးမှူးချုပ် ဦးကိုလေးဝင်းက အကဲဖြတ်စစ်ဆေးခြင်းဆိုင်ရာလုပ်ငန်းများ ကူညီဆောင်ရွက်ပေးသည့် တက္ကသိုလ်များမှ သက်ဆိုင်ရာ တာဝန်ရှိသူများနှင့် အင်္ဂလိပ်စာ စွမ်းရည်  ပြိုင်ပွဲတွင် ပါဝင်ကူညီသော Presenter ကျောင်းသား ကျောင်းသူများအား ဂုဏ်ပြု မှတ်တမ်းလွှာချီးမြှင့်ခဲ့ကြောင်း သိရသည်။

သတင်းစဉ်