(၆၄)နှစ်မြောက်ကရင်ပြည်နယ်နေ့အထိမ်းအမှတ် စတုတ္ထအကြိမ် မြန်မာ့ရိုးရာလှေလှော်ပြိုင်ပွဲ ကျင်းပ

ဘားအံ နိုဝင်ဘာ ၆

 (၆၄)နှစ်မြောက်ကရင်ပြည်နယ်နေ့ပွဲအထိမ်းအမှတ်ပွဲတော်ကို ပျော်ပွဲရွင်ပွဲများ၊ အားကစားပြိုင်ပွဲများ၊ စင်တင်တေးဂီတဖျော်ဖြေပွဲများ၊ ဇာတ်သဘင်အနုပညာအကအလှ၊ ဒုံးအကပြိုင်ပွဲများ၊ ဈေးရောင်းပွဲတော်များဖြင့် စည်ကားသိုက်မြိုက်စွာ ကျင်းပသွားမည်ဖြစ်ရာ နိုဝင်ဘာလ ၆ ရက်နေ့နံနက် ၉ နာရီက (၆၄)နှစ်မြောက်ကရင်ပြည်နယ်နေ့ အထိမ်းအမှတ် စတုတ္ထအကြိမ် မြန်မာ့ရိုးရာလှေလှော်ပြိုင်ပွဲကို ဘားအံမြို့ကန်သာယာအတွင်း၌ကျင်းပသည်။

 အဆိုပါပြိုင်ပွဲအား ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ်ဒေါ်နန်းခင်ထွေးမြင့် တက်ရောက်အမှာစကားပြောကြားခဲ့ပြီး ပြည်နယ် ဝန်ကြီးချုပ်၊ ပြည်နယ်လျှပ်စစ်နှင့်စက်မှုဝန်ကြီးဦးစိုးလှိုင်၊ သဘာဝပန်ဝန်းကျင်ထိန်းသိမ်းရေး၊ သစ်တော၊သတ္တုနှင့်လမ်းပန်းဆက်သွယ်ရေး ဝန်ကြီးဦးစောပြည်သာ၊ လူမှုရေးဝန်ကြီးဦးဘိုဘိုဝေမောင်၊ လူဝင်မှုကြီးကြပ်ရေးနှင့်လူ့စွမ်းအားအရင်းအမြစ်ဝန်ကြီး ဦးမင်းကိုခိုင်တို့က ဖဲကြိုးဖြတ်ဖွင့်လှစ်ပေးခဲ့သည်။

 ထိုပြိုင်ပွဲကို ဘားအံမြို့နယ်အတွင်းရှိ ဌာနဆိုင်ရာ၊ ရပ်ကွက်/ကျေးရွာများမှ အမျိုးသား(၅)တက်လှော် ၁၅ သင်း၊ အမျိုးသား(၃)တက်လှော် ၁၇ သင်း၊ အမျိုးသားတစ်ဦးချင်းပြိုင်ပွဲတွင် ၂၀ ဦး၊ အမျိုးသမီး (၅)တက်လှော် ၉ သင်း၊ အမျိုးသမီး(၃)တက် လှော် ၁၀ သင်း၊ အမျိုးသမီးတစ်ဦးချင်းပြိုင်ပွဲဝင် ၁၄ ဦး ဝင်ရောက်ယှဉ်ပြိုင်ခဲ့ကြပြီး ပြိုင်ပွဲအား နိုဝင်ဘာ (၇)ရက်နေ့ထိ နှစ်ရက်ကြာကျင်းပသွားမည်ဖြစ်ကာ ပြိုင်ပွဲဝင်အသင်းများအား မဲစနစ်ဖြင့်မဲနိုက်၍ စံချိန်ဖြင့်ပထမအဆင့်ကို ယှဉ်ပြိုင်စေမည်ဖြစ်ကြောင်း၊ အသင်းအားလုံး၏ ရရှိလာသည့် စံချိန်ကိုယူ၍ အကောင်းဆုံး(၈)သင်းကို ဒုတိယအဆင့်ရှုံးထွက်ပြိုင်ပွဲကို ယှဉ်ပြိုင်စေ၍ နောက်ဆုံးအဆင့်လေးသင်းကိုမဲစနစ်ဖြင့်တွဲ၍ အကြို ဗိုလ်လုပွဲနှင့် ဗိုလ်လုပွဲကို ယှဉ်ပြိုင်စေမည်ဖြစ်ကြောင်းသိရသည်။

 (၆၄)နှစ်မြောက်ကရင်ပြည်နယ်နေ့အထိမ်းအမှတ် မြန်မာ့ရိုးရာလှေလှော်ပြိုင်ပွဲကို ဒေသအတွင်း တိမ်မြှုပ်လုနီးပါး အနေအထားသို့ ရောက်ရှိနေသော မြန်မာ့ရိုးရာလှော်လှော် အားကစားနည်းကို ပြန်လည်၍ဖော်ထုတ်သည့်အနေ့ဖြင့် သော်လည်ကောင်း၊ ပျော်ပွဲရွှင်ပွဲ တစ်ရပ်အနေဖြင့်သော်လည်းကောင်း၊ ဒေသခံပြည်သူလူထုတို့၏ စည်းလုံးညီညွှတ်မှုအချင်းချင်း ချစ်ကြည်ပူးပေါင်းဆောင်ရွက်မှုများ တိုးပွားလာစေရန် ရည်ရွယ်ကျင်းပခြင်းဖြစ်ကြောင်းနှင့် ပြိုင်ပွဲတွင် ဆုရရှိသော လှေလှော်အသင်းများအား ဆုများထိုက်တန်စွာ ချီးမြှင့် ပေးသွားမည်ဖြစ်ကြောင်းသတင်းရရှိသည်။