အပြည်ပြည်ဆိုင်ရာ ပူးပေါင်းဆောင်ရွက်ရေးဝန်ကြီးဌာန ပြည်ထောင်စုဝန်ကြီးသည် အာဆီယံနိုင်ငံခြားရေးဝန်ကြီးများ အလုပ်သဘော ညစာစားပွဲအခမ်းအနား၊ အာဆီယံ နိုင်ငံခြားရေးဝန်ကြီးများအစည်းအဝေး၊ (၁၉)ကြိမ်မြောက် အာဆီယံနိုင်ငံရေးနှင့် လုံခြုံရေးအသိုက်အဝန်းကောင်စီအစည်းအဝေးနှင့် (၂၃)ကြိမ်မြောက် အာဆီယံလုပ်ငန်း ပေါင်းစပ်ညှိနှိုင်းရေးကောင်စီအစည်းအဝေးများသို့ တက်ရောက်

Ministry of Foreign Affairs/ Nay Pyi Taw / June 22, 2019

(၂၂-၆-၂၀၁၉ ရက်၊ ဗန်ကောက်မြို့)

(၃၄)ကြိမ်မြောက် အာဆီယံထိပ်သီးအစည်းအဝေးသို့ တက်ရောက်လျက်ရှိသည့် ပြည်ထောင်စုသမ္မတ မြန်မာနိုင်ငံတော် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ခေါင်းဆောင်သည့် မြန်မာ ကိုယ်စားလှယ်အဖွဲ့နှင့်အတူ ထိုင်းနိုင်ငံ၌ ရောက်ရှိနေသော အပြည်ပြည်ဆိုင်ရာ ပူးပေါင်းဆောင်ရွက်ရေး ဝန်ကြီးဌာန ပြည်ထောင်စုဝန်ကြီး ဦးကျော်တင်သည် ၂၁-၆-၂၀၁၉ ရက်၊ ၁၉၀ဝ နာရီတွင် ထိုင်းနိုင်ငံ၊ ဗန်ကောက်မြို့၊ The Athenee Hotel ၌ ထိုင်းနိုင်ငံခြားရေးဝန်ကြီး Don Pramudwinai က တည်ခင်းဧည့်ခံသည့် အလုပ်သဘော ညစာစားပွဲသို့ အခြားအာဆီယံနိုင်ငံခြားရေးဝန်ကြီးများနှင့်အတူ တက်ရောက်ခဲ့ပါသည်။

ပြည်ထောင်စုဝန်ကြီးသည် ၂၂-၆-၂၀၁၉ ရက်၊ ဝ၉၀ဝ နာရီတွင် ထိုင်းနိုင်ငံ၊ The Athenee Hotel ၌ ကျင်းပပြုလုပ်သည့် အာဆီယံနိုင်ငံခြားရေးဝန်ကြီးများအစည်းအဝေး (ASEAN Foreign Ministers’ Meeting)သို့ တက်ရောက်ခဲ့ပါသည်။ အစည်းအဝေးတွင် အာဆီယံအသိုက်အဝန်း ထူထောင်သည့်အခြေအနေနှင့် အာဆီယံ၏ပြင်ပဆက်ဆံရေးကိစ္စရပ်များကို ဆွေးနွေးပြီး ဒေသတွင်းနှင့် နိုင်ငံတကာရေးရာကိစ္စရပ်များကို အမြင်ချင်းဖလှယ်ဆွေးနွေးခဲ့ကြပါသည်။

ဆက်လက်၍ ပြည်ထောင်စုဝန်ကြီးသည် ၁၀၄၅ နာရီတွင် ကျင်းပပြုလုပ်သည့် (၁၉)ကြိမ်မြောက် အာဆီယံနိုင်ငံရေးနှင့် လုံခြုံရေးအသိုက်အဝန်းကောင်စီ အစည်းအဝေး (19th ASEAN Political-Security Community Council Meeting)သို့ တက်ရောက်ခဲ့ပါသည်။ အစည်းအဝေးတွင် အာဆီယံနိုင်ငံရေးနှင့် လုံခြုံရေးအသိုက်အဝန်းအခြေပြမြေပုံ-၂၀၂၅ (APSC Blueprint-2025) အကောင်အထည်ဖော် ဆောင်ရွက်မှု အခြေအနေများကို ပြန်လည်သုံးသပ်ခဲ့ပြီး အာဆီယံနိုင်ငံရေးနှင့် လုံခြုံရေးအသိုက်အဝန်းမဏ္ဍိုင်အောက်မှ ကဏ္ဍအလိုက် ဖြစ်ပေါ်တိုးတက်မှု အခြေအနေများနှင့် ပူးပေါင်းဆောင်ရွက်မှုဆိုင်ရာကိစ္စရပ်များကို ဆွေးနွေးခဲ့ကြပါသည်။

ဆက်လက်၍ ပြည်ထောင်စုဝန်ကြီးသည် ၁၂၀ဝ နာရီတွင် ကျင်းပပြုလုပ်သည့် (၂၃)ကြိမ်မြောက် အာဆီယံလုပ်ငန်းပေါင်းစပ်ညှိနှိုင်းရေးကောင်စီအစည်းအဝေး (23rd ASEAN Coordinating Council Meeting)သို့ တက်ရောက်ခဲ့ပါသည်။ အစည်းအဝေးတွင် (၃၃)ကြိမ်မြောက် အာဆီယံထိပ်သီးအစည်းအဝေး၌ အာဆီယံ အဖွဲ့ဝင်နိုင်ငံများ၏ အကြီးအကဲများက ချမှတ်ခဲ့သည့်လုပ်ငန်းများ အကောင်အထည်ဖော် ဆောင်ရွက်နေမှု အခြေအနေနှင့် (၃၄)ကြိမ်မြောက် အာဆီယံထိပ်သီးအစည်းအဝေးနှင့် ဆက်စပ်အစည်းအဝေးများအတွက် ကြိုတင်ပြင်ဆင်ဆောင်ရွက်ထားရှိမှု အခြေအနေများ၊ အဆိုပါထိပ်သီးအစည်းအဝေးများတွင် အတည်ပြု/ ထုတ်ပြန်/ မှတ်တမ်းတင်မည့် စာရွက်/စာတမ်းများနှင့် အာဆီယံအသိုက်အဝန်း အကောင်အထည်ဖော် ဆောင်ရွက်မှုဆိုင်ရာ တိုးတက်မှုအခြေအနေများကို ဆွေးနွေးခဲ့ကြကြောင်း သိရှိရပါသည်။