ပိုလီယိုကာကွယ်ဆေး အပိုဆောင်းတိုက်ကျွေးခြင်းအစီအစဉ်စတင် ပြည်နယ်ဝန်ကြီးချုပ်ဒေါ်နန်းခင်ထွေးမြင့် ကလေးငယ်များအား ကာကွယ်ဆေးတိုက်ကျွေး

ပိုလီယိုကာကွယ်ဆေး အပိုဆောင်းတိုက်ကျွေးခြင်းအစီအစဉ်စတင် ပြည်နယ်ဝန်ကြီးချုပ်ဒေါ်နန်းခင်ထွေးမြင့် ကလေးငယ်များအား ကာကွယ်ဆေးတိုက်ကျွေး

ဘားအံ ဇူလိုင် ၇
 ကရင်ပြည်နယ်၊ ဖါပွန်မြို့နယ်၊ ဆင်စွယ်ကျေးရွာတွင်နေထိုင်သော အသက်(၂)နှစ်အရွယ် ကလေးငယ် (၁)ဦးတွင် ၂၀၁၉ ခုနှစ် ဇွန်လ ၂၃ ရက်နေ့က အသွင်ပြောင်းပိုလီယို အကြောသေရောဂါပိုးကိုတွေ့ရှိခဲ့ရာ ထိုရောဂါပိုးကူးစက်မှုကို ဖြတ်တောက်ရန်ရည်ရွယ်၍ ရောဂါကူးစက်ပျံ့နှံ့နိုင်ချေများသော နေရာဒေသ/ လူအုပ်စုများရှိသော မြို့နယ်(၁၂)မြို့နယ်တွင် ပိုလီယိုကာကွယ်ဆေး အပိုဆောင်း တိုက်ကျွေးသွားမည်ဖြစ်ရာ ဇူလိုင်လ ၇ ရက်နေ့ နံနက် ၈ နာရီက ပိုလီယို ကာကွယ်ဆေးအပိုဆောင်းတိုက်ကျွေးခြင်းအစီအစဉ် ပြည်နယ်အဆင့်စတင်ခြင်း အခမ်းအနားကို ပြည်နယ်ပြည်သူ့ကျန်းမာရေးဦးစီးဌာနမှူးရုံးခန်းမ၌ ကျင်းပသည်။
 အခမ်းအနားတွင် ပြည်နယ်ပြည်သူ့ကျန်းမာရေးဦးစီးဌာနမှူး ဒေါက်တာကျော်စွာမြင့်က ပိုလီယိုကာကွယ်ဆေး အပိုဆောင်း တိုက်ကျွေးရခြင်းနှင့်စပ်လျဉ်း၍ ရှင်းလင်းပြောကြားပြီး ပြည်နယ်ဝန်ကြီးချုပ်ဒေါ်နန်းခင်ထွေးမြင့်၊ ပြည်နယ် လွှတ်တော်ဥက္ကဋ္ဌဦးစောချစ်ခင်၊ အစိုးရအဖွဲ့ဝင်ဝန်ကြီးများ၊ တာဝန်ရှိသူများနှင့်လူမှုရေးအသင်းအဖွဲ့များက ကလေးငယ် များအား အပိုဆောင်း ပိုလီယိုကာကွယ်ဆေးကို တိုက်ကျွေးခဲ့ကြသည်။
 ကရင်ပြည်နယ်အတွင်းရှိ မြို့နယ်များအားလုံးတွင် ပိုလီယိုကာကွယ်ဆေးအပိုဆောင်းတိုက်ကျွေးခြင်းကို ယနေ့နံနက်မှစ၍ တစ်ပြိုင်နက်တည်း တိုက်ကျွေးလျက်ရှိရာ ပြည်နယ်ဝန်ကြီးချုပ်၊ ပြည်နယ်လွှတ်တော်ဥက္ကဋ္ဌနှင့် ပြည်နယ်အစိုးရအဖွဲ့ဝင်ဝန်ကြီးများသည် ဘားအံမြို့ပေါ် ရပ်ကွက်များရှိ ပိုလီယိုကာကွယ်ဆေးအပိုဆောင်းတိုက်ကျွေးရာ စုရပ်များသို့ လှည့်လည်ကြည့်ရှု၍ ကလေးငယ်များအား ကာကွယ်ဆေးတိုက်ကျွေးခဲ့ကြသည်။
 ကရင်ပြည်နယ်၊ ဖာပွန်မြို့နယ်တွင် မွေးစမှ အသက်(၁၅)နှစ်အထိကလေးများနှင့် ကရင်ပြည်နယ်၊ အခြားမြို့နယ် (၆)မြို့နယ်လုံး၊ မွန်ပြည်နယ်၊ သထုံမြို့နယ်၊ ဘီးလင်းမြို့နယ်နှင့် ကျိုက်ထိုမြို့နယ်၊ ပဲခူးတိုင်းဒေသကြီး ကျောက်ကြီးမြို့နယ်နှင့် ရွှေကျင်မြို့နယ် စုစုပေါင်း (၁၁)မြို့နယ်တွင် ရည်မှန်းမွေးစမှ (၅)နှစ်အထိ ကလေးစုစုပေါင်း (၃)သိန်းခန့်ကို ပိုလီယို ကာကွယ်ဆေး အပိုဆောင်းတိုက်ကျွေးသွားမည်ဖြစ်ကြောင်း၊ ပိုလီယိုကာကွယ်ဆေး တိုက်ဘူးသည်ဖြစ်စေ၊ မတိုက်ဘူးသည်ဖြစ်စေ ရည်မှန်းသော ကလေးတိုင်းကို ကာကွယ်ဆေး အပိုဆောင်း (၃)ကြိမ်ဆက်တိုက် တစ်ကြိမ်နှင့်တစ်ကြိမ် (၂)ပတ်ခြား၍ တိုက်ကျွေးမည်ဖြစ်ကြောင်း သတင်းရရှိသည်။