ကချင်ပြည်နယ်၊ မိုးညှင်းမြို့နယ်နှင့် မွန်ပြည်နယ်၊ ကျိုက်ထိုမြို့နယ်တို့၌ လိုင်စင်မဲ့ မော်တော်ယာဉ်များ ဖမ်းဆီးအရေးယူ

ကချင်ပြည်နယ်၊ မိုးညှင်းမြို့နယ်နှင့် မွန်ပြည်နယ်၊ ကျိုက်ထိုမြို့နယ်တို့၌ လိုင်စင်မဲ့ မော်တော်ယာဉ်များ ဖမ်းဆီးအရေးယူ

   ၂၀၂၅ ခုနှစ်၊ ဩဂုတ် ၂၄ ရက်က ကချင်ပြည်နယ်၊ မိုးညှင်းမြို့နယ်နှင့် မွန်ပြည်နယ်၊ ကျိုက်ထိုမြို့နယ်တို့၌ လိုင်စင်မဲ့ မော်တော်ယာဉ်များ ဖမ်းဆီးအရေးယူထားကြောင်း သိရသည်။

   ဖြစ်စဉ်မှာ ဩဂုတ် ၂၄ ရက် မွန်းလွဲ ၁၂ နာရီ ၅ မိနစ်တွင် ကချင်ပြည်နယ်၊ မိုးညှင်းမြို့နယ်၊ ဟိုပင်မြို့ဝင်/ထွက်တိုးဂိတ်အနီး ဟိုပင်-မြစ်ကြီးနားသွားကားလမ်းမပေါ်၌ ဟိုပင်နယ်မြေရဲစခန်းမှ တပ်ဖွဲ့ဝင်များပါဝင်သော ပူးပေါင်းအဖွဲ့က မော်တော်ယာဉ်စစ်ဆေးခြင်းများ ဆောင်ရွက်နေစဉ် မိုးညှင်းမြို့မှ မိုးကောင်းမြို့ဘက်သို့ ကချင်ပြည်နယ်၊ မိုးကောင်းမြို့နယ်၊ နောင်ကိုင်တော် ရပ်ကွက်နေ မောင်ရီ(ခ)စိုင်းရီလင်း(၄၆)နှစ် မောင်းနှင်လာသော YGN-19/5K-XXXX MARK II အဖြူရောင်မော်တော်ယာဉ်အား ရပ်တန့်စစ်ဆေးခဲ့ရာ ယာဉ်နှင့်ပတ်သက်သည့် အထောက်အထား တစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ မော်တော်ယာဉ်ဖြစ်ကြောင်း စစ်ဆေးသိရှိရသဖြင့် မောင်ရီ(ခ)စိုင်းရီလင်း အား ဟိုပင်နယ်မြေရဲစခန်း၌လည်းကောင်း။

   အလားတူ နံနက် ၁၁ နာရီ ၄၅ မိနစ်တွင် မွန်ပြည်နယ်၊ ကျိုက်ထိုမြို့နယ်၊ အမှတ်(၇၈) ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များပါဝင်သော ပူးပေါင်းအဖွဲ့က မော်တော်ယာဉ်စစ်ဆေးခြင်းများ ဆောင်ရွက်နေစဉ် မွန်ပြည်နယ်၊ ဘီးလင်းမြို့နယ်၊ ဆင်စုကျေးရွာနေ ပြည့်ဖြိုးကျော်(၂၅)နှစ် မောင်းနှင်လာသည့် MDY-18/3N-XXXX AD VAN မော်တော်ယာဉ်အား ရပ်တန့်စစ်ဆေးခဲ့ရာ ယာဉ်နှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ မော်တော်ယာဉ်ဖြစ်ကြောင်း စစ်ဆေးသိရှိရသဖြင့် ပြည့်ဖြိုးကျော် အား ဘီးလင်းမြို့မရဲစခန်း၌လည်းကောင်း ပို့ကုန်သွင်းကုန်ဥပဒေပုဒ်မ ၈ ဖြင့် အသီးသီးအမှုဖွင့်အရေးယူထားကြောင်း သတင်းရရှိပါသည်။