ကချင်ပြည်နယ်၊ မိုးညှင်းမြို့နယ်၌ ဒီဇယ်ဆီများ တရားမဝင် သယ်ဆောင်လာသူ အမျိုးသား လေးဦးအား ဖမ်းဆီးအရေးယူ

ကချင်ပြည်နယ်၊ မိုးညှင်းမြို့နယ်၌ ဒီဇယ်ဆီများ တရားမဝင် သယ်ဆောင်လာသူ အမျိုးသား လေးဦးအား ဖမ်းဆီးအရေးယူ

   ၂၀၂၅ ခုနှစ်၊ နိုဝင်ဘာ ၂၃ ရက်က ကချင်ပြည်နယ်၊ မိုးညှင်းမြို့နယ်၌ ဒီဇယ်ဆီများ တရားမဝင် သယ်ဆောင်လာသူ အမျိုးသား လေးဦးအား ဖမ်းဆီးအရေးယူထားကြောင်း သိရသည်။

   ဖြစ်စဉ်မှာ နိုဝင်ဘာ ၂၃ ရက် မွန်းလွဲ ၃ နာရီ ၅ မိနစ်တွင် ကချင်ပြည်နယ်၊ မိုးညှင်းမြို့နယ်၊ နန့်စီးအောင်ပူးပေါင်းစစ်ဆေးရေးဂိတ်၌ မိုးညှင်းမြို့နယ်ရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က ယာဉ်စစ်ဆေးခြင်းများ ဆောင်ရွက်နေစဉ် မန္တလေးမြို့မှ မြစ်ကြီးနားမြို့ဘက်သို့ မန္တလေးတိုင်းဒေသကြီး၊ မြစ်သားမြို့နယ်၊ ကူမဲမြို့၊ ကွက်သစ်ရပ်ကွက်နေ ဝေဖြိုးမြင့်(၃၅)နှစ် မောင်းနှင်ပြီး ရှမ်းပြည်နယ်၊ ဟိုပင်မြို့နယ်၊ မြို့မတောင်ရပ်ကွက်နေ ထက်နေလင်း(၂၇)နှစ် လိုက်ပါလာသည့် 9H-XXXX NISSAN အဖြူရောင် ၁၂ ဘီး မော်တော်ယာဉ်ပေါ်မှ GAS အိုး တစ်လုံးလျှင် ဒီဇယ်ဆီ ၁၀ ဂါလန်ခန့်ပါ ၈၀ လုံး၊ စုစုပေါင်း ဒီဇယ်ဆီ ၈၀၀ ဂါလန်ခန့်နှင့် မန္တလေးတိုင်းဒေသကြီး၊ စဥ့်ကူးမြို့နယ်၊ ရှောက်ပင်ရိုးကျေးရွာနေ မျိုးကိုကို(၃၀)နှစ် မောင်းနှင်ပြီး စစ်ကိုင်းတိုင်းဒေသကြီး၊ ကသာမြို့နေ သီဟကျော်မျိုးအေး(၂၅)နှစ် လိုက်ပါလာသည့် 3C-XXXX NISSAN အဖြူရောင် ၁၂ ဘီး မော်တော်ယာဉ်ပေါ်မှ GAS အိုး ၁ လုံးလျှင် ဒီဇယ်ဆီ ၁၀ ဂါလန်ခန့်ပါ ၇၉ လုံး၊ စုစုပေါင်း ဒီဇယ်ဆီ ၇၉၀ ဂါလန်ခန့်တို့အား တရားမဝင် အထောက်အထားမဲ့ သယ်ဆောင်လာသည်ကို တွေ့ရှိဖမ်းဆီး ရမိခဲ့သဖြင့် မျိုးကိုကိုနှင့် သီဟကျော်မျိုးအေးတို့ နှစ်ဦးအား မိုးညှင်းမြို့မရဲစခန်း (ပ)၁၅၇/၂၀၂၅၊ ရေနံနှင့်ရေနံထွက်ဆိုင်ရာဥပဒေပုဒ်မ ၃၇ ဖြင့် လည်းကောင်း၊ ဝေဖြိုးမြင့်နှင့် ထက်နေလင်းတို့ နှစ်ဦးအား မိုးညှင်းမြို့မရဲစခန်း (ပ)၁၅၈/၂၀၂၅၊ ရေနံနှင့်ရေနံထွက်ဆိုင်ရာဥပဒေပုဒ်မ ၃၇ ဖြင့် လည်းကောင်း အသီးသီးအမှုဖွင့်အရေးယူထားကြောင်း သတင်းရရှိပါသည်။