နိုင်ငံ့ဝန်ထမ်းတက္ကသိုလ် (အထက်မြန်မာပြည်) အခြေခံပညာဆရာဆရာမများ အထူးမွမ်းမံသင်တန်း အမှတ်စဉ်(၈၁) သင်တန်းဆင်း

နိုင်ငံ့ဝန်ထမ်းတက္ကသိုလ် (အထက်မြန်မာပြည်) အခြေခံပညာဆရာဆရာမများ အထူးမွမ်းမံသင်တန်း အမှတ်စဉ်(၈၁) သင်တန်းဆင်း

နေပြည်တော် အောက်တိုဘာ ၃၁

အခြေခံပညာဆရာ ဆရာမများ အထူးမွမ်းမံသင်တန်းအမှတ်စဉ် (၈၁) သင်တန်းဆင်းပွဲကို ယနေ့ နံနက် ၈ နာရီတွင် နိုင်ငံ့ဝန်ထမ်းတက္ကသိုလ်(အထက်မြန်မာပြည်)ရတနာခန်းမ၌ကျင်းပရာ ပြည်ထောင်စုရာထူးဝန်အဖွဲ့ဝင်ဦးကျော်မျိုးထွဋ်၊ ပညာရေးဝန်ကြီးဌာနမှ  တာဝန်ရှိသူများ၊ နိုင်ငံ့ဝန်ထမ်းတက္ကသိုလ်(အထက်မြန်မာပြည်) ပါမောက္ခချုပ်၊ ဒုတိယပါမောက္ခချုပ်များ၊ ဖိတ်ကြားထားသည့်ဧည့်သည်တော်များ၊ တက္ကသိုလ်သင်ကြား/ စီမံဌာနများမှ တာဝန်ရှိပုဂ္ဂိုလ်များနှင့် သင်တန်းသားသင်တန်းသူများ တက်ရောက်ကြသည်။

ဦးစွာ ပြည်ထောင်စုရာထူးဝန်အဖွဲ့ဝင် ဦးကျော်မျိုးထွဋ်က ဆရာဆရာမများသည်   နိုင်ငံသားများဖြစ်သည့်အပြင်   နိုင်ငံ့ဝန်ထမ်း တာဝန်ကို ထမ်းဆောင်နေကြသူများဖြစ်သည့်အတွက် နိုင်ငံသားတိုင်းထမ်းဆောင်ရမည့် တာဝန်၊ စောင့်ထိန်းရမည့်  ကျင့်ဝတ်၊ လိုက်နာရမည့်  စည်းကမ်းများ၊ တည်ဆဲဥပဒေများနှင့် ဝန်ထမ်းကျင့်ဝတ်အပါး(၃၀)ကို  စောင့်ထိန်းလိုက်နာပြီး နိုင်ငံ့ဝန်ထမ်းသစ္စာအဓိဋ္ဌာန်(၆)ချက်ကိုဦးထိပ်ပန်ဆင်ကာ ပါတီနိုင်ငံရေးကင်းရှင်းကြရန်နှင့် “နိုင်ငံတော်ဖွံ့ဖြိုးဖို့ ပညာရေးကို အားပေးစို့” ဆိုသည့်ဆောင်ပုဒ်နှင့်အညီ  နိုင်ငံတော် ဖွံ့ဖြိုးတိုးတက်ရန် ပညာတတ်လူသားအရင်းအမြစ်ကောင်းများပေါ်ထွန်းရေး ဝိုင်းဝန်းပူးပေါင်းဆောင်ရွက်သွားကြရန်တိုက်တွန်းမှာကြားသည်။

အဆိုပါသင်တန်းသို့ ပညာရေးဝန်ကြီးဌာနမှသင်တန်းသား ၉၃ ဦး၊ သင်တန်းသူ ၃၇၉ ဦး စုစုပေါင်း  ၄၇၂ ဦး  တက်ရောက်ခဲ့ကြပြီး သင်တန်းကာလမှာ ရက်သတ္တငါးပတ်ကြာမြင့်ခဲ့ကြောင်း သိရသည်။

သတင်းစဉ်