နေပြည်တော်ကောင်စီနယ်မြေအတွင်းရှိ ရေလွှဲဆည်၊ ရေလှောင်ကန်နှင့် ဆက်စပ်ရေအားအဆောက်အအုံများ၏ ကြံ့ခိုင်မှုအခြေအနေ ကြည့်ရှုစစ်ဆေး

နေပြည်တော်ကောင်စီနယ်မြေအတွင်းရှိ ရေလွှဲဆည်၊ ရေလှောင်ကန်နှင့် ဆက်စပ်ရေအားအဆောက်အအုံများ၏ ကြံ့ခိုင်မှုအခြေအနေ ကြည့်ရှုစစ်ဆေး

နေပြည်တော် သြဂုတ် ၂၈

စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်နှင့် အဖွဲ့သည် ယနေ့နံနက်ပိုင်းက တိုင်ဖွန်းမုန်တိုင်းကဂျိကိ (KAJIKI) ၏ အရှိန်ကြောင့် မိုးရွာသွန်းမှုများပြားခဲ့သဖြင့် နေပြည်တော်ကောင်စီနယ်မြေအတွင်းရှိ ရေလွှဲဆည်၊ ရေလှောင်ကန်နှင့် ဆက်စပ်ရေအား အဆောက်အအုံများ၏ ကြံ့ခိုင်မှုအခြေအနေကို ကြည့်ရှုစစ်ဆေးသည်။

ဦးစွာ ဒုတိယဝန်ကြီးနှင့် အဖွဲ့သည် ပျဉ်းမနားမြို့နယ်ရှိ ပေါင်းလောင်းရေလွှဲဆည်သို့ ရောက်ရှိပြီး လက်ရှိရေကျော်ကျစီးဆင်းသည့် ပမာဏသည် ၄ ဒသမ ၅ ပေအထိသာရှိပြီး ရာဂီမုန်တိုင်းတိုက်ခတ်စဉ်က ၁၁ ဒသမ ၈ ပေအထိ ရေကျော်ခဲ့သည့်အတွက် ယခုရေကျော်ကျစီးဆင်းမှုပမာဏ များပြားမှုမရှိသော်လည်း ရေလွှဲဆည်ကြံ့ခိုင်မှုအား (၂၄) နာရီ တာဝန်ချထားရန်၊ ဌာနမှ ထုတ်ပြန်ထားသည့် မျက်မြင်စစ်ဆေးတွေ့ရှိမှု၊ တိုင်းတာစစ်ဆေးမှုလုပ်ထုံးလုပ်နည်းများနှင့်အညီ စစ်ဆေးဆောင်ရွက်ကြရန် မှာကြားသည်။

ယင်းနောက် ငလျင်ဒဏ်ကြောင့် ထိခိုက်ခဲ့သည့် မဒန်းဆည်ရေသောက်စနစ်နှင့် ချောင်းမငယ်ဆည်ရေသောက်စနစ်အတွင်းရှိ ရေပေးမြောင်း၊ ရေနုတ်မြောင်းနှင့် ရေပေးအဆောက်အအုံများ ပြန်လည်ပြုပြင်ဆောင်ရွက်ပြီးစီးမှုကို ကြည့်ရှုစစ်ဆေးပြီး ဆက်လက်ပြုပြင်ရန်ကျန်ရှိသည့် လုပ်ငန်းများကို မူလဒီဇိုင်းပုံစံအတိုင်း သတ်မှတ်စံချိန်စံညွှန်းများနှင့်အညီ အရည်သွေးပြည့်မီစွာ ဆောင်ရွက်နိုင်ရေး၊ လျာထားစိုက်ဧကများအတိုင်း ပြည့်မီစွာ စိုက်ပျိုးရေပေးဝေနိုင်ရေးကြိုးစားဆောင်ရွက်ကြရန်နှင့် မိုးရေချိန် များပြားစွာရွာသွန်းလာပါက ရေကြီးနစ်မြုပ်မှုမဖြစ်ပေါ်စေရေး ကြိုတင်စီမံဆောင်ရွက်ထားရန် ဆွေးနွေးမှာကြားသည်။

ထိုမှတစ်ဆင့် လယ်ဝေးမြို့နယ် ကြို့ပင်ကျေးရွာအနီးရှိ ဆင်အုံကန်သို့ ရောက်ရှိပြီး ဒုတိယဝန်ကြီးက ရေလှောင်ကန်၏ ရေပြည့်မှတ်အထက်တွင် ရောက်ရှိနေသောကြောင့် ရေလှောင်ကန်ထိန်းသိမ်းရေး လုပ်ထုံးလုပ်နည်းများနှင့်အညီ အထူးဂရုပြုဆောင်ရွက်ကြရန်နှင့် အချိန်နှင့်တစ်ပြေးညီ စောင့်ကြည့်စစ်ဆေးကြရန် မှာကြားခဲ့ကြောင်း သိရသည်။

သတင်းစဉ်