ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ်နှင့် ပဲခူးတိုင်းဒေသကြီး၊ နတ်တလင်းမြို့နယ်တို့၌ နှစ်လုံး/သုံးလုံးထီ လောင်းကစားပြုလုပ်သူများအား ဖမ်းဆီးအရေးယူ

ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ်နှင့် ပဲခူးတိုင်းဒေသကြီး၊ နတ်တလင်းမြို့နယ်တို့၌ နှစ်လုံး/သုံးလုံးထီ လောင်းကစားပြုလုပ်သူများအား ဖမ်းဆီးအရေးယူ

   ၂၀၂၅ ခုနှစ်၊ နိုဝင်ဘာ ၁၉ ရက်က ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ်နှင့် ပဲခူးတိုင်းဒေသကြီး၊ နတ်တလင်းမြို့နယ်တို့၌ နှစ်လုံး/သုံးလုံးထီ လောင်းကစားပြုလုပ်သူများအား ဖမ်းဆီးအရေးယူထားကြောင်း သိရသည်။

    ဖြစ်စဉ်မှာ နိုဝင်ဘာ ၁၉ ရက် မွန်းလွဲ ၃ နာရီ ၃၀ မိနစ်တွင် ပြည်ထောင်စုနယ်မြေ၊ နေပြည်တော်၊ လယ်ဝေးမြို့နယ်၊ အေလာမြို့၊ ရွာမရပ်ကွက်အတွင်း လမ်းဘေး၌ ချောင်းခွကျေးရွာနေ ကျော်ဇင်ဦး(ခ)သုည(၄၄)နှစ်သည် နှစ်လုံးထီ ရောင်းချနေကြောင်း သတင်းအရ အေလာနယ်မြေရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ ၎င်းအား နှစ်လုံးထီရောင်းချရာတွင် အသုံးပြုသည့် ဆက်စပ်ပစ္စည်းများ၊ လောင်းကြေးငွေ ၁၀၃,၀၀၀ ကျပ်တို့နှင့်အတူ တွေ့ရှိဖမ်းဆီးရမိခဲ့သဖြင့် ကျော်ဇင်ဦး(ခ)သုည အား အေလာနယ်မြေရဲစခန်း (ပ)၅၇/၂၀၂၅၊ လောင်းကစားဥပဒေ ပုဒ်မ ၁၈(က)/ ၁၉(က)ဖြင့် လည်းကောင်း။

    အလားတူ ညနေ ၄ နာရီ ၃၀ မိနစ်တွင် ပဲခူးတိုင်းဒေသကြီး၊ နတ်တလင်းမြို့နယ်၊ ငှက်ကုန်းကျေးရွာနေ မဆုမြတ်မွန်(၂၅)နှစ်၏ နေအိမ်၌ နှစ်လုံးထီ ရောင်းချနေကြောင်း သတင်းအရ နတ်တလင်းမြို့မရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ နေအိမ်အောက်ထပ်ရှိ ကွပ်ပျစ်ပေါ်၌ ၎င်းအား နှစ်လုံးထီရောင်းချရာတွင် အသုံးပြုသည့် ဆက်စပ်ပစ္စည်းများ၊ လောင်းကြေးငွေ ၁၅၁,၄၀၀ ကျပ်တို့နှင့်အတူ တွေ့ရှိဖမ်းဆီးရမိခဲ့သဖြင့် ဆုမြတ်မွန် အား နတ်တလင်းမြို့မရဲစခန်း (ပ)၁၃၈/၂၀၂၅၊ လောင်းကစားဥပဒေပုဒ်မ ၁၈(က)ဖြင့် လည်းကောင်း။ 

   ထို့အတူ ညနေ ၅ နာရီ ၁၀ မိနစ်တွင် နတ်တလင်းမြို့နယ်၊ ညောင်ပင်ကုန်းကျေးရွာနေ ဒေါ်စန္ဒာဝင်း(ခ)မဖြူ(၅၀)နှစ်၏နေအိမ်၌ နှစ်လုံး/သုံးလုံးထီ ရောင်းချနေကြောင်း သတင်းအရ တာပွန်နယ်မြေရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ ၎င်းအား နေအိမ်ရှေ့ခန်း၌ နှစ်လုံး/သုံးလုံးထီ ရောင်းချရာတွင် အသုံးပြုသည့် ဆက်စပ်ပစ္စည်းများ၊ လောင်းကြေးငွေ ၅၂,၂၀၀ ကျပ်တို့နှင့်အတူ တွေ့ရှိဖမ်းဆီးရမိခဲ့သဖြင့် စန္ဒာဝင်း(ခ)မဖြူ အား တာပွန်နယ်မြေရဲစခန်း (ပ)၇၆/၂၀၂၅၊ လောင်းကစားဥပဒေပုဒ်မ ၁၈(က)ဖြင့်လည်းကောင်း အသီးသီး အမှုဖွင့်အရေးယူထားကြောင်း သတင်းရရှိပါသည်။