မြန်မာ့ဆိပ်ကမ်းအာဏာပိုင်ပြခန်းကို လာရောက်လေ့လာသူများအနေဖြင့် သမိုင်းကြောင်းတစ်ခုလုံးကို တစ်ခဏအတွင်း လေ့လာခွင့်ရရှိနိုင်

မြန်မာ့ဆိပ်ကမ်းအာဏာပိုင်ပြခန်းကို လာရောက်လေ့လာသူများအနေဖြင့် သမိုင်းကြောင်းတစ်ခုလုံးကို တစ်ခဏအတွင်း လေ့လာခွင့်ရရှိနိုင်

ရန်ကုန် ဇန်နဝါရီ ၉

၁၇၅၅ ခုနှစ် အလောင်းမင်းတရားကြီး ဦးအောင်ဇေယျ ဒဂုံကိုသိမ်းပိုက်ပြီး ရန်အပေါင်းကုန်စင်သော ရန်ကုန်ဟုခေါ်ဝေါ်သမုတ်ခဲ့သည့်အချိန်မှစ၍ တံငါရွာလေးအဖြစ်မှ မြန်မာနိုင်ငံ၏ အဓိကနိုင်ငံတကာကုန်သွယ်မှုဆိပ်ကမ်းမြို့အဖြစ်သို့ပြောင်းလဲခဲ့ပြီး ရန်ကုန်ဆိပ်ကမ်းနှင့်အတူ ခေတ်အဆက်ဆက်ဖြတ်သန်းကာ ဖြစ်ပေါ်တိုးတက်လာခဲ့သော မြန်မာ့ဆိပ်ကမ်းအာဏာပိုင်၏ သမိုင်းကြောင်းဆိုင်ရာအချက်အလက်များနှင့် လုပ်ငန်းဆောင်ရွက်မှုမှတ်တမ်းများကို ထိန်းသိမ်းပြသနိုင်ရန်ရည်ရွယ်ချက်ဖြင့် ဆောင်ရွက်ခဲ့သည့် မြန်မာ့ဆိပ်ကမ်းအာဏာပိုင်ပြခန်းကို ယနေ့နံနက်ပိုင်းတွင် မြန်မာ့ဆိပ်ကမ်းအာဏာပိုင်ရုံးချုပ်၌ ဖွင့်လှစ်သည်။

တက်ရောက်

အခမ်းအနားသို့ ပြည်ထောင်စုဝန်ကြီး ဦးမြထွန်းဦး၊ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ ရန်ကုန်တိုင်းဒေသကြီးဝန်ကြီးများ၊ ပို့ဆောင်ရေးနှင့်ဆက်သွယ်ရေးဝန်ကြီးဌာန အမြဲတမ်းအတွင်းဝန်နှင့်တာဝန်ရှိသူများ၊ မြန်မာ့ဆိပ်ကမ်းအာဏာပိုင်မှဝန်ထမ်းများနှင့် ဖိတ်ကြားထားသူများ တက်ရောက်ကြသည်။

လေ့လာခွင့်ရရှိနိုင်မည်

အခမ်းအနားတွင် ပြည်ထောင်စုဝန်ကြီးက မြန်မာ့ဆိပ်ကမ်းအာဏာပိုင်သည် ရန်ကုန်မြို့ စတင်တည်ဆောက်ခြင်းနှင့်အတူ ယှဉ်တွဲပေါ်ပေါက်လာခဲ့ပြီး သမိုင်းကြောင်းရှည်လျားသည့် ဌာနကြီးတစ်ခုဖြစ်ကြောင်း၊ ခေတ်အဆက်ဆက် နိုင်ငံတော်၏စီးပွားရေးမူဝါဒနှင့်အညီ နိုင်ငံတော်နှင့် ပြည်သူဘက်မှရပ်တည်ပြီး ဆိပ်ကမ်းလုပ်ငန်းများ စဉ်ဆက်မပြတ် ဖွံ့ဖြိုးတိုးတက်အောင် အကောင်အထည်ဖော်ဆောင်ရွက်လာခဲ့ကြောင်း၊ ဖြတ်သန်းလာခဲ့ သည့် သမိုင်းကြောင်းပုံရိပ်များကို စာပေမှတ်တမ်းအဖြစ်မှ ပြခန်းအဖြစ် စုစည်းတင်ပြနိုင်ရန် ယနေ့မြန်မာ့ဆိပ်ကမ်းအာဏာပိုင်ပြခန်းကို ဖွင့်လှစ်နိုင်ခဲ့ပြီဖြစ်သည့်အတွက် လာရောက်ကြည့်ရှု လေ့လာသူများအနေဖြင့် မြန်မာ့ဆိပ်ကမ်းအာဏာပိုင်၏ ဖြစ်ပေါ် တိုးတက်မှု သမိုင်းကြောင်းတစ်ခုလုံးကို တစ်ခဏအတွင်း သိမြင်လေ့လာခွင့် ရရှိနိုင်မည်ဖြစ်ကြောင်း၊ သမိုင်းရှိသော်လည်း သမိုင်းတွင်အောင် သမိုင်းမတင်နိုင်လျှင် သမိုင်းသည်တန်ဖိုးမဲ့တတ်ကြောင်း၊ သမိုင်းသည် ပကတိအရှိတရားဖြစ်ပြီး စီးပွားရေးသည် တွေးတောယူဆချက်ဟု ပညာရှိများက အဆိုအမိန့်ပြုခဲ့ကြောင်း၊ သမိုင်းကို လေ့လာခြင်းဖြင့် အနာဂတ်ခရီးအတွက် သဘောထားအမြင်များကို ရရှိနိုင်မည်ဖြစ်ကြောင်း၊ ယနေ့ဖွင့်လှစ်သည့်ပြခန်းသည် နောင်မျိုးဆက်သစ်များအတွက် ကောင်းမြတ်သည့် အမွေအနှစ်များ လက်ဆင့်ကမ်းပေးစွမ်းနိုင်မည်ဖြစ်သည့်အတွက် ပြခန်းဖြစ်မြောက်အောင် စီစဉ်ဆောင်ရွက်သည့် မြန်မာ့ဆိပ်ကမ်းအာဏာပိုင်မှ တာဝန်ရှိသူများ၊ အရာထမ်း၊ အမှုထမ်းများအားလုံးကို ကျေးဇူးတင်ရှိပါကြောင်း၊ အခြားဌာနများအနေဖြင့်လည်း ဌာနအလိုက် အစဉ်လာကောင်းများကို အားပေးဖော်ဆောင်ပေးခြင်းဖြင့် မိမိတို့ဌာနများ၏ ကောင်းရာကောင်းကျိုးအတွက် ကြိုးပမ်းဆောင်ရွက်သွားကြရန် တိုက်တွန်းပြောကြားသည်။

အမွှေးနံ့သာရည်များပက်ဖျန်း

ဆက်လက်၍ မြန်မာ့ဆိပ်ကမ်းအာဏာပိုင်ပြခန်းကို ရန်ကုန်တိုင်းဒေသကြီးဝန်ကြီးချုပ်နှင့် မြန်မာ့ဆိပ်ကမ်းအာဏာပိုင် ဦးဆောင်ညွှန်ကြားရေးမှူးတို့က ဖဲကြိုးဖြတ်ဖွင့်လှစ်ပေးပြီး ပြည်ထောင်စုဝန်ကြီးက စက်ခလုတ်နှိပ်၍ မြန်မာ့ဆိပ်ကမ်းအာဏာပိုင် ပြခန်းဆိုင်းဘုတ်ကို ဖွင့်လှစ်ပေးကာ ပြခန်းဖွင့်ပွဲအထိမ်းအမှတ် ကမ္ပည်းမော်ကွန်းကို ပြည်ထောင်စု ဝန်ကြီးနှင့် ရန်ကုန်တိုင်းဒေသကြီး ဝန်ကြီးချုပ်တို့က အမွှေးနံ့သာရည်များပက်ဖျန်းပေးသည်။

ထို့နောက် ပြည်ထောင်စုဝန်ကြီးနှင့် ဧည့်သည်တော်ကြီးများကို ပြခန်းအတွင်း မြန်မာ့ဆိပ်ကမ်းအာဏာပိုင် ဦးဆောင်ညွှန်ကြားရေးမှူးနှင့် တာဝန်ရှိသူများက လိုက်လံပြသရှင်းလင်းတင်ပြသည်။

ယင်းနောက် ပြည်ထောင်စုဝန်ကြီးသည် သက်ဆိုင်ရာဌာနများမှ တာဝန်ရှိသူများနှင့်အတူ ဆူးလေဆိပ်ကမ်းတံတားတွင် Weight Bridge တပ်ဆင်၍ လုပ်ငန်းဆောင်ရွက်ခြင်း၊ ဆိပ်ကမ်းတံတားပြုပြင်မွမ်းမံခြင်းလုပ်ငန်းများကို ကြည့်ရှုစစ်ဆေးပြီး ရေယာဉ်ဖြင့် ရန်ကုန်တိုင်းဒေသကြီး ဒလမြို့နယ် ဆာပါချောင် ဒေသ၊ တွံတေးတူးမြောင်း တစ်လျှောက်ရှိ ဆိပ်ခံတံတားများ၊ ရေယာဉ်များ ဝင်ထွက်သွားလာနေမှုအခြေအနေများ၊ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေးဦးစီးဌာနမှ အကောင်အထည်ဖော်ဆောင်ရွက်မည့် တွံတေးတူးမြောင်းဖွံ့ဖြိုးရေး စီမံကိန်းနေရာနှင့် တွံတေးတူးမြောင်း ၃ ဒသမ ၅ မိုင်၊ လက်ပံကုန်း အကောက်စခန်းတို့ကို သွားရောက်ကြည့်ရှုစစ်ဆေးသည်။

ဆက်လက်၍ လက်ပံကုန်းအကောက်စခန်းတွင် တာဝန်ရှိသူများ၏ ရှင်းလင်းတင်ပြချက်များအပေါ် ပြည်ထောင်စုဝန်ကြီးက လက်ပံကုန်းအကောက်စခန်းမှ လျာထားချက်ပြည့်မီစေရေး အလေးထားဆောင်ရွက်ရန်၊ ဝန်ထမ်းအိမ်ရာများပြင်ဆင်ရန်၊ သန့်ရှင်းသာယာလှပရေး ဆောင်ရွက်ရန်နှင့် ကိုရီးယားနိုင်ငံချေးငွေဖြင့် ဆောင်ရွက်လျက်ရှိသည့် တွံတေးတူးမြောင်း ဖွံ့ဖြိုးတိုးတက် ရေးစီမံကိန်း အမြန်ဆုံးအကောင် အထည်ဖော်ဆောင်ရွက်ရန် မှာကြားခဲ့ကြောင်း သိရသည်။

သတင်းစဉ်