မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ် -၂၀၂၅ ကျင်းပ မြန်မာနိုင်ငံ၏ အခန်းကဏ္ဍအပေါ် လူငယ်များအမြင်၊ မြန်မာကို နိုင်ငံတကာသို့ ဖော်ထုတ်တင်ပြရေး၊ လူငယ်နှင့်ဒေသဆိုင်ရာ ပူးပေါင်းဆောင်ရွက်မှု၊ ငြိမ်းချမ်းရေးနှင့်တည်ငြိမ်ရေးအတွက် လူငယ်တို့၏ အခန်းကဏ္ဍ၊ ကမ္ဘာ့စိန်ခေါ်မှုများနှင့် လူငယ်များ၏ဖြေရှင်းမှု ခေါင်းစဉ်များဖြင့် အဖွဲ့များခွဲ၍ ဆွေးနွေး

မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ် -၂၀၂၅ ကျင်းပ မြန်မာနိုင်ငံ၏ အခန်းကဏ္ဍအပေါ် လူငယ်များအမြင်၊ မြန်မာကို နိုင်ငံတကာသို့ ဖော်ထုတ်တင်ပြရေး၊ လူငယ်နှင့်ဒေသဆိုင်ရာ ပူးပေါင်းဆောင်ရွက်မှု၊ ငြိမ်းချမ်းရေးနှင့်တည်ငြိမ်ရေးအတွက် လူငယ်တို့၏ အခန်းကဏ္ဍ၊ ကမ္ဘာ့စိန်ခေါ်မှုများနှင့် လူငယ်များ၏ဖြေရှင်းမှု ခေါင်းစဉ်များဖြင့် အဖွဲ့များခွဲ၍ ဆွေးနွေး

ရန်ကုန် ဩဂုတ် ၃၀

နိုင်ငံတကာရေးရာ၊ ပထဝီနိုင်ငံရေး၊ အမျိုးသားမဟာဗျူဟာနှင့်ပတ်သက်သည့် အခြေခံဗဟုသုတ များရရှိစေရန်၊ လူငယ်များအကြားခေါင်းဆောင်မှု၊ စူးစမ်းစဉ်းစားနိုင်မှုနှင့် လူမှုဆက်ဆံရေး ကျွမ်းကျင်မှုအရည်အချင်းများမြှင့်တင်ရန်၊ ဖိုရမ်တွင်အပြန်အလှန်ဆွေးနွေး ပြောဆိုမှုများမှတစ်ဆင့် ပူးပေါင်း ဆောင်ရွက်မှု၊ ဆွေးနွေးနှီးနှောမှုနှင့် ပြည်သူ့နီတိထိတွေ့ဆက်ဆံမှုများတိုးမြှင့်ရန်၊ မြန်မာနိုင်ငံ ဖွံ့ဖြိုးတိုးတက်ရေးအတွက် ဖြစ်ပေါ်လာမည့် အနာဂတ်လမ်းကြောင်းများကို လူငယ်များကိုယ်တိုင် ရှုမြင်အဆိုပြုနိုင်စွမ်းမြှင့်တင်ရန်နှင့် အနာဂတ်တွင်ဆောင်ရွက်ကြမည့် အမျိုးသားအဆင့်နှင့် ဒေသဆိုင်ရာအဆင့် လုပ်ငန်းအစီအစဉ်များအတွက် တက်ကြွသည့် ဖိုရမ်ဆင်းလူငယ်ကွန်ရက်ကို ဖန်တီးပေးရန်ဟူသည့် ရည်ရွယ်ချက်ငါးရပ်ဖြင့် မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ်-၂၀၂၅ ကို ယနေ့တွင် ရန်ကုန်မြို့ရှိ မြန်မာကွန်ဗင်းရှင်းစင်တာ (MCC) ၌ ကျင်းပသည်။

အခမ်းအနားသို့ မြန်မာ့အနာဂတ်မျက်နှာစာ လူငယ်မဟာဗျူဟာဖိုရမ်ကျင်းပရေးဦးစီးကော်မတီ ဒုတိယဥက္ကဋ္ဌ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ ဒုတိယဝန်ကြီး ဦးဇင်မင်းထက်၊ တိုင်းဒေသကြီးနှင့် ပြည်နယ်ဝန်ကြီးများ၊ ဌာနဆိုင်ရာတာဝန်ရှိသူများ၊ မြန်မာ့ပုံရိပ် ဖော်ညွှန်းရေးအဖွဲ့ ဥက္ကဋ္ဌနှင့် အဖွဲ့ဝင်များ၊ ပြည်ပပညာရှင်များ၊ တိုင်းဒေသကြီးနှင့်ပြည်နယ်များမှ လူငယ်များ၊ ကျောင်းသား ကျောင်းသူများ တက်ရောက်ကြသည်။

ဆွေးနွေးပွဲတွင် တိုင်းဒေသကြီးနှင့် ပြည်နယ်များမှ လူငယ်ကျောင်းသား ကျောင်းသူများက “မြန်မာနိုင်ငံအတွက် ကျွန်ုပ်၏ စိတ်ကူးအိပ်မက်” ခေါင်းစဉ်ဖြင့် Energizer Quiz များကို ပါဝင် ဖြေကြားကြသည်။

ထို့နောက် အိန္ဒိယနိုင်ငံမှ မဟာဗျူဟာရေးရာလေ့လာသုံးသပ်သူ Mr. Atul Aneja က “ပြောင်းလဲနေသော ကမ္ဘာနှင့် မြန်မာ-ပထဝီနိုင်ငံရေး” ခေါင်းစဉ်ဖြင့် ဆွေးနွေးရာတွင် ဗဟုဝင်ရိုးဖြစ်ပေါ်လာပုံ၊ ဒီမိုကရေစီ Ideology များ၊ အယူဝါဒရေးရာများ၊ Francis Fukuyama ၏ The End of History And The Last Man စာအုပ်ပါအယူအဆများ၊ ကမ္ဘာကြီးအနေဖြင့် World State အဖြစ် ပြောင်းလဲလာလျက်ရှိပုံ၊ လက်ရှိကမ္ဘာ့နိုင်ငံရေးအခြေအနေ၊ ပထဝီနိုင်ငံရေးအရအယူဝါဒရေးရာများ ပြောင်းလဲလာပုံနှင့် မဟာဗျူဟာများပေါ်ပေါက်လာပုံ၊ မဟာဗျူဟာများပြောင်းလဲလာမှုအရ အချုပ်အခြာအာဏာပိုင် နိုင်ငံများအပေါ်သက်ရောက်မှုများ၊ အရှေ့အလယ်ပိုင်းဒေသ၏ ပထဝီနိုင်ငံရေးအခြေအနေ၊ ခေတ်သစ်ကိုလိုနီဝါဒပြုမှုများ၊ ကမ္ဘာ့ပထဝီ နိုင်ငံရေးအပေါ် လွှမ်းမိုးမှုရှိသော နိုင်ငံရေးပညာရှင်များ၊ Multi Civilization အဖြစ်ပြောင်းလဲလာသည့် ကမ္ဘာ၊ ဗဟုဝင်ရိုးကမ္ဘာကြီးပေါ်မှ မြန်မာ့နိုင်ငံရေး စသည့် အကြောင်းအရာများကို သုံးသပ်ဆွေးနွေးသည်။

ဆွေးနွေးသုံးသပ်ချက်များနှင့်စပ်လျဉ်း၍ လူငယ်ကျောင်းသား ကျောင်းသူများက ဗဟုဝင်ရိုးကမ္ဘာနိုင်ငံရေးအဖြစ် ပြောင်းလဲလာမှုမှ မြန်မာနိုင်ငံအနေဖြင့် ရရှိနိုင်မည့်အကျိုးကျေးဇူးများ၊ မြန်မာ၊ ရုရှား၊ တရုတ်၊ အိန္ဒိယ ပူးပေါင်းဆောင်ရွက်မှု ပုံစံသစ်၊ အချုပ်အခြာအာဏာပိုင်နိုင်ငံတစ်ခုအတွက် လိုအပ်ချက်များ၊ အင်အားများ၊ လက်ရှိကမ္ဘာ့နိုင်ငံရေးအခြေအနေပြောင်းလဲမှု၊ မြန်မာနိုင်ငံအပေါ် ကမ္ဘာ့အယူဝါဒ ရေးရာလွှမ်းမိုးမှုများ၊ မြန်မာနိုင်ငံနှင့်ကိုက်ညီသည့် ကမ္ဘာ့အယူဝါဒရေးရာများကို ထုတ်နုတ်အသုံး ပြုနိုင်ရေးစသည့် အကြောင်းအရာများကို မေးခွန်းများ မေးမြန်းဆွေးနွေးကြသည်။

ယင်းနောက် Mr. Atul Aneja က “မြန်မာ၊ ပထဝီနိုင်ငံရေးနှင့် ဗဟုဝင်ရိုးကမ္ဘာ” ခေါင်းစဉ်ဖြင့် ဆွေးနွေးရာတွင် မြန်မာနိုင်ငံ၏ အိမ်နီးချင်းနိုင်ငံများဖြစ်သည့် အိန္ဒိယနှင့် တရုတ်နိုင်ငံတို့၏ Civilization ဆိုင်ရာအားသာချက်များ၊ ပေါင်းကူးနိုင်ငံအဖြစ်တည်ရှိနေမှု၊ မြန်မာ့ဒီမိုကရေစီအသွင်ကူးပြောင်းမှုနှင့် ပါတီစုံဒီမိုကရေစီအထွေထွေရွေးကောက်ပွဲ အောင်မြင်စွာကျင်းပနိုင်ရေး ဆောင်ရွက်ထားသင့်သည့် အခြေအနေ၊ ကမ္ဘာ့နိုင်ငံရေးအပြောင်း အလဲများပြားသော ကာလဖြစ်သည့်အတွက် မြန်မာနိုင်ငံ၏ ရွေးကောက်ပွဲအပေါ် သက်ရောက်လာနိုင်မှု၊ ပွင့်လင်းမြင်သာသည့် ရွေးကောက်ပွဲဖြစ်စေရန် နိုင်ငံတကာမှ ရွေးကောက်ပွဲစောင့်ကြည့် လေ့လာရေးအဖွဲ့များ ဖိတ်ခေါ်နိုင်ရေး၊ မြန်မာနိုင်ငံ၌ ပြည်တွင်းပဋိပက္ခများ တည်ရှိနေသော်လည်း ဖွံ့ဖြိုးမှုအခွင့်အလမ်းများစွာလည်း ရှိနေသည့်အတွက် စုပေါင်းအင်အားဖြင့် ပဋိပက္ခများကို ကျော်လွှားပြီး ခိုင်မာအားကောင်းသည့် နိုင်ငံတစ်ခုအဖြစ် ဖော်ဆောင်ရေး၊ ဖွံ့ဖြိုးမှုအခွင့်အလမ်းများအတွက် အိမ်နီးချင်းနိုင်ငံများ၊ အာရှဒေသတွင်း နိုင်ငံများနှင့် ကူးလူးဆက်နွှယ်မှု ပိုမိုတိုးမြှင့်လုပ်ဆောင်ရေး၊ စီးပွားရေးစင်္ကြံများဖော်ဆောင်ရေး၊ မြန်မာနိုင်ငံအနေဖြင့် တန်ဖိုးကြီးမားသော သယံဇာတများနှင့် အလားအလာများစွာရှိသော လူငယ်လူသားအရင်းအမြစ်များ ပိုင်ဆိုင်ထားသည့်အတွက် ဖွံ့ဖြိုးရေးလုပ်ငန်းစဉ်များအတွက် အကျိုးရှိထိရောက်စွာ အသုံးချဆောင်ရွက်နိုင်ရေးတို့နှင့်စပ်လျဉ်း၍ သုံးသပ်ဆွေးနွေးသည်။

ဆွေးနွေးသုံးသပ်ချက်များအပေါ် လူငယ်ကျောင်းသား ကျောင်းသူများက မြန်မာနိုင်ငံသည် ပထဝီနိုင်ငံရေးအရ မဟာဗျူဟာမြောက်တည်ရှိနေသည့်အတွက် ဖော်ဆောင်သွားနိုင်မည့်အခွင့်အလမ်းများ၊ အဓိကထား ဖော်ဆောင်သင့်သည့် စီးပွားရေးကဏ္ဍ၊ လူငယ်များ ဦးဆောင်ပါဝင်နိုင်မည့် ဖွံ့ဖြိုးရေးလုပ်ငန်း စဉ်များ၊ မြန်မာနိုင်ငံမှ လူငယ်များနှင့် ဒေသတွင်းနိုင်ငံများမှ လူငယ်များအကြား ချိတ်ဆက်ဆောင်ရွက်မှု ပိုမိုမြှင့်တင်နိုင်ရေး၊ ဗဟုဝင်ရိုးနိုင်ငံရေးအခြေအနေအရ ရုရှား၊ တရုတ်၊ အိန္ဒိယနိုင်ငံတို့နှင့် ဆက်သွယ်ဆက်ဆံမှုတိုးမြှင့်ရေး၊ လူငယ်ကဏ္ဍဖွံ့ဖြိုးတိုးတက်ရေးအတွက် ကိုယ်စွမ်းဉာဏ်စွမ်းရှိသည့် လူငယ်များဖြစ်စေရန် စွမ်းဆောင်ရေး၊ ယှဉ်ပြိုင်မှုပုံစံမျိုး မဟုတ်ဘဲ အတူလက်တွဲ ပူးပေါင်းဆောင်ရွက်သည့်ပုံစံဖြင့် နိုင်ငံရေးအခွင့်အလမ်းများ ဖန်တီးရေးစသည့် အကြောင်းအရာများကို မေးခွန်းများမေးမြန်းဆွေးနွေးကြသည်။

ဆက်လက်၍ တိုင်းဒေသကြီးဝန်ကြီးချုပ်က ပြည်ပပညာရှင်များဖြစ်သည့် အိန္ဒိယနိုင်ငံမှ မဟာဗျူဟာရေးရာ လေ့လာသုံးသပ်သူ Mr. Atul Aneja၊ ဆွစ်ဇာလန်နိုင်ငံ (SUPDI)မှ တွဲဖက်ပါမောက္ခ Mr. Lorenzo Maria Pacini နှင့် Anteo Edizioni Publishing House Italy မှ ဒါရိုက်တာ Mr. Stefano Bonilauri တို့ကို ဂုဏ်ပြုလက်ဆောင်ပေးအပ်သည်။

ထို့နောက် ပြောင်းလဲနေသော ကမ္ဘာ့အစီအစဉ်တွင် မြန်မာနိုင်ငံ၏ အခန်းကဏ္ဍအပေါ် လူငယ်များအမြင်၊ လူငယ်များဦးဆောင်သည့် ယဉ်ကျေးမှုနှင့်တီထွင်ဆန်းသစ်မှုများမှတစ်ဆင့် မြန်မာကိုနိုင်ငံတကာသို့ ဖော်ထုတ်တင်ပြရေး၊ လူငယ်နှင့် ဒေသဆိုင်ရာ ပူးပေါင်းဆောင်ရွက်မှု၊ ငြိမ်းချမ်းရေးနှင့်တည်ငြိမ်ရေးအတွက် လူငယ်တို့၏ အခန်းကဏ္ဍ၊ ကမ္ဘာ့စိန်ခေါ်မှုများနှင့် လူငယ်များ၏ ဖြေရှင်းမှုများ စသည့် ခေါင်းစဉ်များကို အဖွဲ့များခွဲ၍ဆွေးနွေးကြသည်။

ယင်းနောက် အဖွဲ့များမှ လူငယ်ကိုယ်စားလှယ်တစ်ဦးစီက ခေါင်းစဉ်အလိုက် ဆွေးနွေးသုံးသပ်ချက်များကို ပြန်လည်စုစည်းတင်ပြပြီး ရန်ကုန်တိုင်းဒေသကြီး လူငယ်ရေးရာကော်မတီဒုတိယဥက္ကဋ္ဌ ၊ တိုင်းဒေသကြီး လူမှုရေးရာဝန်ကြီးက နိဂုံးချုပ်အမှာစကားပြောကြားသည်။

ဆက်လက်၍ မြန်မာ့ပုံရိပ်ဖော်ညွှန်းရေးအဖွဲ့ဥက္ကဋ္ဌက အနှစ်ချုပ်သုံးသပ်တင်ပြပြီး တိုင်းဒေသကြီးလူမှုရေးရာဝန်ကြီးနှင့် တာဝန်ရှိသူများက လူငယ်အဖွဲ့များအား ဆုများပေးအပ်ချီးမြှင့်သည်။

မြန်မာ့အနာဂတ်မျက်နှာစာလူငယ်မဟာဗျူဟာဖိုရမ် -၂၀၂၅ နောက်ဆုံးရက်ဖြစ်သည့် စက်တင်ဘာ ၁ ရက်တွင် လူငယ်များ၏ ဆွေးနွေးပွဲရလဒ်များကို ကြေညာချက်စာတမ်းတစ်ရပ်ထုတ်ပြန်သွားမည်ဖြစ်ကြောင်း သိရသည်။

သတင်းစဉ်