အလုပ်သမားဝန်ကြီးဌာန လူမှုဖူလုံရေးအဖွဲ့ပိုင် အလုပ်သမားဆေးရုံကြီး(ရန်ကုန်)တွင် ဆေးဖိုးကုန်ကျစရိတ်များ ခွင့်ပြုထုတ်ပေးလျက်ရှိ

အလုပ်သမားဝန်ကြီးဌာန လူမှုဖူလုံရေးအဖွဲ့ပိုင် အလုပ်သမားဆေးရုံကြီး(ရန်ကုန်)တွင် ဆေးဖိုးကုန်ကျစရိတ်များ ခွင့်ပြုထုတ်ပေးလျက်ရှိ

ရန်ကုန် စက်တင်ဘာ ၁၃

အလုပ်သမားဝန်ကြီးဌာန လူမှုဖူလုံရေးအဖွဲ့ပိုင် အလုပ်သမားဆေးရုံကြီး(ရန်ကုန်)တွင် အကျုံးဝင် အာမခံအလုပ်သမားများ၏ ဆေးဖိုးကုန်ကျစရိတ်များ ခွင့်ပြုထုတ်ပေးခြင်းကို ယမန်နေ့နံနက် ပိုင်းက အလုပ်သမားဆေးရုံကြီး(ရန်ကုန်) အစည်းအဝေးခန်းမ၌ ဆောင်ရွက်ရာ ရန်ကုန်တိုင်းဒေသကြီး တိုင်းရင်းသားရေးရာဝန်ကြီး ဦးစောဂျက်ကော့ထူး တက်ရောက် အမှာစကားပြောကြားသည်။

အလုပ်သမား ဆေးရုံကြီး(ရန်ကုန်)တွင် ပြင်ပလူနာဆောင်၊ အထွေထွေရောဂါ ဆေးကုသဆောင်၊ ခွဲစိတ်ကုသဆောင်၊ သားဖွားမီးယပ်ကုသဆောင်၊ အရိုးကုသဆောင်၊ နား၊ နှာခေါင်း၊ လည်ချောင်း၊ ဦးခေါင်းနှင့် လည်ပင်း ခွဲစိတ်ကုသဆောင်၊ ကိုယ်အင်္ဂါပြန်လည်သန်စွမ်းရေး၊ မျက်စိ၊ သွားနှင့် ခံတွင်းပြင်ပ လူနာကုသဆောင်များ စသည့် ဆေးကုသမှုဆိုင်ရာ ဝန်ဆောင်မှုများအပြင် ဆေးရုံကြီး၌ CT Scan ဖြင့် ရောဂါရှာဖွေခြင်းနှင့် ကျောက်ကပ်တု သွေးသန့်စင်စက်များဖြင့် ကျောက်ကပ်တုသွေးသန့်စင်ခြင်းများ ဆောင်ရွက်ပေးလျက်ရှိသည်။

အာမခံအလုပ်သမားများ ဆေးကုသရာတွင် Out of Pocket နည်းစေရန်အတွက် ဆေးဖိုးပြန်လည်ပေးအပ်သည့် ဓာတ်ခွဲစမ်းသပ်ခနှုန်းထားများ၊ ဓာတ်ခွဲ ခန်းဝန်ဆောင်ခ နှုန်းထားများ၊ ကျောက်ကပ်သန့်စင်ခြင်းအတွက်နှုန်းထား၊ ကျန်းမာရေး အထောက်အကူပြုပစ္စည်းများ၏ နှုန်းထားများ၊ အူအတက်ခွဲစိတ်ခြင်းနှင့် မီးဖွားခြင်းအတွက် နှုန်းထားများအား ခေတ်ကာလနှင့် လျော်ညီစွာ တိုးမြှင့်ပြင်ဆင်သတ်မှတ်၍ ဆေးဖိုးစိုက်ထုတ်ငွေများကို ပေးအပ်လျက်ရှိသည်။

ထို့နောက် တိုင်းရင်းသားရေးရာဝန်ကြီးနှင့် လူမှုဖူလုံရေးအဖွဲ့မှ ခေတ္တညွှန်ကြားရေးမှူးချုပ်တို့က ပြင်ပလူနာများအား ဆေးဝါးကုသပေးနေမှုကို ကြည့်ရှုအားပေး စကားပြောကြားကာ အတွင်းလူနာ ကုသပေးသည့် ကုသဆောင်များ၌ ဆေးဝါးကုသမှု ခံယူနေသည့် အာမခံအလုပ်သမားများအား ထောက်ပံ့ငွေများ ပေးအပ်ခဲ့ကြောင်း သိရသည်။

သတင်းစဉ်