ဦးစီးအရာရှိနှင့် စာရင်းစစ်မှူးများ လုပ်ငန်းခွင်ကျွမ်းကျင်မှု မွမ်းမံသင်တန်း အမှတ်စဉ် (၁) သင်တန်းဆင်းပွဲအခမ်းအနားကျင်းပခြင်း

ဦးစီးအရာရှိနှင့် စာရင်းစစ်မှူးများ လုပ်ငန်းခွင်ကျွမ်းကျင်မှု မွမ်းမံသင်တန်း အမှတ်စဉ် (၁) သင်တန်းဆင်းပွဲအခမ်းအနားကျင်းပခြင်း

ပြည်ထောင်စုစာရင်းစစ်ချုပ်ရုံး၊ အဆင့်မြင့်စာရင်းကိုင်နှင့်စာရင်းစစ်သင်တန်းကျောင်း၊ နေပြည်တော်တွင် ဦးစီးအရာရှိနှင့် စာရင်းစစ်မှူးများ လုပ်ငန်းခွင်ကျွမ်းကျင်မှု မွမ်းမံသင်တန်း အမှတ်စဉ် (၁) သင်တန်းဆင်းပွဲအခမ်းအနားကို ၂၀၂၄ ခုနှစ်၊ ဒီဇင်ဘာလ ၂၀ ရက်နေ့ နံနက် ၉း၃၀ နာရီတွင် နေပြည်တော်ရှိ ပြည်ထောင်စုစာရင်းစစ်ချုပ်ရုံး၊ နဝရတ်ခန်းမ၌ Hybrid စနစ်ဖြင့် ကျင်းပခဲ့သည်။

သင်တန်းဆင်းပွဲအခမ်းအနားတွင် ပြည်ထောင်စုစာရင်းစစ်ချုပ် ဒေါက်တာခင်နိုင်ဦးက စစ်ဆေးရေးလုပ်ငန်းများဆောင်ရွက်ရာတွင် အခြေခံသဘောတရားများကို ရှင်းရှင်းလင်းလင်း သိရှိနားလည်ခြင်း၊ လုံလောက်သော အထောက်အထားများ ရယူစုဆောင်းခြင်း၊ အချက်အလက်များကို ဆန်းစစ်ခြင်း၊ ချိတ်ဆက်တွေးခေါ်ဆောင်ရွက်ခြင်း၊ ခိုင်မာအားကောင်းပြီး ကျိုးကြောင်းဆီလျော်၍ လက်ခံဆောင်ရွက်နိုင်သည့် အကြံပြုချက်များပေးနိုင်ခြင်းသည် မိမိတို့ရုံးအနေဖြင့် ပြည်သူ့အတွက်အကျိုးဖြစ်ထွန်းစေသည့် အဖွဲ့အစည်းတစ်ရပ်အဖြစ် ရပ်တည်နိုင်ခြင်းပင်ဖြစ်ပါကြောင်း၊ ဦးစီးအရာရှိနှင့် စာရင်းစစ်မှူးများသည် စစ်ဆေးရေးလုပ်ငန်းတွင် အဓိကကျပြီး ဦးဆောင်စစ်ဆေးရသူများဖြစ်၍ ခေါင်းဆောင်ကောင်း၏ အရည်အသွေးများပြည့်ဝနေရန်သာမက စစ်ဆေးရေးအဖွဲ့ဝင်များအား မိမိတို့၏အတွေ့အကြုံ၊ အသိပညာ၊ အတတ်ပညာများ လက်ဆင့်ကမ်းမျှဝေပေးစေလိုပါကြောင်း၊ ထို့အပြင် မိမိတို့၏လုပ်ငန်းများ အောင်မြင်စွာဆောင်ရွက်နိုင်ရန်အတွက် Communication Skill ကိုလည်း ကောင်းမွန်စွာ တည်ဆောက်ကြရမည်ဖြစ်ပါကြောင်း ၊ သင်တန်းသားများနေဖြင့် သင်တန်းမှရရှိသည့် အသိပညာ၊ ဗဟုသုတများကို လုပ်ငန်းခွင်တွင်ထိရောက်အကျိုးရှိစွာ ပြန်လည်အသုံးချဆောင်ရွက်ကြရန်နှင့် လိုက်နာရမည့်ကျင့်ဝတ်သိက္ခာများကို စောင့်ထိန်းပြီး တာဝန်ယူမှု၊ တာဝန်ခံမှုအပြည့်ဖြင့် လုပ်ငန်းတာဝန်များထမ်းဆောင်သွားကြရန် ဖြစ်ပါကြောင်း လမ်းညွှန်မှာကြားခဲ့သည်။

ထို့နောက် သင်တန်းသားများကိုယ်စား သင်တန်းသားတစ်ဉီးက ကျေးဇူးတင်စကား ပြောကြားခဲ့သည်။

အဆိုပါသင်တန်းသို့ ပြည်ထောင်စုစာရင်းစစ်ချုပ်ရုံးမှ သင်တန်းသား (၁၃၁) ဦး၊ တိုင်းဒေသကြီး/ပြည်နယ်စာရင်းစစ်ချုပ်ရုံးများမှ သင်တန်းသား (၅၆၁) ဦး စုစုပေါင်း (၆၉၂) ဦး တက်ရောက်ခဲ့ကြသည်။

သင်တန်းဆင်းပွဲအခမ်းအနားသို့ ဒုတိယစာရင်းစစ်ချုပ်၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဒုတိယအမြဲတမ်းအတွင်းဝန်၊ ဒုတိယညွှန်ကြားရေးမှူးချုပ် များနှင့်တာဝန်ရှိသူများ၊ သင်တန်းကထိကများ၊ သင်တန်းသားများတက်ရောက်ကြပြီး တိုင်းဒေသကြီး/ပြည်နယ်စာရင်းစစ်ချုပ်ရုံးများမှ တာဝန်ရှိသူများ၊ သင်တန်းကထိက များ၊ သင်တန်းသားများက Online ဖြင့် တက်ရောက်ခဲ့ကြသည်။