(၂၄) ကြိမ်မြောက် အာဆီယံဘဏ်လုပ်ငန်းဆိုင်ရာညီလာခံနှင့် (၅၃) ကြိမ်မြောက် အာဆီယံဘဏ်လုပ်ငန်းကောင်စီအစည်းအဝေးများ ကျင်းပ

(၂၄) ကြိမ်မြောက် အာဆီယံဘဏ်လုပ်ငန်းဆိုင်ရာညီလာခံနှင့် (၅၃) ကြိမ်မြောက် အာဆီယံဘဏ်လုပ်ငန်းကောင်စီအစည်းအဝေးများ ကျင်းပ

နေပြည်တော် နိုဝင်ဘာ ၁၉

(၂၄) ကြိမ်မြောက် အာဆီယံဘဏ်လုပ်ငန်းဆိုင်ရာညီလာခံနှင့် (၅၃) ကြိမ်မြောက် အာဆီယံဘဏ်လုပ်ငန်းကောင်စီအစည်းအဝေးများကို မြန်မာနိုင်ငံက အိမ်ရှင်အဖြစ် မြန်မာနိုင်ငံဘဏ်များအသင်းနှင့် အာဆီယံဘဏ်များအသင်းတို့က ကြီးမှူး၍ ယနေ့တွင် ရန်ကုန်မြို့ Novotel Yangon Max Hotel ၌ကျင်းပသည်။

 အဆိုပါညီလာခံသို့ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်း၊ မြန်မာနိုင်ငံတော်ဗဟိုဘဏ်ဥက္ကဋ္ဌ၊ ရန်ကုန်တိုင်းဒေသကြီး စီးပွားရေးရာဝန်ကြီး၊ မြန်မာနိုင်ငံတော်ဗဟိုဘဏ် ဒုတိယဥက္ကဋ္ဌ ဦးသက်ထွန်းအောင်၊ အာဆီယံဘဏ်များအသင်းဥက္ကဋ္ဌ၊ မြန်မာနိုင်ငံဘဏ်များအသင်းဥက္ကဋ္ဌ၊ အာဆီယံနိုင်ငံအသီးသီး၏ ဘဏ်များအသင်းမှ ကိုယ်စားလှယ်အဖွဲ့များ၊ နိုင်ငံပိုင်ဘဏ်များ၊ ပြည်တွင်းပုဂ္ဂလိကဘဏ်များ၊ နိုင်ငံခြားဘဏ်ခွဲများ၊ နိုင်ငံခြားဘဏ် လက်အောက်ခံဘဏ်များမှ CEO များနှင့် တာဝန်ခံများ၊ ဘဏ်များ၏ အာမခံလုပ်ငန်း Partners များ၊ အပြည်ပြည်ဆိုင်ရာအဖွဲ့အစည်းများမှ ကိုယ်စားလှယ်များ၊ ပြည်ထောင်စုသမ္မတမြန်မာနိုင်ငံ ကုန်သည်များနှင့်စက်မှုလက်မှုလုပ်ငန်းရှင်များအသင်းချုပ် (UMFCCI) မှ ကိုယ်စားလှယ်များ၊ ဘာသာရပ်ဆိုင်ရာ ကျွမ်းကျင်သူများ၊ အစိုးရနှင့် ပုဂ္ဂလိကကဏ္ဍများမှ ဖိတ်ကြားထားသူများ တက်ရောက်သည်။

အဆိုပါ အာဆီယံဘဏ်လုပ်ငန်းဆိုင်ရာညီလာခံတွင် မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါ်သန်းသန်းဆွေ၊ မြန်မာနိုင်ငံဘဏ်များအသင်းဥက္ကဋ္ဌ ဒေါ်ခင်စောဦး၊ အာဆီယံဘဏ်များအသင်းဥက္ကဋ္ဌ Mr Jose Teodoro K. Limcaoco တို့က အဖွင့်အမှာစကားများ ပြောကြားခဲ့ပြီး အာဆီယံအတွင်းရေးမှူးချုပ် Dr. Kao Kim Hourn က ဗီဒီယိုဖြင့် အမှာစကားပြောကြားသည်။

မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါ်သန်းသန်းဆွေက ယနေ့ကျင်းပပြုလုပ်သည့် အခမ်းအနားသည် အာဆီယံဘဏ်လုပ်ငန်းနယ်ပယ်အတွက် အလွန်အရေးကြီးပါကြောင်း၊ ညီလာခံ၏ ဆောင်ပုဒ်ဖြစ်သည့် "Optimizing Banking in a Digital Age: Successes and Challenges" သည် မျက်မှောက်ကာလအခြေအနေကို အပြည့်အဝ ထင်ဟပ်စေပါကြောင်း၊ ဒစ်ဂျစ်တယ်နည်းပညာများ တိုးတက်လာခြင်းသည် အာဆီယံဒေသတွင်းနိုင်ငံများ၏ ငွေရေးကြေးရေးကဏ္ဍတွင် အားလုံးပါဝင်လာရေး၊ ပိုမိုကောင်းမွန်သည့်ဝန်ဆောင်မှုများ ပံ့ပိုးပေးနိုင်ရေးနှင့် နယ်စပ်ဖြတ်ကျော်ပေးချေမှုများ ပိုမိုဖွံ့ဖြိုးတိုးတက်လာစေရေးတို့ကို အထောက်အကူဖြစ်စေသော်လည်း ဆိုက်ဘာလုံခြုံရေးဆိုင်ရာ တိုက်ခိုက်ခံရမှု၊ လိမ်လည်မှုနှင့် ကိန်းဂဏန်းအချက်အလက်လုံခြုံမှုစသည့် ဆုံးရှုံးနိုင်ခြေအသစ်များကိုလည်း ဖြစ်ပေါ်လာစေနိုင်ပါကြောင်း၊ အာဆီယံငွေရေးကြေးရေးအသိုက်အဝန်းအနေဖြင့်လည်း ASEAN Payment Connectivity ၊ cross-border QR code payments နှင့် regional open banking framework စသည့် ပူးပေါင်းဆောင်ရွက်မှုများကို ပြုလုပ်နိုင်ခဲ့ပါကြောင်း၊ အာဆီယံနိုင်ငံများအနေဖြင့် သမားရိုးကျဘဏ်လုပ်ငန်းနှင့် ဒစ်ဂျစ်တယ်စနစ်တို့ကိုပါ အသုံးပြုနိုင်သည့် ecosystem ကို တည်ဆောက်လျက်ရှိပါကြောင်း ပြောကြားပြီး ပြည်တွင်း၌ ငွေပေးချေမှုများကို လွယ်ကူချောမွေ့စေပြီး နိုင်ငံဖြတ်ကျော်ပေးချေမှုများကိုပါ ဆောင်ရွက်နိုင်မည့် National QR Code ဖြစ်သည့် MMQR ကို အကောင်အထည်ဖော်ခဲ့သည့်အခြေအနေများ ဆွေးနွေးသည်။

 ဆက်လက်၍ အာဆီယံနိုင်ငံများအနေဖြင့် ဒစ်ဂျစ်တယ်နည်းပညာများ ဖွံ့ဖြိုးတိုးတက်လာမှုနှင့်အတူ ကြုံတွေ့နေရသည့် ဆုံးရှုံးနိုင်ခြေများကို ကာကွယ်ရန်အတွက် Fundamental Framework တစ်ခု ပိုမိုအားကောင်းရန် လိုအပ်ပါကြောင်း၊ ယနေ့ကျင်းပသည့် အာဆီယံဘဏ်လုပ်ငန်းဆိုင်ရာ ညီလာခံသည် ဒေသတွင်းနိုင်ငံများ၏ ဘဏ်လုပ်ငန်းကို ဦးစီးဦးဆောင်ပြုနေသည့် ခေါင်းဆောင်များအကြား ပူးပေါင်းဆောင်ရွက်မှုများ ခိုင်မာအားကောင်းစေရေးကို အထောက်အကူပြုနိုင်မည်ဟု ယုံကြည်ပါကြောင်း ပြောကြားသည်။

ထို့နောက် အာဆီယံဘဏ်လုပ်ငန်းဆိုင်ရာ ညီလာခံတွင် တက်ရောက်လာသည့် ဘာသာရပ်ဆိုင်ရာ ကျွမ်းကျင်သူများက အာဆီယံဒေသတွင်း မေခရိုစီးပွားရေးအလားအလာများနှင့် စပ်လျဉ်း၍ လည်းကောင်း၊ ကမ္ဘာ့နိုင်ငံများ၏ ဘဏ်လုပ်ငန်းနှင့် ငွေရေးကြေးရေးကဏ္ဍ ပြောင်းလဲဖြစ်ပေါ် တိုးတက် လာမှုနှင့်အတူ အာဆီယံနိုင်ငံများမှ ဆောင်ရွက်ရ မည့်လုပ်ငန်းစဉ်များခေါင်းစဉ်ဖြင့်လည်းကောင်း၊ ဘဏ္ဍာရေးလုပ်ငန်း၏ အနာဂတ်-ဒစ်ဂျစ်တယ်ခေတ်တွင် ဘဏ်လုပ်ငန်းဝန်ဆောင်မှုများကို ကောင်းမွန်စွာ ပံ့ပိုးပေးနိုင်ရေးခေါင်းစဉ်ဖြင့်လည်းကောင်း၊ ဒစ်ဂျစ်တယ်ခေတ်တွင် ဘဏ်လုပ်ငန်းဝန်ဆောင်မှုပေးရာ၌ ကြုံတွေ့နေရသည့်စိန်ခေါ်မှုများနှင့် ရရှိလာနိုင်သည့် အောင်မြင်မှုများခေါင်းစဉ်ဖြင့်လည်းကောင်း၊ ငွေပေးချေမှုများဆောင်ရွက်ရာတွင် ကြုံတွေ့နေရသည့် အွန်လိုင်းမှတစ်ဆင့် လိမ်လည်မှုများ ခေါင်းစဉ်ဖြင့်လည်းကောင်း ဆွေးနွေးသည်။

ဆက်လက်၍ (၂၄) ကြိမ်မြောက် အာဆီယံဘဏ်လုပ်ငန်းဆိုင်ရာ ညီလာခံနှင့် (၅၃) ကြိမ်မြောက် အာဆီယံဘဏ်လုပ်ငန်းကောင်စီအစည်းအဝေးများ ဆက်စပ်အစည်းအဝေးများကို မြန်မာနိုင်ငံက အိမ်ရှင်အဖြစ် လက်ခံ၍ နိုဝင်ဘာ ၁၉ ရက်မှ ၂၁ ရက်အထိ ရန်ကုန်မြို့ Novotel Yangon Max Hotel ၌ ဆက်လက်ကျင်းပသွားမည်ဖြစ်ကြောင်း သိရသည်။

သတင်းစဉ်