နှစ်(၇၀)ပြည့် ကရင်ပြည်နယ်နေ့အထိမ်းအမှတ် ကရင်ရိုးရာဒုံးအကပြိုင်ပွဲ စတင်ကျင်းပ

နှစ်(၇၀)ပြည့် ကရင်ပြည်နယ်နေ့အထိမ်းအမှတ် ကရင်ရိုးရာဒုံးအကပြိုင်ပွဲ စတင်ကျင်းပ

ဘားအံ - နိုဝင်ဘာ (၆)

နှစ်(၇၀)ပြည့်ကရင်ပြည်နယ်နေ့အထိမ်းအမှတ် ကရင်ရိုးရာဒုံးအကပြိုင်ပွဲဖွင့်ပွဲအခမ်းအနားကို နိုဝင်ဘာလ ၅ ရက် နေ့မွန်းလွဲ ၅ နာရီခွဲက ဘားအံမြို့၊သီရိကွင်း၌ကျင်းပရာ ပြည်နယ်ဝန်ကြီးချုပ်ဦးစောမြင့်ဦး၊ ပြည်နယ်အမျိုးသမီးရေးရာအ ဖွဲ့နှင့်မိခင်နှင့်ကလေးစောင့်ရှောက်မှုကြီးကြပ်ရေးအဖွဲ့နာယက၊ ပြည်နယ်တရားလွှတ်တော်တရားသူကြီးချုပ်ဦးညွန့်လင်း၊ ပြည်နယ်အစိုးရအဖွဲ့ဝင်များက ဒုံးအကပြိုင်ပွဲအား ဖဲကြိုးဖြတ်ဖွင့်လှစ်ပေးကြသည်။

ထို့နောက် ပြည်နယ်ဝန်ကြီးချုပ်က ကရင်ရိုးရာဒုံးအကသမိုင်းကို ရှင်းလင်းပြောကြားပြီး ယနေ့ကျင်းပသည့် ပြိုင်ပွဲတွင် ပြိုင်ပွဲဝင်ဒုံးအဖွဲ့(၂၀)ဖွဲ့ဝင်ရောက်ယှဉ်ပြိုင်ကြပြီး ပြိုင်ပွဲဝင်ဆိုသည့်အတိုင်း အားကြိုးမာန်တက်ကပြ ယှဉ်ပြိုင်၍ အကဲဖြတ်ဒိုင်များ၏ မှန်ကန်သောအဆုံးအဖြတ်ဖြင့် အဆင့်လိုက်ရမှတ်များကိုလက်ခံကာ အားသွန်ခွန်စိုက် ကြိုးစားပြိုင်ပွဲဝင်ကြရန် တိုက်တွန်းပြောကြား၍ ပြိုင်ပွဲအားဖွင့်လှစ်ပေးသည်။

ယင်းနောက် ဒုံရင်းတိုက်နယ်ကိုယ်စားပြု လှိုင်ကမ္ဘာကျေးရွာဒုံးအဖွဲ့က မြူးကြွသွက်လက်မြိုင်ဆိုင်စွာ ကပြဖျော် ဖြေရာ ပြည်နယ်ဝန်ကြီးချုပ်နှင့်အစိုးရအဖွဲ့ဝင်များ၊ နိုင်ငံရေးပါတီများ၊ ဌာနဆိုင်ရာများ၊ လူမှုရေးအသင်းအဖွဲ့များ၊ တိုင်းရင်းသားပြည်သူများက ကြည့်ရှုအားပေးကြပြီး ဂုဏ်ပြုဆုများပေးအပ်ချီးမြှင့်ကြသည်။

ဆက်လက်၍ နှစ်(၇၀)ပြည့် ကရင်ပြည်နယ်နေ့အထိမ်းအမှတ်ဒုံးအကပြိုင်ပွဲ ပထမညယှဉ်ပြိုင်မှုကို မွန်းလွဲ ၆ နာရီက ဘားအံမြို့၊ သီရိကွင်း၊ ဒုံးစင်မြင့်၌ကျင်းပရာ ဒုံးအဖွဲ့ (၁၀) ဖွဲ့ကမြူးကြွသွက်လက်မြိုင်ဆိုင်စွာ ယှဉ်ပြိုင်ကပြသီဆို ဖျော်ဖြေခဲ့ကြပြီး ပြည်နယ်ဝန်ကြီးချုပ်နှင့် အစိုးရအဖွဲ့ဝင်များ၊ တိုင်းရင်းသားလက်နက်ကိုင်ငြိမ်းချမ်းရေးအဖွဲ့အစည်းများ၊ နိုင်ငံရေးပါတီများ၊ ဌာနဆိုင်ရာများ၊ လူမှုရေးအသင်းအဖွဲ့များ၊ တိုင်းရင်းသားပြည်သူများက ကြည့်ရှုအားပေးကြပြီး ဂုဏ်ပြုဆုများပေးအပ်ချီးမြှင့်ခဲ့ကြသည်။

နှစ်(၇၀)ပြည့်ကရင်ပြည်နယ်နေ့အထိမ်းအမှတ်ဒုံးအကပြိုင်ပွဲကို ဒုံးအဖွဲ့ ၂၀ ဖွဲ့ဖြင့် တစ်ဖွဲ့လျှင် တစ်ရက်ခြား နှစ်ကျော့ ယှဉ်ပြိုင်စေပြီး အကောင်းဆုံး ၁၀ ဖွဲ့ကို ရွေးချယ်၍ ထပ်မံယှဉ်ပြိုင်စေကာ တေးသီချင်းဆု၊ ဆုတောင်းတေး (ရာဓညာ)ဆု၊ ဒုံးအကဆုနှင့် ဘက်စုံထူးချွန်ဆုများကို ထိုက်ထိုက်တန်တန်ချီးမြှင့်ပေးသွားမည်ဖြစ်ကြောင်း သတင်းရရှိ သည်။

အလားတူ ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ်ဦးစောမြင့်ဦးသည် ပြည်နယ်အစိုးရအဖွဲ့ဝင်များ၊ ဌာနဆိုင်ရာတာဝန်ရှိသူများနှင့်အတူ နိုဝင်ဘာလ ၅ ရက်နေ့ မွန်းလွဲ ၂ နာရီက နှစ်(၇၀)ပြည့်ကရင်ပြည်နယ်နေ့အခမ်း အနား စည်ကားသိုက်မြိုက်စွာဖြင့် အောင်မြင်စွာကျင်းပနိုင်ရေး ပြင်ဆင်ဆောင်ရွက်ထားရှိမှု အခြေအနေများကို လှည့်လည်ကြည့်ရှုစစ်ဆေးခဲ့ကြသည်။

ပြည်နယ်ဝန်ကြီးချုပ်နှင့်အဖွဲ့သည် နှစ်(၇၀)ပြည့်ကရင်ပြည်နယ်နေ့မုခ်ဦး ပြင်ဆင်ဆောင်ရွက်ထားရှိမှု၊ ဌာနဆိုင် ရာပြခန်းများ၊ တိုင်းရင်းသားစာပေနှင့်ယဉ်ကျေးမှုပြခန်းများ၊ တက္ကသိုလ်၊ ဒီဂရီကောလိပ်၊ သိပ္ပံပြခန်းများ၊ ဒေသတွင်း MSME ထုတ်ကုန်ပြခန်းများ၊ အရောင်းပြခန်းများကိုလည်းကောင်း၊ ဒုံးအကပြိုင်ပွဲကျင်းပနိုင်ရေး ဒုံးစင်မြင့်အားပြင်ဆင် ဆောင်ရွက်ထားမှုများကိုလည်းကောင်း ကြည့်ရှုစစ်ဆေးပြီး တာဝန်ရှိသူများအားလိုအပ်သည်များ မှာကြားခဲ့ပါသည်။