ပဲခူးတိုင်းဒေသကြီးဝန်ကြီးချုပ် တောင်ငူဒေသအတွင်း တစ်ပိုင်တစ်နိုင် စီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရေး ကွင်းဆင်းဖြည့်ဆည်းဆောင်ရွက်

ပဲခူးတိုင်းဒေသကြီးဝန်ကြီးချုပ် တောင်ငူဒေသအတွင်း တစ်ပိုင်တစ်နိုင် စီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရေး ကွင်းဆင်းဖြည့်ဆည်းဆောင်ရွက်

တောင်ငူ မေ ၁၁

ပဲခူးတိုင်းဒေသကြီးဝန်ကြီးချုပ်ဦးမျိုးဆွေဝင်းသည် ယမန်နေ့က တောင်ငူဒေသအတွင်း တစ်ပိုင်တစ်နိုင် စီးပွားရေးလုပ်ငန်းများ ပိုမိုဖွံ့ဖြိုးတိုးတက်စေရေး ကွင်းဆင်းဖြည့်ဆည်းဆောင်ရွက်ပေးသည်။

ကြည့်ရှုအားပေး

ဦးစွာ တောင်ငူမြို့ အမှတ်(၂)ရပ်ကွက် နေပူကုန်း လမ်းရှိ လုပ်ငန်းရှင်ဦးကိုကိုနိုင်၏ ငရုတ်သီးအမှုန့်မျိုးစုံလုပ်ငန်း၊ ရွှေဟင်္သာ(၂)ရပ်ကွက်ရှိ “မိဘမေတ္တာ” မျှစ်ချို/မျှစ်ချဉ် စားသောက်ကုန်လုပ်ငန်းတို့ကို သွားရောက်ကြည့်ရှုအားပေးသည်။

ယင်းနောက် တောင်ငူမြို့နယ် ကံရိုးကျေးရွာအုပ်စု အင်းပုတ်ကျေးရွာနေ မွေးမြူရေးလုပ်ငန်းရှင်ဦးသန့်စင်၏ ဥစားဘဲကောင်ရေ ၅၀၀၀ ကို သဘာဝအတိုင်း ဒေသအစာဖြင့် မွေးမြူထားရှိမှု၊ အုတ်တွင်းမြို့နယ် ရန်ကုန်-မန္တလေးအမြန်လမ်း ၁၃၀/၂ ရှိ 24 Hour Co., Ltd. ၏ သီဟိုဠ်ခြံများအတွင်း သီးညှပ်အနေဖြင့် ရိုဘတ်စတာကော်ဖီ ၁၆၈ ဧက စိုက်ပျိုးအောင်မြင်နေမှုနှင့် ထပ်မံစိုက်ပျိုးသွားမည့် ကော်ဖီပျိုးပင်များကို ကြည့်ရှုအားပေးခဲ့ပြီး ပျိုးထောင်ပြီး ကော်ဖီပျိုးပင်များ ယခုမိုးရာသီအတွင်းအပြီး စိုက်ပျိုးဆောင်ရွက်နိုင်ရေး မှာကြားခဲ့ကြောင်း သိရသည်။

တိုင်းဒေသကြီး(ပြန်/ဆက်)