မကွေးတိုင်းဒေသကြီး၊ စလင်းမြို့နယ်၌ PDF အမည်ခံ အကြမ်းဖက်သမားများက ဒုတိယ မူလတန်းပြဆရာမ တစ်ဦးနှင့် ဆည်မြောင်းနေ့စားလုပ်သား တစ်ဦးတို့အား အကြမ်းဖက် ခြိမ်းခြောက်၍ ဖမ်းဆီးခေါ်ဆောင်

မကွေးတိုင်းဒေသကြီး၊ စလင်းမြို့နယ်၌ PDF အမည်ခံ အကြမ်းဖက်သမားများက ဒုတိယ မူလတန်းပြဆရာမ တစ်ဦးနှင့် ဆည်မြောင်းနေ့စားလုပ်သား တစ်ဦးတို့အား အကြမ်းဖက် ခြိမ်းခြောက်၍ ဖမ်းဆီးခေါ်ဆောင်

     လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများ အတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် နိုင်ငံ့ဝန်ထမ်းများကို ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်း မစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ နိုဝင်ဘာ ၁၁ ရက် နံနက် ၈ နာရီတွင် မကွေးတိုင်း ဒေသကြီး၊ စလင်းမြို့နယ်၊ လင်းဇင်းကျေးရွာနေ လေးအိမ်စုကျေးရွာ အခြေခံပညာမူလတန်းကျောင်းမှ အရှေ့ကန်ဘောင်ကျေးရွာ အခြေခံပညာမူလတန်းလွန်ကျောင်း၌ တွဲဖက်တာဝန် ထမ်းဆောင်နေသည့် ဒုတိယမူလတန်းပြဆရာမ ဒေါ်ဖြူဖြူဝင်း(၃၅)နှစ်သည် တစ်ရွာတည်းနေ အစ်ကိုဖြစ်သူ ဆည်မြောင်း နေ့စားလုပ်သား ဦးသန်းထိုက်(၃၈)နှစ်နှင့်အတူ လင်းဇင်းကျေးရွာမှ ပျိုးခင်းကုန်းကျေးရွာသို့ သွားရောက်စဉ် အရှေ့ကန်ဘောင်-ပျိုးခင်းကုန်းသွားမြေနီလမ်းဘေးရှိ ဇရပ်အနီးအရောက်၌ PDF အမည်ခံ အကြမ်းဖက်သမား ၂၀ ဦးခန့်က အကြမ်းဖက်ခြိမ်းခြောက်၍ ဖမ်းဆီးခေါ်ဆောင် သွားခဲ့ကြောင်း သိရသည်။

     အထက်ပါဖြစ်စဉ်မှ နိုင်ငံ့ဝန်ထမ်းများအား ပစ်မှတ်ထားဖမ်းဆီး၍ ခြိမ်းခြောက် ငွေတောင်းခံခြင်း၊ သတ်ဖြတ်ခြင်းများစသော လူသားချင်း မစာနာသည့် လူမဆန်သော ရာဇဝတ်မှု များအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး အရေးယူ နိုင်ရေးနှင့် ဖမ်းဆီးခံထားရသူများအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။