မန္တလေးတိုင်းဒေသကြီး၊ မလှိုင်မြို့နယ်၌ PDF အမည်ခံ အကြမ်းဖက်သမားများက သံဃာတော် တစ်ပါးအား မော်တော်ယာဉ် တစ်စီးနှင့်အတူ အကြမ်းဖက်ခြိမ်းခြောက်၍ ဖမ်းဆီးခေါ်ဆောင်

မန္တလေးတိုင်းဒေသကြီး၊ မလှိုင်မြို့နယ်၌ PDF အမည်ခံ အကြမ်းဖက်သမားများက သံဃာတော် တစ်ပါးအား မော်တော်ယာဉ် တစ်စီးနှင့်အတူ အကြမ်းဖက်ခြိမ်းခြောက်၍ ဖမ်းဆီးခေါ်ဆောင်

     လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများ အတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ်ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် သံဃာတော်များကို ပစ်မှတ်ထားဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်း မစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန်လုပ်ဆောင်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ ဒီဇင်ဘာ ၂၅ ရက် မွန်းလွဲ ၁ နာရီတွင် မန္တလေးတိုင်း ဒေသကြီး၊ မလှိုင်မြို့နယ်၊ အမှတ်(၄)ရပ်ကွက်ရှိ ရတနာဦးဘုန်းကြီးကျောင်းမှ ကျောင်းထိုင်ဆရာတော် ဥူးဏိပုန သက်တော်(၆၀)နှစ်၊ ဝါတော်(၄၀)ဝါနှင့် ဆရာတော် ဥူးနရိန္ဒ သက်တော်(၅၂)နှစ်၊  ဝါတော် (၃၂)ဝါတို့သည် ထနောင်းကျင်ကျေးရွာနေ ဦးအေးကောင်း(၆၃)နှစ် မောင်းနှင်သည့် ကျောင်းပိုင် မော်တော်ယာဉ်ဖြင့် ချင်းလျား(အနောက်)ကျေးရွာမှ မလှိုင်မြို့သို့ နှောကန်-မကျီးပင်ပု-ဆုံတွင်း-မလှိုင်လမ်းအတိုင်း မောင်းနှင်ထွက်ခွာလာစဉ် ဆုံတွင်းကျေးရွာအနီး လမ်းခွဲအရောက်၌ PDF အမည်ခံ အကြမ်းဖက်သမား ၁၅ ဦးခန့်က မော်တော်ယာဉ်အား တားဆီးရပ်တန့်ခိုင်းကာ ယာဉ်ပေါ်ပါလာ သူများအနက် ကျောင်းထိုင်ဆရာတော် ဥူးဏိပုနအား အဆိုပါမော်တော်ယာဉ်နှင့်အတူ အကြမ်းဖက် ခြိမ်းခြောက်၍ ဖမ်းဆီးခေါ်ဆောင်သွားခဲ့ပြီး ဆရာတော် ဥူးနရိန္ဒနှင့် ဦးအေးကောင်းတို့အား ပြန်လည် စေလွှတ်ခဲ့ကြောင်း သိရသည်။

     အထက်ပါဖြစ်စဉ်မှ သံဃာတော် တစ်ပါးအား ပစ်မှတ်ထားဖမ်းဆီး၍ ခြိမ်းခြောက်ငွေ တောင်းခံခြင်း၊ သတ်ဖြတ်ခြင်းများစသော လူသားချင်း မစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေးနှင့် ဖမ်းဆီးခံထားရသူအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လုံခြုံရေးလုပ်ငန်းစဉ် များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။