ဧရာဝတီတိုင်းဒေသကြီး၊ ဝါးခယ်မမြို့နယ်၊ မြသိန်းတန်ရပ်ကွက်၊ မော်ကျွန်း-ဝါးခယ်မကားလမ်း၌ စက်သုံးဆီအရောင်းဆိုင် မီးလောင်မှု

ဧရာဝတီတိုင်းဒေသကြီး၊ ဝါးခယ်မမြို့နယ်၊ မြသိန်းတန်ရပ်ကွက်၊ မော်ကျွန်း-ဝါးခယ်မကားလမ်း၌ စက်သုံးဆီအရောင်းဆိုင် မီးလောင်မှု

     ၂၀၂၆ ခုနှစ်၊ မေ ၂ ရက် နံနက် ၉ နာရီ ၂၅ မိနစ်ခန့်က ဧရာဝတီတိုင်းဒေသကြီး၊ ဝါးခယ်မမြို့နယ်၊ မြသိန်းတန်ရပ်ကွက်၊ မော်ကျွန်း-ဝါးခယ်မကားလမ်း၌ ပိုင်ရှင် ဦးစိုးဝင်း(၇၁)နှစ်၏ ၄၀ x ၂၀ ပေ၊ သွပ်မိုး၊ RC တစ်ထပ် “ကောင်းထက်” စက်သုံးဆီအရောင်းဆိုင်တွင် 92 ဓာတ်ဆီပီပါအတွင်းသို့ လက်လှည့်ပန့်ဖြင့် ဆီထည့်ရာ ပီပါနှုတ်ခမ်းအား လက်လှည့်ပန့်ဂေါက်ဖြင့် ရိုက်မိရာမှ မီးပွားထွက်ပြီး မီးကူးစက်လောင်ကျွမ်းမှုဖြစ်ပွားကြောင်း သတင်းရရှိသဖြင့် မြောင်းမြခရိုင်မီးသတ်စခန်း၊ ဝါးခယ်မမြို့နယ်မီးသတ်စခန်း၊ မော်လမြိုင်ကျွန်းမြို့နယ်မီးသတ်စခန်း၊ ရွှေလောင်းနယ်မြေမီးသတ်စခန်း၊ ကျုံမငေးနယ်မြေမီးသတ်စခန်းနှင့် ရွာသစ်နယ်မြေမီးသတ်စခန်းတို့မှ မီးသတ်တပ်ဖွဲ့ဝင်များသည် မီးသတ်ယာဉ် ၁၁ စီးဖြင့် မီးငြှိမ်းသတ်ခဲ့ရာ နံနက် ၁၀ နာရီ ၁၅ မိနစ်တွင် မီးငြိမ်းခဲ့ပါသည်။
     အဆိုပါ မီးလောင်မှုကြောင့် ၄၀ x ၂၀ ပေ၊ သွပ်မိုး၊ RC တစ်ထပ် အဆောက်အအုံမှ သွပ်ပြား ၅၀ ချပ်၊ ၅၀ x ၃၀ ပေ၊ သံကူကွန်ကရစ် Pump Station အဆောက်အအုံ တစ်လုံး၊ 92 ဓာတ်ဆီ ၁၀၀ ဂါလန်၊ ဒီဇယ် ၁၅၀ ဂါလန်၊ ISUZU LIGHT TRUCK အမျိုးအစား မော်တော်ယာဉ် တစ်စီး၊ ထော်လာဂျီ နှစ်စီး၊ ဆီပန့် လေးလုံး မီးလောင်ဆုံးရှုံးခဲ့ကြောင်းနှင့် စက်သုံးဆီအရောင်းဆိုင် မန်နေဂျာ ဦးသက်အောင် အား ဝါးခယ်မမြို့မရဲစခန်းမှ အမှုဖွင့်အရေးယူထားကြောင်း သတင်းရရှိပါသည်။