ငါးလုပ်ငန်းသိပ္ပံ (တွံတေး) ၏ ပထမအကြိမ် ငါးလုပ်ငန်းနှင့် ရေသတ္တဝါမွေးမြူရေးဒီပလိုမာအောင်လက်မှတ်ပေးအပ်ပွဲ ကျင်းပ

ငါးလုပ်ငန်းသိပ္ပံ (တွံတေး) ၏ ပထမအကြိမ် ငါးလုပ်ငန်းနှင့် ရေသတ္တဝါမွေးမြူရေးဒီပလိုမာအောင်လက်မှတ်ပေးအပ်ပွဲ ကျင်းပ

နေပြည်တော် မတ် ၆

စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၊ ငါးလုပ်ငန်းဦးစီးဌာန၊ ငါးလုပ်ငန်းသိပ္ပံ (တွံတေး) ၏ ပထမအကြိမ် ငါးလုပ်ငန်းနှင့် ရေသတ္တဝါမွေးမြူရေး ဒီပလိုမာအောင်လက်မှတ်ပေးအပ်ပွဲကို ဖေဖော်ဝါရီ ၂၈ ရက်တွင် ငါးလုပ်ငန်းသိပ္ပံ(တွံတေး) ဘက်စုံသုံးခန်းမ၌ ကျင်းပရာ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းနှင့် တိုင်းဒေသကြီး ဝန်ကြီးများ၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာအောင်ကြီး၊ အမြဲတမ်းအတွင်းဝန်နှင့် တာဝန်ရှိသူများ၊ မြန်မာနိုင်ငံငါးလုပ်ငန်းအဖွဲ့ချုပ်နှင့် ညီနောင်အသင်းများမှ တာဝန်ရှိသူများ၊ PTTEP ကုမ္ပဏီမှ တာဝန်ရှိသူများ၊ ဒီပလိုမာအောင်လက်မှတ်ရ ကျောင်းသား ကျောင်းသူများနှင့် ၎င်းတို့၏မိဘဆွေမျိုးများ တက်ရောက်ကြသည်။

အခမ်းအနားတွင် တိုင်းဒေသကြီးဝန်ကြီးချုပ်က အမှာစကားပြောကြားပြီး ပထမနှစ်မှ တတိယနှစ်အထိ တန်းစဉ်ပေါင်းတွင် ပထမဆုနှင့် ဒုတိယဆု ရရှိသူတို့အား ဆုချီးမြှင့်သည်။

ဆက်လက်၍ ဒုတိယဝန်ကြီးက အမှာစကား ပြောကြားပြီး တန်းစဉ်ပေါင်းတွင် တတိယဆုရရှိသူအား ဆုချီးမြှင့်သည်။

မွန်းလွဲပိုင်းတွင် ကျောင်းအုပ်ကြီးက ဒီပလိုမာအပ်နှင်းပွဲ ကျင်းပကြောင်းကြေညာပြီး ဒီပလိုမာအောင်လက်မှတ်ရရှိသူ ၃၈ ဦး၊ အဝေးရောက်ယူရန် လျှောက်ထားသူတစ်ဦး စုစုပေါင်း ၃၉ ဦးအား ဒီပလိုမာအောင်လက်မှတ်များ ချီးမြှင့်အပ်နှင်းကာ ဒီပလိုမာရရှိသူများ စာရင်းကို အတည်ပြုလက်မှတ်ရေးထိုးပေးသည်။

ယင်းနောက် ကျောင်းအုပ်ကြီးက ပထမအကြိမ် ဒီပလိုမာအောင်လက်မှတ်ပေးအပ်ပွဲ မိန့်ခွန်းပြောကြားသည်။

ငါးလုပ်ငန်းသိပ္ပံ(တွံတေး) မှ သုံးနှစ်ပြီးမြောက်ပြီး ဒီပလိုမာနောက်ဆုံးနှစ်တွင် ထူးချွန်စွာ အောင်မြင်ပါက ရန်ကုန်တက္ကသိုလ်ရှိ B.Sc (Fisheries and Aquaculture) ဘွဲ့ရရှိရန် တတိယနှစ်သင်တန်းသို့ ဝင်ခွင့်ဖြေဆို၍ ချိတ်ဆက်တက်ရောက်နိုင်မည်ဖြစ်ပြီး သုံးနှစ်ဒီပလိုမာပြီးဆုံးပါကလည်း ငါးလုပ်ငန်းဦးစီး ဌာနတွင် ဒုတိယလက်ထောက်ဦးစီးမှူးအဖြစ် အလုပ်စတင်ဝင်ရောက်နိုင်မည်ဖြစ်ကြောင်း သိရသည်။

သတင်းစဉ်