ငှက်ဖျားရောဂါတိုက်ဖျက်ရေးစီမံချက်လုပ်ငန်းများ ဆန်းစစ်သုံးသပ်ခြင်းမှ တွေ့ရှိချက်များနှင့်ပတ်သက်၍ ညှိနှိုင်းဆွေးနွေး

ငှက်ဖျားရောဂါတိုက်ဖျက်ရေးစီမံချက်လုပ်ငန်းများ ဆန်းစစ်သုံးသပ်ခြင်းမှ တွေ့ရှိချက်များနှင့်ပတ်သက်၍ ညှိနှိုင်းဆွေးနွေး

နေပြည်တော် နိုဝင်ဘာ ၆

ငှက်ဖျားရောဂါတိုက်ဖျက်ရေး စီမံချက်လုပ်ငန်းများအား ဆန်းစစ်သုံးသပ်ခြင်းမှ တွေ့ရှိချက်များနှင့်ပတ်သက်၍ ညှိနှိုင်းဆွေးနွေးပွဲကို ယနေ့မွန်းလွဲ ၁ နာရီတွင် ကျန်းမာရေးဝန်ကြီးဌာန ရုံးအမှတ်(၄)အစည်းအဝေးခန်းမ၌ ကျင်းပသည်။

ဦးစွာ ကျန်းမာရေးဝန်ကြီးဌာန ဒုတိယဝန်ကြီး ပါမောက္ခဒေါက်တာအေးထွန်းက မြန်မာနိုင်ငံသည် ၂၀၃၀ ပြည့်နှစ်တွင် ငှက်ဖျားရောဂါပိုးအားလုံး ကူးစက်မှုပပျောက်စေရန် ရည်ရွယ်ဆောင် ရွက်လျက်ရှိပါကြောင်း၊ လွန်ခဲ့သောဆယ်စုနှစ်အတွင်း ငှက်ဖျားရောဂါ ထိန်းချုပ်ရေးတွင် သိသာထင်ရှားသော တိုးတက်မှုများ ရရှိခဲ့ပါကြောင်း၊ ၂၀၁၂ ခုနှစ်မှ ၂၀၂၁ ခုနှစ်အတွင်း ငှက်ဖျားရောဂါ ဖြစ်ပွားမှုအရေအတွက်သည် ၈၈ ရာနှုန်း လျော့ကျခဲ့ပြီး သေဆုံးမှုမှာ ၉၇ ရာနှုန်းအထိလျော့ကျခဲ့ပါကြောင်း၊ သို့ရာတွင် ကိုဗစ်- ၁၉ ကမ္ဘာ့ကပ်ရောဂါဖြစ်ပွားပြီး နောက်ပိုင်း ငှက်ဖျားရောဂါထိန်းချုပ်ရေးနှင့် ကူးစက်မှုပပျောက်ရေးလုပ်ငန်းများ၊ အထူးသဖြင့် ကွင်းဆင်းဆောင်ရွက်ရန် လိုအပ်သည့် ငှက်ဖျားရောဂါဖြစ်ပွားမှုနှင့် Entomological (ပိုးမွှားဗေဒ ဆိုင်ရာ) စောင့်ကြပ်ကြည့်ရှုလေ့လာရေးလုပ်ငန်းများ၏ တိုးတက်မှုကို ထိခိုက်စေခဲ့ပါကြောင်း။

၂၀၂၅ ခုနှစ် ဇန်နဝါရီလမှ ဩဂုတ်လအထိ ငှက်ဖျားရောဂါ ဖြစ်ပွားသူ စုစုပေါင်း ၁၂၆၅၆၂ ဦး ကို စစ်ဆေးတွေ့ရှိကုသပေး နိုင်ခဲ့ပါကြောင်း၊ ငှက်ဖျားရောဂါ စောင့်ကြပ်ကြည့်ရှုလေ့လာခြင်း၊ ရောဂါဖြစ်ပွားမှု တုံ့ပြန်ဆောင်ရွက် ခြင်းလုပ်ငန်းများကို မြှင့်တင်ဆောင်ရွက်ရန်နှင့် ရွှေ့ပြောင်းသွား လာသူများအကြား ငှက်ဖျားရောဂါ စစ်ဆေးကုသမှုများကို သေချာဆောင်ရွက်ရန် လိုအပ်ပါကြောင်း၊ ယခုပြုလုပ်သည့် ငှက်ဖျားရောဂါ တိုက်ဖျက်ရေးဆိုင်ရာ ဆန်းစစ်သုံးသပ်မှုတွေ့ရှိချက်များနှင့် အကြံပြုချက်များကို နောင်လာမည့် ငှက်ဖျားရောဂါထိန်းချုပ်ရေးနှင့် ကူးစက်မှုပပျောက်ရေးအတွက် အမျိုးသားငှက်ဖျားရောဂါ တိုက်ဖျက်ရေးမဟာဗျူဟာစီမံကိန်း (၂၀၂၆-၂၀၃၀)ကို ပြင်ဆင်ရာတွင် အလွန်အသုံးဝင်မည်ဖြစ်ပါကြောင်း ပြောကြားသည်။

အဆိုပါ အစည်းအဝေးသို့ ကျန်းမာရေးဝန်ကြီးဌာနမှ ဒုတိယအမြဲတမ်းအတွင်းဝန်၊ ပြည်သူ့ကျန်းမာရေးဦးစီးဌာနမှ ဒုတိယညွှန်ကြားရေးမှူးချုပ်များ၊ လက်ထောက်အတွင်းဝန်၊ ညွှန်ကြား ရေးမှူး (ရောဂါနှိမ်နင်းရေး)၊ ဒုတိယညွှန်ကြားရေးမှူး (ရပကန)၊ ကမ္ဘာ့ကျန်းမာရေးအဖွဲ့ (မြန်မာ)မှ တာဝန်ရှိသူများနှင့် Malaria Programme Review အတွက် ကျွမ်းကျင်သူ ပြင်ပပညာရှင်တို့ တက်ရောက်ခဲ့ကြကြောင်း သိရသည်။

သတင်းစဉ်