နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါ်ဒွဲဘူ စိုက်ပျိုးမွေးမြူရေးနှင့် MSME လုပ်ငန်းများ ဆောင်ရွက်နေမှု ကွင်းဆင်းစစ်ဆေး

နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါ်ဒွဲဘူ စိုက်ပျိုးမွေးမြူရေးနှင့် MSME လုပ်ငန်းများ ဆောင်ရွက်နေမှု ကွင်းဆင်းစစ်ဆေး

မြစ်ကြီးနား အောက်တိုဘာ ၃

နိုင်ငံတော်စီမံအုပ်ချုပ်ရေးကောင်စီအဖွဲ့ဝင် ဒေါ်ဒွဲဘူသည် ကချင်ပြည်နယ်ဝန်ကြီးချုပ် ဦးခက်ထိန်နန်၊ တာဝန်ရှိသူများနှင့်အတူ ယနေ့နံနက်ပိုင်းတွင် မြစ်ကြီးနားမြို့နယ် ငါးအိုးခေတ်မီစံပြ ကျေးရွာအတွင်း နိုင်ငံ့စီးပွားမြှင့်တင်ရေးရန်ပုံငွေမှ ရင်းနှီးမတည်ငွေကျပ် ၁၀ သန်းဖြင့် ပေါင်းစည်းလယ်ယာ (Integrated Farm) စနစ် အကောင်အထည်ဖော် ဆောင်ရွက်လျက်ရှိသည့် တောင်သူ ဦးဆင်ဝါးနော်၏ခြံသို့ သွားရောက်ကြည့်ရှု စစ်ဆေးသည်။

ထောက်ပံ့ပေးအပ်

ထို့နောက် အဆိုပါ ခြံဝင်းအတွင်း ဆင်းဧကရီ - ၃ အထွက်တိုးမျိုးနှင့် ငွေတိုးစပါးစိုက်ခင်းများ ဖြစ်ထွန်းအောင်မြင်နေမှု၊ စပါးခင်းပတ်လည် ရေမြောင်းအတွင်း ငါးခူငါးမျိုးများ စိုက်ထည့်မွေးမြူထားရှိမှု၊ မန်ဒါလီဘဲ၊ ဘဲငန်းနှင့် ဒေသကြက်များ မွေးမြူထားရှိမှု၊ အသားတိုးဝက်ကောင်ရေ ၉၀ ကျော် စီးပွားဖြစ်မွေးမြူထားရှိမှုနှင့် ခြံဝင်းအတွင်း လိုင်ချီးသီးပင်ပေါက်များနှင့် ဂရိတ်ဖရုပျိုးပင်များ စိုက်ပျိုးထားမှုကို လှည့်လည်ကြည့်ရှုစစ်ဆေးပြီး မွေးမြူရေးအထောက်အကူပြု ဆေးဝါးများ၊ ခြံဖျန်းပိုးသတ်ဆေးဘူးများနှင့် ရောစပ် အစာနုအိတ်များကို ထောက်ပံ့ပေးအပ်သည်။

ပေါင်းစပ်ဆောင်ရွက်ပေး

ယင်းနောက် အဆိုပါကျေးရွာအတွင်း စိုက်ပျိုးရေးဦးစီးဌာနက ဆောင်းသီးထပ် လယ်သီးနှံအဖြစ် ဖြန့်ဝေပေးနိုင်ရေး ပဲပုပ်မျိုးစေ့စိုက်ခင်း စိုက်ပျိုးထားရှိမှုနှင့် ‌တောင်သူ ဦးစိုးညွန့်အောင်၏ခြံ၌ ဖူးစားပြောင်း နှစ်ဧကခွဲ စိုက်ပျိုးအောင်မြင် ဖြစ်ထွန်းမှုတို့ကိုလည်းကောင်း၊ ရွှေညောင်ပင်ရပ်ကွက်အတွင်း နိုင်ငံ့စီးပွားမြှင့်တင်ရေးရန်ပုံငွေမှ ချေးငွေဖြင့် ဆောင်ရွက်လျက်ရှိသည့် ပိုင်ရှင်ဦးစိုးငြိမ်းမိသားစု၏ စူပါဝမ်းနို့စားနွားမွေးမြူရေးလုပ်ငန်းနှင့် နို့နှင့်နို့ထွက်ပစ္စည်းအမျိုးမျိုးရောင်းဝယ် ဖြန့်ဖြူရေးလုပ်ငန်းကိုလည်းကောင်း၊ စီတာပူ (ဆွတ်ငိုင်တောင်) ရပ်ကွက်အတွင်း ပိုင်ရှင် ဦးမရမ်ဇော်ရော် မိသားစု၏ TOP အသင့်စား စားသောက်ကုန်လုပ်ငန်း (အသားခြောက်အမျိုးမျိုးနှင့် ဝိုင်အမျိုးမျိုး ထုတ်လုပ်ဖြန့်ဖြူရေးလုပ်ငန်း) ကိုလည်းကောင်းသွားရောက်ကြည့်ရှုပြီး ဈေးကွက်ရှိဒေသထွက်ထုတ်ကုန်များ တိုးမြှင့်ထုတ်လုပ်နိုင်ရေးအတွက် ပံ့ပိုးကူညီဆောင်ရွက်ပေးရမည့် ကိစ္စရပ်များကို မေးမြန်းဆွေးနွေးကာ ပေါင်းစပ်ဆောင်ရွက်ပေးသည်။

မွန်းလွဲပိုင်းတွင် နိုင်ငံတော်စီမံအုပ်ချုပ်ရေးကောင်စီအဖွဲ့ဝင်သည် ပြည်နယ်ဝန်ကြီးချုပ်၊ ပြည်နယ်အစိုးရအဖွဲ့ဝင်များ၊ ပြည်နယ်တရားလွှတ်တော်တရားသူကြီးချုပ်၊ ပြည်နယ်အဆင့် ဌာနဆိုင်ရာများ၊ တာဝန်ရှိသူများနှင့် ပြည်နယ်အစိုးရအဖွဲ့ရုံး၌တွေ့ဆုံပြီး ဥပဒေအသိပညာပြန့်ပွားရေး၊ အထွေထွေရွေးကောက်ပွဲအောင်မြင်စွာကျင်းပနိုင်ရေး၊ နိုင်ငံတော်ဖွံ့ဖြိုးတိုးတက်ရေး၊ လူဦးရေနှင့်အိမ်အကြောင်း အရာသန်းခေါင်စာရင်းကောက်ယူခြင်းလုပ်ငန်းကို ဒေသတွင်းတည်ငြိမ်အေးချမ်းစွာ ကောက်ယူနိုင်ရေးကိစ္စရပ်များကို ဆွေးနွေးပြောကြားကာ လုပ်ငန်းလိုအပ်ချက်များကို ပေါင်းစပ်ညှိနှိုင်းဆောင်ရွက်ပေးသည်။

ကြည့်ရှုစစ်ဆေး

ထို့နောက် မြစ်ကြီးနားမြို့ မန်ခိန်ရပ်ကွက် ဆွမ်ပရာဘွမ်လမ်းမကြီးဘေးရှိ ပြည်နယ်တရားလွှတ်တော်ရုံးသစ် တည်ဆောက်မည့်မြေနေရာကို ကြည့်ရှုစစ်ဆေးသည်။

သတင်းစဉ်