ပြည်ထောင်စုဝန်ကြီး ဒေါက်တာချာလီသန်း ရခိုင်ပြည်နယ် MSME လုပ်ငန်းရှင်များ၊ ရခိုင်ပြည်နယ် စက်မှုကြီးကြပ်ရေးနှင့် စစ်ဆေးရေးဦးစီးဌာနမှ ဝန်ထမ်းများနှင့် တွေ့ဆုံ

ပြည်ထောင်စုဝန်ကြီး ဒေါက်တာချာလီသန်း ရခိုင်ပြည်နယ် MSME လုပ်ငန်းရှင်များ၊ ရခိုင်ပြည်နယ် စက်မှုကြီးကြပ်ရေးနှင့် စစ်ဆေးရေးဦးစီးဌာနမှ ဝန်ထမ်းများနှင့် တွေ့ဆုံ

နေပြည်တော် ဒီဇင်ဘာ ၁၅

စက်မှုဝန်ကြီးဌာန ပြည်ထောင်စုဝန်ကြီး ဒေါက်တာချာလီသန်းသည် ရခိုင်ပြည်နယ် စီးပွားရေးရာဝန်ကြီး ဦးစံရွှေမောင်နှင့်အတူ ယနေ့မွန်းလွဲပိုင်းတွင် စစ်တွေမြို့ရှိ ရခိုင်ပြည်နယ်စက်မှုကြီးကြပ်ရေးနှင့် စစ်ဆေးရေးဦးစီးဌာနရုံး၌ MSME လုပ်ငန်းရှင်များနှင့် တွေ့ဆုံသည်။

တွေ့ဆုံစဉ် ပြည်ထောင်စုဝန်ကြီးက စက်မှုဝန်ကြီးဌာနအနေဖြင့် MSME လုပ်ငန်းများ ဖွံ့ဖြိုးတိုးတက်ရေးအတွက် ငွေကြေးအရင်းအနှီးရရှိရေး၊ နည်းပညာရရှိရေး၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေး၊ ဈေးကွက်ရရှိရေးစသည်တို့ကို မိတ်ဖက်အဖွဲ့အစည်းများနှင့် ညှိနှိုင်းဆောင်ရွက်ပေးလျက်ရှိကြောင်း၊ နိုင်ငံတော်ကလည်း MSME လုပ်ငန်း ဖွံ့ဖြိုးတိုးတက်ရေး ရန်ပုံငွေထူထောင်၍ ချေးငွေများ ထုတ်ချေးပေးလျက်ရှိကြောင်း၊ ကုန်ထုတ်လုပ်မှု လုပ်ငန်းများသည် ဈေးကွက်ရှိမှသာ ရေရှည်ရပ်တည် လည်ပတ်နိုင်မည်ဖြစ်၍ ထုတ်ကုန်ပစ္စည်းများကို အရည်အသွေးကောင်းမွန်အောင် ဆောင်ရွက်ရမည့်အပြင် ထုပ်ပိုးရာတွင်လည်း သုံးစွဲသူများ ဝယ်ယူသုံးစွဲချင်စိတ်ဖြစ်အောင် လှပသေသပ်စွာ ဆောင်ရွက်ရမည်ဖြစ်ကြောင်း၊ စိုက်ပျိုးရေးအခြေခံစက်မှုလုပ်ငန်းများကို ဆောင်ရွက်၍ တန်ဖိုးမြင့်ထုတ်ကုန်ပစ္စည်းများ ထုတ်လုပ်နိုင်ရေးကြိုးစားဆောင်ရွက်ရမည်ဖြစ်ကြောင်း၊ MSME လုပ်ငန်းများ ဖွံ့ဖြိုးတိုးတက်ရေးအတွက် အသေးစားစက်မှုလုပ်ငန်းများမှ စတင်ဆောင်ရွက်ရမည်ဖြစ်ကြောင်း၊ စားသောက်ကုန်ထုတ်လုပ်သည့် လုပ်ငန်းများအနေဖြင့် စားသုံးသူပြည်သူများ ဘေးအန္တရာယ်ကင်းရှင်းစွာ အသုံးပြုနိုင်ရေး သတ်မှတ်ချက်များနှင့်အညီ ကုန်ထုတ်လုပ်မှုလုပ်ငန်းစဉ်များကို ဆောင်ရွက်သွားရမည်ဖြစ်ကြောင်း မှာကြားပြီး တက်ရောက်လာသည့် MSME လုပ်ငန်းရှင်များအား ရင်းရင်းနှီးနှီးနှုတ်ဆက်သည်။

ထို့နောက် ပြည်ထောင်စုဝန်ကြီးသည် ရခိုင်ပြည်နယ် စက်မှုကြီးကြပ်ရေးနှင့် စစ်ဆေးရေးဦးစီးဌာနတွင် တာဝန်ထမ်းဆောင်လျက်ရှိသည့် ဝန်ထမ်းများနှင့် တွေ့ဆုံ၍ စက်မှုလုပ်ငန်းများ၊ စက်မှုဇုန်များ၊ MSME လုပ်ငန်းများ စနစ်တကျဖွံ့ဖြိုးတိုးတက်ရေးအတွက် ဥပဒေ၊ နည်းဥပဒေများ၊ အမိန့်၊ ညွှန်ကြားချက်များ ပြဋ္ဌာန်းဆောင်ရွက်လျက်ရှိကြောင်း၊ စက်မှုလုပ်ငန်းများအား ပုဂ္ဂလိကစက်မှုမှတ်ပုံတင်လက်မှတ်များ ထုတ်ပေးနိုင်ရေးအတွက် လုပ်ငန်းစတင်တည်ထောင်ရန် အဆိုပြုတင်ပြသည်မှစ၍ မှတ်ပုံတင်လက်မှတ်ထုတ်ပေးသည်အထိ အဆင့်ဆင့်စိစစ်ခြင်းလုပ်ငန်းများကို ဆောင်ရွက်ရမည်ဖြစ်၍ ဝန်ထမ်းများအနေဖြင့် သတ်မှတ်အရည်အချင်းများနှင့် ပြည့်မီရန်လိုအပ်ကြောင်းပြောကြားပြီး ဝန်ထမ်းများအတွက် ထောက်ပံ့ငွေနှင့် ထောက်ပံ့ပစ္စည်းများ ပေးအပ်၍ ဝန်ထမ်းများ၏ တင်ပြချက်များအပေါ် ညှိနှိုင်းပေါင်းစပ်ဖြေရှင်းဆောင်ရွက်ပေးသည်။

ယင်းနောက်  ပြည်ထောင်စုဝန်ကြီးသည် စံပြမုန့်လုပ်ငန်းနှင့် BMG သောက်ရေသန့်လုပ်ငန်းတို့ကို လှည့်လည်ကြည့်ရှုစစ်ဆေးခဲ့ကြောင်း သိရသည်။

သတင်းစဉ်