မကွေးတိုင်းဒေသကြီး၊ ချောက်မြို့နယ်၌ PDF အမည်ခံ အကြမ်းဖက်သမားများက နိုင်ငံ့ဝန်ထမ်း လေးဦးနှင့် အပြစ်မဲ့ အရပ်သားပြည်သူ ရှစ်ဦးတို့အား မော်တော်ယာဉ် တစ်စီးနှင့်အတူ အကြမ်းဖက် ခြိမ်းခြောက်၍ ဖမ်းဆီးခေါ်ဆောင်

မကွေးတိုင်းဒေသကြီး၊ ချောက်မြို့နယ်၌ PDF အမည်ခံ အကြမ်းဖက်သမားများက နိုင်ငံ့ဝန်ထမ်း လေးဦးနှင့် အပြစ်မဲ့ အရပ်သားပြည်သူ ရှစ်ဦးတို့အား မော်တော်ယာဉ် တစ်စီးနှင့်အတူ အကြမ်းဖက် ခြိမ်းခြောက်၍ ဖမ်းဆီးခေါ်ဆောင်

     လက်နက်ကိုင်အကြမ်းဖက်အဖွဲ့များသည် တိုင်းဒေသကြီးနှင့် ပြည်နယ်များရှိ မြို့၊ ရွာများ အတွင်း တိုက်ပွဲများဖော်ဆောင်ခြင်း၊ လက်နက်ကြီးများဖြင့် အဝေးမှပစ် ခတ်ခြင်း၊ Drone ဖြင့် Drop Bomb များ ပစ်ချတိုက်ခိုက်ခြင်း၊ လက်လုပ်ဗုံး၊ လက်လုပ်မိုင်းများဖြင့် မိုင်းထောင်ဖောက်ခွဲ တိုက်ခိုက်ခြင်းများအား လုပ်ဆောင်လျက်ရှိသည့်အပြင် နိုင်ငံ့ဝန်ထမ်းများနှင့် အပြစ်မဲ့ အရပ်သား ပြည်သူများကို အကြမ်းဖက်ဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်း မစာနာသည့် လူမဆန်သော အကြမ်းဖက်မှုများနှင့် ရာဇဝတ်မှုများအား ကျူးလွန် လုပ်ဆောင်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၆ ခုနှစ်၊ ဇန်နဝါရီ ၁၈ ရက် မွန်းလွဲ ၁ နာရီ ၃၀ မိနစ်တွင် မကွေးတိုင်းဒေသကြီး၊ ချောက်မြို့နယ်သစ်တောဦးစီးဌာနမှ တောအုပ် ဦးလင်းထွန်း(၅၀)နှစ်၊ တောခေါင်း ဦးတင်ထွန်း(၅၉)နှစ်၊ တောကြပ် ဦးအာကာဖြိုး(၂၃)နှစ်နှင့် တောကြပ် ဦးဇော်ပိုင်ဖြိုး(၂၂)နှစ်တို့သည် အလုပ်သမားများဖြစ်ကြသည့် တောင်နောက်ကျေးရွာနေသူများဖြစ်သည့် ဦးအောင်မျိုးနိုင်(၄၅)နှစ်၊ ဦးဇော်ဝင်းဦး(၄၆)နှစ်၊ ဦးစိုးနိုင်(၅၂)နှစ်၊ ဦးကျော်ဟိန်း(၅၀)နှစ်၊ ဦးစိုးလင်း(၃၅)နှစ်၊ ဦးဌေးဌေး (၅၁)နှစ်၊ ဦးနန်းမြင့်အောင်(၄၄)နှစ်၊ ဦးကံဆယ်(၅၅)နှစ်တို့နှင့်အတူ ဆင်ကကျေးရွာအရှေ့ဘက် သုံးမိုင်ခန့်အကွာ ချောက်-ဂွေးချိုသွားကားလမ်းဘေး၌ သစ်တောဦးစီး ဌာန၏ လမ်းဘေး ဝဲ/ယာ စိုက်ပျိုးထားသည့် သစ်ပင်များအား ပြုစုပျိုးထောင်ခြင်းလုပ်ငန်းများ ဆောင်ရွက်နေစဉ် PDF အမည်ခံ အကြမ်းဖက်သမား ခုနစ်ဦးခန့် ရောက်ရှိလာပြီး အကြမ်းဖက်ခြိမ်းခြောက်၍ ၎င်းတို့ ၁၂ ဦးအား သစ်တောဦးစီးဌာနပိုင် မော်တော်ယာဉ် တစ်စီးနှင့်အတူ ဖမ်းဆီးခေါ်ဆောင်သွားခဲ့ကြောင်း သိရသည်။

     အထက်ပါဖြစ်စဉ်မှ နိုင်ငံ့ဝန်ထမ်းများနှင့် အပြစ်မဲ့ အရပ်သားပြည်သူများအား အကြမ်းဖက် ဖမ်းဆီး၍ ခြိမ်းခြောက်ငွေတောင်းခံခြင်း၊ သတ်ဖြတ်ခြင်းများစသော လူသားချင်းမစာနာသည့် လူမဆန်သော ရာဇဝတ်မှုများအား ကျူးလွန်လုပ်ဆောင်လျက်ရှိသည့် အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေးနှင့် ဖမ်းဆီးခံရသူများအား ပြန်လည်ကယ်တင်နိုင်ရေး လုံခြုံရေးတပ်ဖွဲ့ဝင်များက လုံခြုံရေးလုပ်ငန်းစဉ်များနှင့်အညီ ဆက်လက်ဆောင်ရွက်လျက်ရှိကြောင်း သတင်းရရှိပါသည်။