မြန်မာသံတမန်သင်တန်းကျောင်း သံတမန်ရေးရာဘွဲ့လွန်ဒီပလိုမာသင်တန်း (၁/၂၀၂၅) သင်တန်းဆင်းပွဲ ကျင်းပ

မြန်မာသံတမန်သင်တန်းကျောင်း သံတမန်ရေးရာဘွဲ့လွန်ဒီပလိုမာသင်တန်း (၁/၂၀၂၅) သင်တန်းဆင်းပွဲ ကျင်းပ

နေပြည်တော် မတ် ၃၀

မြန်မာသံတမန်သင်တန်းကျောင်း သံတမန်ရေးရာ ဘွဲ့လွန်ဒီပလိုမာသင်တန်း အမှတ်စဉ် (၁/၂၀၂၅) သင်တန်းဆင်းပွဲကို ယနေ့နံနက် ၁၀ နာရီတွင် နိုင်ငံခြားရေးဝန်ကြီးဌာန နေပြည်တော်ရှိ လောကနတ်ခန်းမ၌ ကျင်းပသည်။

အခမ်းအနားသို့ နိုင်ငံခြားရေးဝန်ကြီးဌာန ဒုတိယဝန်ကြီး ဦးကိုကိုကျော်နှင့် ဦးနိုင်မင်းကျော်၊ ပညာရေးဝန်ကြီးဌာန ဒုတိယဝန်ကြီး ဒေါက်တာဇော်မြင့်၊ နိုင်ငံခြားရေးဝန်ကြီးဌာနနှင့် ပညာရေးဝန်ကြီးဌာနတို့မှ ညွှန်ကြားရေးမှူးချုပ်များ၊ မြန်မာသံတမန်သင်တန်းကျောင်း အတိုင်ပင်ခံပညာရှင်များအဖွဲ့၊ Naypyitaw State Academy မှ ပါမောက္ခချုပ်နှင့် သင်ကြား ရေးအဖွဲ့ အဖွဲ့ဝင်များ၊ သံတမန်ရေးရာ ဘွဲ့လွန်ဒီပလိုမာသင်တန်း အမှတ်စဉ် (၁/၂၀၂၅) နေပြည်တော် တန်းခွဲနှင့် ရန်ကုန်တန်းခွဲတို့မှ သင်တန်းသား သင်တန်းသူများ တက်ရောက်ကြသည်။

သင်တန်းဆင်းပွဲတွင် ဒုတိယဝန်ကြီး ဦးနိုင်မင်းကျော်က သင်တန်းဆင်းအမှာစကားပြောကြားပြီး သင်တန်းပြီးမြောက်ကြောင်းလက်မှတ်များ ပေးအပ်ကာ ဒုတိယဝန်ကြီး ဦးကိုကိုကျော်က ထူးချွန်ဆုရရှိသူများကို ဆုများ ပေးအပ်ချီးမြှင့်သည်။

သံတမန်ရေးရာ ဘွဲ့လွန်ဒီပလိုမာသင်တန်း အမှတ်စဉ် (၁/၂၀၂၅) ကို နေပြည်တော်နှင့် ရန်ကုန်တို့တွင် တန်းခွဲ နှစ်ခုဖြင့် ၂၀၂၅ ခုနှစ် ဇွန် ၂၃ ရက်မှ ၂၀၂၆ ခုနှစ် မတ် ၂၆ ရက်အထိ သင်တန်း ကာလ စုစုပေါင်း ရှစ်လကြာ ဖွင့်လှစ်သင်ကြားခဲ့ပြီး အစိုးရအဖွဲ့အစည်းအသီးသီးနှင့် ဝန်ကြီးဌာနများမှ ဝန်ထမ်းများ၊ ပုဂ္ဂလိကကဏ္ဍမှ သံတမန်ရေးရာနှင့် နိုင်ငံတကာဆက်ဆံရေးဆိုင်ရာများကို စိတ်ပါဝင်စားသူများ တက်ရောက်ခဲ့ရာ စုစုပေါင်း ၁၀၄ ဦး တက်ရောက်အောင်မြင်ခဲ့သည်။

အဆိုပါ သံတမန်ရေးရာ ဘွဲ့လွန်ဒီပလိုမာသင်တန်း အမှတ်စဉ် (၁/၂၀၂၅) ၏ ဘွဲ့လက်မှတ်များကို Naypyitaw State Academy တွင် ၂၀၂၆ ခုနှစ် ဒီဇင်ဘာလအတွင်း ပြုလုပ်မည့် ဘွဲ့နှင်းသဘင်အခမ်းအနားတွင် ပေးအပ်ချီးမြှင့်သွားမည်ဖြစ်ကြောင်း သိရသည်။

သတင်းစဉ်