ရှမ်းပြည်နယ်၊ ညောင်ရွှေမြို့နယ်၌ အကြမ်းဖက်အဖွဲ့(စိစစ်ဆဲ)က ရွေးကောက်ပွဲအား ဟန့်တားနှောင့်ယှက်ဖျက်ဆီးရန် ရည်ရွယ်၍ ခြိမ်းခြောက်ဆန့်ကျင်စာ ကပ်ထားခြင်းများ လုပ်ဆောင်

ရှမ်းပြည်နယ်၊ ညောင်ရွှေမြို့နယ်၌ အကြမ်းဖက်အဖွဲ့(စိစစ်ဆဲ)က ရွေးကောက်ပွဲအား ဟန့်တားနှောင့်ယှက်ဖျက်ဆီးရန် ရည်ရွယ်၍ ခြိမ်းခြောက်ဆန့်ကျင်စာ ကပ်ထားခြင်းများ လုပ်ဆောင်

     နိုင်ငံတော်အစိုးရအနေဖြင့် “နိုင်ငံတော်၏ အမျိုးသားအကျိုးစီးပွားကို အလေးထား၍ စစ်မှန်စည်းကမ်းပြည့်ဝသော ပါတီစုံဒီမိုကရေစီစနစ်ကို အကောင်အထည် ဖော်နိုင်မည့် နိုင်ငံရေးအင်အားစုများ၊ ပြည်သူ့ကိုယ်စားလှယ်များ ဖြစ်ပေါ်လာစေရန် အစဉ်တစိုက် ဆောင်ရွက်ရေး”၊ “ပါတီစုံဒီမိုကရေစီအထွေထွေရွေးကောက်ပွဲလုပ်ငန်းစဉ်များ အောင်မြင်ပြီး ပြည်သူလူထုတစ်ရပ်လုံး လိုလားတောင့်တသည့် ပါတီစုံဒီမိုကရေစီစနစ်ကို အောင်မြင်စွာ လျှောက်လှမ်းနိုင်ရေး ပြည်သူလူထု၏ ပူး ပေါင်းပါဝင်မှုဖြင့် အကောင်အထည်ဖော် ဆောင်ရွက်ရေး” ဦးတည်ချက်ကို အကောင်အထည်ဖော်နိုင်ရေးအတွက် ဆောင်ရွက်လျက်ရှိရာ နိုင်ငံတော်ဖွံ့ဖြိုးတိုးတက်မှုများအား မလိုလားသည့် ပြည်ဖျက်အကြမ်းဖက်အဖွဲ့အစည်းများနှင့် ၎င်းတို့၏လက်အောက်ခံ အကြမ်းဖက်သောင်းကျန်းသူအဖွဲ့များက ရွေးကောက်ပွဲအား ဟန့်တားနှောင့်ယှက်ဖျက်ဆီးလိုသည့် ရည်ရွယ်ချက်ဖြင့် အဖျက်အမှောင့်လုပ်ရပ်များကို လုပ်ဆောင်လျက်ရှိပါသည်။

     ထိုသို့ လုပ်ဆောင်လျက်ရှိရာ ၂၀၂၅ ခုနှစ်၊ စက်တင်ဘာ ၁၃ ရက် နံနက် ၈ နာရီ ၃၀ မိနစ်တွင် ရှမ်းပြည်နယ်၊ ညောင်ရွှေမြို့နယ်၊ အင်းတိန်ကျေးရွာ တံတား၏အရှေ့ဘက်ခြမ်း သံပေါင်တန်း၌ ခြိမ်းခြောက်ဆန့်ကျင်စာ ကပ်ထားသည်ကို တွေ့ရှိရကြောင်း သတင်းအရ လုံခြုံရေးတပ်ဖွဲ့ဝင်များက သွားရောက်စစ်ဆေးခဲ့ရာ အဆိုပါနေရာတွင် တံတားသံပေါင်တန်း၌ အကြမ်းဖက်အဖွဲ့(စိစစ်ဆဲ) ကပ်ထားသည့် ရွေးကောက်ပွဲအား ဟန့်တားနှောင့်ယှက်ဖျက်ဆီးရန် ရည်ရွယ်၍ ခြိမ်းခြောက်ဆန့်ကျင်စာများ ရေးသားထားသည့် ကတ်ထူစက္ကူပြားအား တွေ့ရှိရသဖြင့် ဖယ်ရှားရှင်းလင်းခဲ့ကြောင်း သိရသည်။

     အထက်ပါဖြစ်စဉ်မှ ခြိမ်းခြောက်ဆန့်ကျင်စာများကပ်၍ ရွေးကောက်ပွဲအား ဟန့်တားနှောင့်ယှက်ဖျက်ဆီးရန် လုပ်ဆောင်ခဲ့သူများအား ဖော်ထုတ်ဖမ်းဆီး၍ ဥပဒေနှင့်အညီ အရေးယူနိုင်ရေးနှင့် နယ်မြေဒေသတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက လိုအပ်သည့် လုံခြုံရေးလုပ်ငန်းစဉ်နှင့်အညီ ဆက်လက်ဆောင် ရွက်လျက်ရှိကြောင်း သတင်းရရှိပါသည်။