အပြည်ပြည်ဆိုင်ရာလူငယ်များနေ့ကို ဂုဏ်ပြုကြိုဆိုကာ အစိုးရစက်မှုလက်မှုသိပ္ပံ(နေပြည်တော်)၌ မိုးရာသီအားကစားပြိုင်ပွဲကျင်းပ

အပြည်ပြည်ဆိုင်ရာလူငယ်များနေ့ကို ဂုဏ်ပြုကြိုဆိုကာ အစိုးရစက်မှုလက်မှုသိပ္ပံ(နေပြည်တော်)၌ မိုးရာသီအားကစားပြိုင်ပွဲကျင်းပ

နေပြည်တော် သြဂုတ် ၇

သြဂုတ်လ ၁၂ ရက်နေ့တွင် ကျရောက်မည့် အပြည်ပြည်ဆိုင်ရာလူငယ်များနေ့ကို ဂုဏ်ပြုကြိုဆိုသောအားဖြင့် မိုးရာသီအားကစားပြိုင်ပွဲ ဖွင့်ပွဲအခမ်းအနားကို ယနေ့ညနေပိုင်း၌ အစိုးရစက်မှုလက်မှုသိပ္ပံ(နေပြည်တော်)၌ ကျင်းပရာ သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျ တက်ရောက်ကာ အဖွင့်အမှာစကားပြောကြား ရာတွင် နိုင်ငံ့လူငယ်များကို ကမ္ဘာ့လူငယ်များနှင့် ရင်ပေါင်တန်းနိုင်ရေးအတွက် ဘဝရပ်တည်မှုခိုင်မာစေရေးအတွက် ပညာရည်မြင့်မားရေးအပြင် ဘက်စုံထူးချွန်ထက်မြက်စေရေး ပြုစုပျိုးထောင်ပေးလျက်ရှိကြောင်း၊ သို့ဖြစ်ရာ ကျောင်းသားလူငယ်များသည် နိုင်ငံ့စေတနာကို သိရှိနားလည်ကြပြီး တိုင်းပြည်ချစ်စိတ်ထက်သန်စွာ ပြည်သူများ၏ အကျိုးကို အမှန်တကယ် သယ်ပိုးနိုင်ရေး နည်းပညာဖွံ့ဖြိုးရေးလေ့လာမှုများကို ကျားကုတ်ကျားခဲ ကြိုးပမ်း ဆောင်ရွက်ကြရန်နှင့် တစ်ချိန်တွင် နိုင့်တာဝန်များကို ပခုံးပြောင်းထမ်းဆောင်ရမည့်သူများပီပီ ဗလ ငါးတန်ဖွံ့ဖြိုးရေး အလေးထားဆောင်ရွက်သွားရန်၊ ကျောင်းသားအားကစားသမားများမှသည် နိုင်ငံ့ဂုဏ်ဆောင်အားကစားများဖြစ်သည် အထိ ရည်မှန်းဆောင်ရွက်ကြရန် တိုက်တွန်းပြောကြားကာ အခမ်းအနားကို ဖွင့်လှစ်ပေးသည်။

ထို့နောက် ပြိုင်ပွဲဝင် ကျောင်းသားများက အားကစားသစ္စာအဓိဌာန်ကို သံပြိုင်ရွတ်ဆိုကြသည်။ ယင်းနောက် ဒုတိယဝန်ကြီးသည် အင်ဂျင်နီယာဘာသာရပ်အလိုက် ပြိုင်ပွဲဝင်အသင်းများကို ရင်းရင်းနှီးနှီး လိုက်လံနှုတ်ဆက်သည်။

ဆက်လက်၍ အင်ဂျင်နီယာဘာသာရပ်ပေါင်းစုံ ညွန့်ပေါင်းအကအဖွဲ့နှင့် ဘာသာရပ်အလိုက် ကျောင်းသား၊ ကျောင်းသူ အကအဖွဲ့များက အစီအစဥ်အတိုင်း ကပြဖျော်ဖြေကြရာ ဒုတိယဝန်ကြီးက အကအဖွဲ့များကို အဖွဲ့လိုက် ဂုဏ်ပြုဆုများ ပေးအပ်ချီးမြှင့်သည်။

ယင်းနောက် အဖွင့်ပွဲစဥ် ဖူဆယ်ဘော်လုံး(ကျား)ပြိုင်ပွဲအဖြစ် Farm Machinery အသင်းနှင့် Civil အသင်းတို့ ယှဥ်ပြိုင်ကစားကြရာ အကြိတ်အနယ်ရှိခဲ့ပြီး တစ်ဘက် လေးဂိုးစီဖြင့် သရေကျသွားသည်။

ပြိုင်ပွဲအပြီးတွင် ဒုတိယဝန်ကြီးက ဝန်ထမ်းများ၊ ကျောင်းသားများကို ရင်းရင်းနှီးနှီး လိုက်လံနှုတ်ဆက်ကာ အခက်အခဲလိုအပ်ချက် တင်ပြမှုများကို ဖြေရှင်းဖြည့်ဆည်းပေးသည်။

အဆိုပါ မိုးရာသီအားကစားပြိုင်ပွဲတွင် ဖူဆယ်ဘောလုံး(ကျား)၊ ဘောလီဘော၊ ပိုက်ကျော်ခြင်း၊ စားပွဲတင် တင်းနစ်၊ ကြက်တောင်(ကျား/မ) စုစုပေါင်း အားကစားနည်း (၅)မျိုးကို ဩဂုတ်လ ၇ ရက်နေ့မှ ၁၄ ရက်နေ့အထိ ကျင်းပမည် ဖြစ်၍ အားကစားသမားပေါင်း ၁၉၇ ဦး ယှဉ်ပြိုင်ကစားကြမည်ဖြစ်ကြောင်း သိရသည်။