တနင်္သာရီတိုင်းဒေသကြီး၊ သရက်ချောင်းမြို့နယ်၌ PDF အမည်ခံ အကြမ်းဖက်သမားများက ခရီးသည်တင်ရေယာဉ် တစ်စီးအား လက်နက်ငယ်များဖြင့် ပစ်ခတ်တိုက်ခိုက်ခဲ့မှုကြောင့် ရေယာဉ်မောင်းသူ အပါအဝင် အပြစ်မဲ့ ခရီးသွားပြည်သူ လေးဦး ထိခိုက်ဒဏ်ရာရရှိ

တနင်္သာရီတိုင်းဒေသကြီး၊ သရက်ချောင်းမြို့နယ်၌ PDF အမည်ခံ အကြမ်းဖက်သမားများက ခရီးသည်တင်ရေယာဉ် တစ်စီးအား လက်နက်ငယ်များဖြင့် ပစ်ခတ်တိုက်ခိုက်ခဲ့မှုကြောင့် ရေယာဉ်မောင်းသူ အပါအဝင် အပြစ်မဲ့ ခရီးသွားပြည်သူ လေးဦး ထိခိုက်ဒဏ်ရာရရှိ

     အစွန်းရောက်အကြမ်းဖက်အဖွဲ့များအနေဖြင့် နိုင်ငံတော်တည်ငြိမ်အေးချမ်းမှု ပျက်ပြားစေရန် ရည်ရွယ်၍ စစ်ရေးပစ်မှတ်မဟုတ်သည့် အပြစ်မဲ့ အရပ်သားပြည်သူ များ နေထိုင်ရာ မြို့၊ ကျေးရွာများအတွင်းသို့ လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခြင်း၊ လမ်းမကြီးများပေါ်၌ မောင်းနှင်သွားလာနေသည့် မော် တော်ယာဉ်များ၊ မြစ်ကြောင်းများအတွင်း ခုတ်မောင်းပြေးဆွဲ နေသည့် ခရီးသည်တင်ရေယာဉ်များအား မိုင်းဆွဲတိုက်ခိုက်ခြင်း၊ လမ်းတံတားများအား မိုင်းထောင် ဖောက်ခွဲဖျက်ဆီးခြင်းစသည့် အကြမ်းဖက်မှုလုပ်ရပ်များအား လုပ်ဆောင်လျက်ရှိသည်။

     ထိုသို့ လုပ်ဆောင်လျက်ရှိရာ ၂၀၂၆ ခုနှစ်၊ ဖေဖော်ဝါရီ ၃ ရက် နံနက် ၁၁ နာရီတွင် တနင်္သာရီတိုင်းဒေသကြီး၊ ကျွန်းစုမြို့နယ်နေ ရေယာဉ်မောင်း ဦးမောင်လတ်(၄၀) နှစ် မောင်းနှင်ပြီး ရေယာဉ်မောင်းအကူ ၂ ဦး၊ ခရီးသည် ၁၃ ဦးတို့ လိုက်ပါလာသည့် “ရတနာပြည့်ဖြိုး-၂၇” ခရီးသည်တင်အမြန်ရေယာဉ်သည် မြိတ်မြို့မှ ထားဝယ်မြို့သို့ ထွက်ခွာလာစဉ် တနင်္သာရီတိုင်း ဒေသကြီး၊ သရက်ချောင်းမြို့နယ်၊ ကျွဲဇပ်ကျေးရွာအနောက်ဘက် ကိုက် ၃၀၀ ခန့်အကွာအရောက်၌ ထားဝယ်မြစ်ကမ်းဘေးမှနေ ၍ PDF အမည်ခံ အကြမ်းဖက်သမားများ အင်အား(စိစစ်ဆဲ)က လက်နက်ငယ် များဖြင့် ပစ်ခတ်တိုက်ခိုက်ခဲ့မှုကြောင့် ရေယာဉ်မောင်း ဦးမောင်လတ် အပါအဝင် ခရီး သည်တင် ရေယာဉ်ပေါ်၌ လိုက်ပါလာသူများဖြစ်ကြသည့် သရက်ချောင်းမြို့နယ်၊ သင်းကျွန်းကျေးရွာနေ ဦးသီဟစိုး(၃၂)နှစ်၊ ရန်တောင်ကျေးရွာနေ ဦးစုငယ်(၅၄)နှစ်နှင့် လောင်းလုံးမြို့နယ်၊ ကြက်လွှတ် ကျေးရွာနေ မအိမ့်သဇင်ဌေး(၁၁)နှစ်တို့တွင် ကျည်ထိမှန် ဒဏ်ရာများရရှိခဲ့၍ သရက်ချောင်းမြို့နယ် ပြည်သူ့ဆေးရုံသို့ ပို့ဆောင်ထားရှိကြောင်း သိရသည်။

     ထိုကဲ့သို့ မြစ်ကြောင်းအတွင်း ခုတ်မောင်းသွားလာလျက်ရှိသည့် ခရီးသည်တင်ရေယာဉ် များအား လက်နက်ငယ်များဖြင့် ပစ်ခတ်တိုက်ခိုက်မှုကျူးလွန်ခဲ့သည့် PDF အမည်ခံ အကြမ်းဖက်သမားများအား ဖော်ထုတ်ဖမ်းဆီး အရေးယူနိုင်ရေး လုံခြုံရေးတပ်ဖွဲ့ဝင်များက ဒေသခံပြည်သူများနှင့် ပူးပေါင်း၍ လိုအပ်သည်များ ဆက်လက်ဆောင်ရွက်လျက်ရှိကြောင်း သတင်းရရှိပါသည်။