ဒုတိယဝန်ကြီး ဒေါက်တာသန်းစိုး ရန်ကုန်တိုင်းဒေသကြီးအတွင်းရှိ ငှက်အော်စမ်း လူငယ်သင်တန်းကျောင်းနှင့် အမျိုးသမီးများ ပြုစုစောင့်ရှောက်ရေးနှင့် ဖွံ့ဖြိုးတိုးတက်ရေးဌာနသို့ ကြည့်ရှုစစ်ဆေး

ဒုတိယဝန်ကြီး ဒေါက်တာသန်းစိုး ရန်ကုန်တိုင်းဒေသကြီးအတွင်းရှိ ငှက်အော်စမ်း လူငယ်သင်တန်းကျောင်းနှင့် အမျိုးသမီးများ ပြုစုစောင့်ရှောက်ရေးနှင့် ဖွံ့ဖြိုးတိုးတက်ရေးဌာနသို့ ကြည့်ရှုစစ်ဆေး

နေပြည်တော် ဇန်နဝါရီ ၂၂

လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန ဒုတိယဝန်ကြီး ဒေါက်တာ သန်းစိုးသည် ယနေ့နံနက်ပိုင်းတွင် ကလေးသူငယ်အခွင့်အရေးများဆိုင်ရာဥပဒေ၊ ပုဒ်မ - ၈၉ အရ ကလေးသူငယ်များကို လက်ခံစောင့်ရှောက်ထားသော ရန်ကုန်တိုင်းဒေသကြီးအတွင်းရှိ ငှက်အော်စမ်းလူငယ်သင်တန်းကျောင်းနှင့် အမျိုးသမီးများ ပြုစုစောင့်ရှောက်ရေးနှင့် ဖွံ့ဖြိုးတိုးတက်ရေးဌာနသို့ သွားရောက်ကြည့်ရှုသည်။

ဦးစွာ ဒုတိယဝန်ကြီးသည် ရန်ကုန်တိုင်းဒေသကြီး ကော့မှူးမြို့နယ်ရှိ ငှက်အော်စမ်း လူငယ်သင်တန်းကျောင်းသို့ ရောက်ရှိပြီး ကျောင်းသား အိပ်ဆောင်များ၊ ကျောင်းပြင်ပပညာရေးသင်ကြားပေးနေမှုနှင့် အသက်မွေးဝမ်းကျောင်းပညာ သင်ကြားပေးနေမှုများ၊ ကျောင်းစာကြည့်တိုက်၊ ဆေးပေးခန်း၊ မီးဖိုဆောင်နှင့် ကျောင်းတွင်း စိုက်ခင်းများကို လိုက်လံကြည့်ရှုသည်။

ထို့နောက် ဒုတိယဝန်ကြီးသည် တွံတေးမြို့နယ်ရှိ အမျိုးသမီးများ ပြုစုစောင့်ရှောက်ရေးနှင့် ဖွံ့ဖြိုးတိုးတက်ရေးဌာနသို့ သွားရောက်ကာ ကျောင်းသူအဆောင်များ၊ ကျောင်းပြင်ပ ပညာရေး သင်ကြားနေမှုနှင့် စက်ချုပ်သင်တန်း၊ ချည်ထိုးလက်မှုသင်တန်းများကို လိုက်လံကြည့်ရှုသည်။

ကြည့်ရှုစဉ် ဒုတိယဝန်ကြီးက သင်တန်းကျောင်းနှစ်ကျောင်းတွင် လက်ခံစောင့်ရှောက်ထားသော ကလေးများအား ရင်းရင်းနှီးနှီး တွေ့ဆုံကာ သင်တန်းကျောင်းတွင် သင်ယူရသည့် သက်မွေးပညာများကို ကျွမ်းကျင်တတ်မြောက်သည်အထိ သင်ယူသွားရန်၊ မိမိတို့ရပ်ရွာသို့ ပြန်လည်ရောက်ရှိပါက တတ်မြောက်သွားသည့် သက်မွေးပညာများကို လက်တွေ့အသုံးချရန်၊ လူငယ်လူရွယ်များဖြစ်သည့်အတွက် ယခင်အမှားကို သင်ခန်းစာယူ၍ နောက်နောင်တွင် တိုင်းပြည်မှ အားကိုးရသည့် လူတော်လူကောင်းများဖြစ်အောင် ကြိုးစားကြရန် ပြောကြားခဲ့ကြောင်း သိရသည်။

သတင်းစဉ်