နိုင်ငံပိုင်ကဏ္ဍအတွက် နိုင်ငံတကာစာရင်းစံများဒီပလိုမာသင်တန်း အမှတ်စဉ် (၂) အပိုင်း(၂) သင်တန်းဖွင့်ပွဲ ကျင်းပ

နိုင်ငံပိုင်ကဏ္ဍအတွက် နိုင်ငံတကာစာရင်းစံများဒီပလိုမာသင်တန်း အမှတ်စဉ် (၂) အပိုင်း(၂) သင်တန်းဖွင့်ပွဲ ကျင်းပ

နေပြည်တော်     အောက်တိုဘာ      ၂၁

နိုင်ငံပိုင်ကဏ္ဍအတွက် နိုင်ငံတကာစာရင်းစံများဒီပလိုမာသင်တန်းအမှတ်စဉ်(၂) အပိုင်း(၂)(Diploma in International Public Sector Accounting Standards - Dip  IPSAS) သင်တန်းဖွင့်ပွဲကို ယနေ့ နံနက်ပိုင်းတွင် နေပြည်တော်ရှိ  ပြည်ထောင်စုစာရင်းစစ်ချုပ်ရုံး နဝရတ်ခန်းမ၌ Hybrid စနစ်ဖြင့် ကျင်းပသည်။

သင်တန်းဖွင့်ပွဲသို့ ပြည်ထောင်စုစာရင်းစစ်ချုပ် မြန်မာနိုင်ငံစာရင်းကောင်စီဥက္ကဋ္ဌ ဒေါက်တာခင်နိုင်ဦး၊ ဒုတိယစာရင်းစစ်ချုပ် မြန်မာနိုင်ငံစာရင်းကောင်စီဒုတိယဥက္ကဋ္ဌ(၁)ဒေါ်နိုင်သက်ဦး၊ ဒုတိယဥက္ကဋ္ဌ(၂) ဦးဝမ်းတင်နှင့်ကောင်စီဝင်များ၊ ပြည်ထောင်စုစာရင်းစစ်ချုပ်ရုံးမှ တာဝန်ရှိသူများနှင့်သင်တန်းသားများ တက်ရောက်ကြသည်။

သင်တန်းဖွင့်ပွဲတွင် ပြည်ထောင်စုစာရင်းစစ်ချုပ်က သင်တန်းမှ IPSAS စာရင်းစံများနှင့်စပ်လျဉ်းသည့်  အသိပညာဗဟုသုတများရရှိမည်ဖြစ်ပြီး ဘဏ္ဍာရေးရှင်းတမ်းများကို ပြုစုရေးဆွဲရာတွင် လိုက်နာကျင့်သုံးခြင်းဖြင့်        ပိုမိုကောင်းမွန်သည့် တာဝန်ယူမှု၊ တာဝန်ခံမှုနှင့် ပွင့်လင်းမြင်သာမှုရှိသည့်  ဘဏ္ဍာရေးအစီရင်ခံစာများကို  ရေးဆွဲနိုင်မည်ဖြစ်ပါကြောင်း၊ ထို့အပြင်  မိမိလုပ်ငန်း၏ နှစ်အလိုက်ဘဏ္ဍာရေးရှင်းတမ်းများ၊ အခြားလုပ်ငန်းများ၏ဘဏ္ဍာရေးရှင်းတမ်းများကို နှိုင်းယှဉ်လေ့လာ၍ စိစစ်သုံးသပ်နိုင်မည့်အပြင် ဝန်ထမ်းများ၏ လုပ်ငန်း စွမ်းဆောင်ရည် ပိုမိုပြည့်ဝတိုးတက်လာပြီး ကောင်းမွန်သည့်ဘဏ္ဍာရေးစီမံခန့်ခွဲမှုကိုဖြစ်ပေါ်စေနိုင်ပါကြောင်း၊ သင်တန်းသားများအနေဖြင့် လေ့လာသင်ယူခဲ့ရသည့် သင်ခန်းစာများအပြင် စာရင်းစံဆိုင်ရာပြောင်းလဲမှုများကို စဉ်ဆက်မပြတ်လေ့လာ၍ လုပ်ငန်းခွင်တွင်အသုံးချခြင်းဖြင့် ဌာန၊ အဖွဲ့အစည်းများမှတစ်ဆင့် နိုင်ငံတော်၏အကျိုးစီးပွားများ ပိုမိုတိုးတက်အောင်ဆောင်ရွက်နိုင်သည့် ဝန်ထမ်းများဖြစ်စေရေး ကြိုးစားကြစေလိုပါကြောင်း တိုက်တွန်းပြောကြားသည်။

ထို့နောက် ပြည်ထောင်စုစာရင်းစစ်ချုပ်ရုံးအဆင့်မြင့်စာရင်းကိုင်နှင့် စာရင်းစစ်သင်တန်းကျောင်း နေပြည်တော်သင်တန်းကျောင်းတာဝန်ခံက သင်တန်းဆိုင်ရာအချက်အလက်များကို  ရှင်းလင်းပြောကြားသည်။

IPSAS သင်တန်းတွင် နိုင်ငံပိုင်ကဏ္ဍအတွက်နိုင်ငံတကာစာရင်းစံ ၁၄ ခု ပို့ချမည်ဖြစ်ပြီး ပြည်ထောင်စုစာရင်းစစ်ချုပ်ရုံးမှနှစ်ဦး၊ ဝန်ကြီးဌာန ၁၃ ခုမှ ၂၄ ဦး စုစုပေါင်း သင်တန်းသား ၂၆ ဦး တက်ရောက် ကြကာ သင်တန်းကို ၂၀၂၅ ခုနှစ် အောက်တိုဘာ ၂၁ ရက်မှ ၂၀၂၆ ခုနှစ် ဇန်နဝါရီ ၅ ရက်အထိ ဖွင့်လှစ်သွားမည်ဖြစ်သည်။

IPSAS သင်တန်းကို Batch တစ်ခုလျှင် သင်တန်း level သုံးခုခွဲ၍ သင်ကြားပေးမည်ဖြစ်ပြီး level တစ်ခုချင်းအလိုက် သင်တန်းတက်ရောက် အောင်မြင်သူများကို Certificate လက်မှတ်များ ပေးအပ်ကာ Level- III အထိ တက်ရောက်အောင်မြင်သူများကို ဒီပလိုမာလက်မှတ်ပေးအပ်သွားမည်ဖြစ်ကြောင်း သိရသည်။ 

သတင်းစဉ်