ယဉ်ကျေးမှုအမွေအနှစ် ထိန်းသိမ်းစောင့်ရှောက် အမျိုးသားရေးအားမာန်များ မြှင့်တင်

ယဉ်ကျေးမှုအမွေအနှစ် ထိန်းသိမ်းစောင့်ရှောက် အမျိုးသားရေးအားမာန်များ မြှင့်တင်

နိုင်ငံတော်လုံခြုံရေးနှင့်အေးချမ်းသာယာရေးကော်မရှင်သည် နိုင်ငံတော်တည်ငြိမ်အေးချမ်းရေး၊ တိုင်းရင်းသားလူမျိုးအချင်းချင်း ချစ်ကြည်ရင်းနှီးစည်းလုံးညီညွတ်ရေး၊ နိုင်ငံသားများ၏ လူမှုစီးပွားဘဝ ဖွံ့ဖြိုးတိုးတက်ရေး၊ နိုင်ငံတော်အနာဂတ်အတွက် အားကိုးအားထားပြုရမည့် မျိုးဆက်သစ်လူငယ်များ ဗလငါးတန်နှင့် ပြည့်စုံရေး၊ အမျိုးသားယဉ်ကျေးမှုအမွေအနှစ်များ ထိန်းသိမ်းစောင့်ရှောက်ရေး၊ စစ်မှန်စည်းကမ်းပြည့်ဝသည့် ပါတီစုံဒီမိုကရေစီစနစ် အကောင်အထည်ဖော်နိုင်ရေးစသည်တို့ကို ပြည်သူများနှင့်အတူ ကြိုးပမ်းဆောင်ရွက်လျက်ရှိသည်။

ရည်မှန်းချက်လုပ်ငန်းများ အောင်မြင်အောင် ကြိုးပမ်းဆောင်ရွက်ရာတွင် နိုင်ငံတော်အစိုးရနှင့်အတူ နိုင်ငံသူ နိုင်ငံသားအားလုံး အမျိုးသားရေးအားမာန်များ မြင့်မားခိုင်ကျည်နေစေရန် လိုအပ်သည်။ အမျိုးသားရေးစွမ်းပကားများ၊ ကိုယ်ခံအားများ အားကောင်းနေစေရန်အတွက် မြန်မာတို့၏ အစဉ်အလာကြီးမားသော အမျိုးသားရေးစရိုက်လက္ခဏာများ၊ ယဉ်ကျေးမှုအစဉ်အလာများ ရှင်သန်ထွန်းကားနေစေရန် လိုအပ်သည်။ အမျိုးသားယဉ်ကျေးမှုစရိုက်လက္ခဏာများကို မထိန်းသိမ်း မစောင့်ရှောက်နိုင်ပါက နိုင်ငံနှင့်လူမျိုး တဖြည်းဖြည်းပျောက်ကွယ်သွားနိုင်သည့် အန္တရာယ်ရှိသည်။ ရိုးရာယဉ်ကျေးမှုများ မှေးမှိန်ပျောက်ကွယ်သွားလျှင် နိုင်ငံတကာက မိမိနိုင်ငံအပေါ် အထင်ကြီးလေးစားမှုများ လျော့နည်းသွားပြီး အမျိုးသားရေးအားမာန်များပါ ထိခိုက်နိုင်သည်။

ထို့ကြောင့် ရှေးဘိုးဘွားအစဉ်အဆက်ကတည်းက ထိန်းသိမ်းစောင့်ရှောက်လာခဲ့သော မြန်မာ့ယဉ်ကျေးမှုစရိုက်လက္ခဏာများကို ထိန်းသိမ်းစောင့်ရှောက်ရန် အားလုံးတွင် တာဝန်ရှိသည်။ ဘိုးဘွားအမွေအနှစ်များဖြစ်သည့် မြန်မာ့ရိုးရာအနုပညာအမွေအနှစ်များကို မျိုးဆက်သစ်လူငယ်များအား လက်ဆင့်ကမ်းသယ်ဆောင်ပေးနိုင်ရန် ကြိုးပမ်းဆောင်ရွက်လျက်ရှိသည်။ မြန်မာ့ရိုးရာယဉ်ကျေးမှု အမွေအနှစ်များ ရှေးအစဉ်အဆက်မှ ယနေ့ထက်တိုင်အောင် တည်တံ့ခိုင်မြဲနေခြင်းမှာ မြန်မာ့ရိုးရာယဉ်ကျေးမှုကို ချစ်ခင်မြတ်နိုးသော မျိုးဆက်သစ်လူငယ်များ၏ စွမ်းပကားများကြောင့်ဖြစ်သည်။ မြန်မာနိုင်ငံအတွင်း မှီတင်းနေထိုင်ကြသည့် တိုင်းရင်းသားလူမျိုးများ၏ အနုသုခုမပညာရပ်များ မည်သို့ပင် ကွဲပြားခြားနားကြသည်ဖြစ်စေ တစုတစည်းတည်း တူညီစွာပါဝင်လျက်ရှိသည်။

မျက်မှောက်ကာလတွင် အမျိုးသားရေးကိုယ်ခံစွမ်းအားများ လျော့နည်းကျဆင်းသွားစေရန်၊ တိုင်းရင်းသားလူမျိုးအချင်းချင်း စိတ်ဝမ်းကွဲပြားစေရန် ပြည်တွင်း၊ ပြည်ပက နည်းအမျိုးမျိုးအဖုံဖုံ ကြံစည်အားထုတ်လျက်ရှိရာတွင် တိုင်းတစ်ပါးယဉ်ကျေးမှုနှင့် စရိုက်လက္ခဏာများကို အထင်ကြီးပြီး ကိုယ်ပိုင်ယဉ်ကျေးမှု အမျိုးသားရေးစရိုက်လက္ခဏာများကို အထင်သေးစိတ်များဖြစ်လာစေရန် နည်းမျိုးစုံဖြင့် လုပ်ဆောင်လျက်ရှိသည်။ ခေတ်မီနည်းပညာများ ဖြစ်ထွန်းလာမှုနှင့်အတူ ယင်းတို့ကို အသုံးချ၍ မသိမသာဖြစ်စေ၊ သိသိသာသာဖြစ်စေ နှောင့်ယှက်ဖျက်ဆီးနေကြသည်ကို တွေ့ရမည်ဖြစ်သည်။ ထို့ကြောင့် အမျိုးသားယဉ်ကျေးမှုစရိုက်လက္ခဏာများသည် နိုင်ငံနှင့် လူမျိုးအတွက် အရေးကြီးသော စွမ်းပကားများဖြစ်၍ ဝိုင်းဝန်းထိန်းသိမ်းစောင့်ရှောက်ရမည်ဖြစ်သည်။

ယနေ့ကျင်းပပြုလုပ်နေပြီဖြစ်သော မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲများသည် မြန်မာတို့၏အားမာန်များကို နိုးကြားတက်ကြွ ရှင်သန်စေသည့် အမျိုးသားရေးလက္ခဏာများဖြစ်သည်။ အဆိုပါအမျိုးသားရေးစရိုက်လက္ခဏာများကို မြန်မာ့ယဉ်ကျေးမှုအား မြတ်နိုးတန်ဖိုးထားသည့် မျိုးဆက်သစ်အနုသုခုမရှင်များနှင့် အားကြိုးမာန်တက် ထုတ်ဖော်ပြသလျက်ရှိသလို မြန်မာ့ရိုးရာယဉ်ကျေးမှုကို လက်ဆင့်ကမ်းထိန်းသိမ်းစောင့်ရှောက်လာကြသော ပညာရှင်များက အားပေးမြှင့်တင်ပေးလျက်ရှိသည်။ ပြိုင်ပွဲဝင်များအားလုံးသည် မြို့နယ်အဆင့်၊ ခရိုင်အဆင့်နှင့် တိုင်းဒေသကြီးနှင့် ပြည်နယ်အဆင့်များတွင် အကောင်းဆုံးယှဉ်ပြိုင်ခဲ့ကြပြီးနောက် ယခု နိုင်ငံတော်ဗဟိုအဆင့်တွင် ဂုဏ်ယူဝင့်ကြွားဖွယ် ယှဉ်ပြိုင်နေကြပြီဖြစ်သည်။

တစ်နည်းဆိုလျှင် ပြည်ထောင်စုတစ်ဝန်းမှ အနုသုခုမပညာရပ်ဆိုင်ရာ လက်ရွေးစင်များ ပေါ်ထွန်းလာပြီဖြစ်သည်။ နိုင်ငံတစ်ဝန်းမှ ပေါင်းစုပေါ်ထွန်းလာသော အနုပညာစွမ်းပကားဖြင့် ဂုဏ်ယူဖွယ်ရာ မြန်မာ့ယဉ်ကျေးမှုကို ရှင်သန်ထွန်းကားလာအောင် ဆောင်ကြဉ်းပေးနေကြသည်။ ပြိုင်ပွဲဝင်များသည် အနုပညာဘာသာရပ်အလိုက် ကျွမ်းကျင်ပိုင်နိုင်စွာ လေ့ကျင့်ခဲ့ကြပြီး အုပ်ချုပ်သူနည်းပြများနှင့်အတူ တစ်ဦးချင်းပြိုင်ပွဲတွင်ဖြစ်စေ၊ အဖွဲ့လိုက်ပြိုင်ပွဲတွင်ဖြစ်စေ အစွမ်းကုန် ယှဉ်ပြိုင်မည်ဆိုသည့် ရည်မှန်းချက်ထားကာ အားမာန်အပြည့်ဖြင့် ထုတ်ဖော်ပြသနေပြီဖြစ်သည်။

သို့ဖြစ်ရာ နိုင်ငံတော်ကို ချစ်မြတ်နိုးစိတ်၊ ကိုယ့်လူမျိုးကို ချစ်ခင်မြတ်နိုးသည့် စိတ်ဓာတ်များဖြင့် အစဉ်အလာကြီးမားသည့် မြန်မာ့ရိုးရာယဉ်ကျေးမှုအမွေအနှစ်များကို (၂၆) ကြိမ်မြောက် မြန်မာ့ရိုးရာယဉ်ကျေးမှု အဆို၊ အက၊ အရေး၊ အတီးပြိုင်ပွဲကြီးမှတစ်ဆင့် အစွမ်းကုန်ထုတ်ဖော်ပြသယှဉ်ပြိုင်ကြပြီး ဂုဏ်ယူဝင့်ကြွားခဲ့သည့် ပြည်ထောင်စုမြန်မာနိုင်ငံတော်ကြီး ထာဝစဉ်အဓွန့်ရှည်တည်တံ့ခိုင်မြဲနိုင်စေအောင် အနုပညာစွမ်းပကားများဖြင့် တစ်တပ်တစ်အား ဆောင်ကြဉ်းပေးနေပြီဖြစ်ပါကြောင်း။ ။